Pagbati sa Diwa sa Institute

Imahe

young adults at institute

Sa dihang nagsugod ko sa kolehiyo, ganahan kaayo kong mahimong kabahin sa pang-edukasyon nga palibut ug makakita sa kadasig sa akong mga kauban. Salamat sa akong Amahan sa Langit, sa Perpetual Education Fund, ug sa suporta sa akong pamilya, ang akong pangandoy nag-anam og katinuod.

Atol sa unang mga semana sa klase, ako nakaamgo sa lisud nga buluhaton nga naghulat kanako sa sunod nga lima ka tuig: homework, mga quiz, mga test, ug mga proyekto. Misugod ako sa paghigugma sa akong napilian nga kurso ug sa akong kolehiyo, apan ako usab nakaamgo nga hangtud niana ako nagpuyo sa usa ka bula. Tataw kaayo kanako nga ako lahi kay sa ubang mga estudyante sa kolehiyo. Sila naminaw sa musika nga may malaw-ay nga mga pulong, ug ang ilang mga panag-istoryahanay daw kabahin sa imoral, naggamit og ginadiling drugas, ug mag-inom og makahubog sa katapusan sa semana.

Ang akong mga klasmeyt midapit kanako sa makadaghan nga higayon sa pag-apil uban kanila sa ilang mga kalihokan sa katapusan sa semana. Human ako mipasabut sa akong mga sumbanan ug sa akong relihiyon, daghang mirespeto sa akong panglantaw ug mihunong sa pagpamugos nga ako moapil kanila, apan mas daghan ang mibiay-biay sa akong mga gituohan. Naningkamot ko nga dili magpakabana niini nga mga komentaryo, apan naghunahuna ko, “Mahimo ba kini nako pirme?” Nag-ampo ako sa kanunay nga makadawat og kalig-on ug dili mobati nga nag-inusara. Apan ako wala mobati nga kini nga mga pag-ampo gitubag. Dayon ako nakaamgo nga ang mga butang nga nahitabo sa akong palibut sa unibersidad dili mausab. Bisan tuod ako naa sa unibersidad, mipadayon ako sa pagtambong sa Young Women, mao nga akong nahibaloan ang kabahin sa institute usa ka Dominggo niana sa miting sa sakrament. Ako mihukom sa pag-adto sa institute sa pagkasunod Miyerkules aron sa pagpangutana mahitungod sa Perpetual Education Fund.

Human sa usa ka dugay ug busy nga adlaw sa unibersidad, miadto ko sa institute. Misakay ko og pangpubliko nga transportasyon, milingkod, ug misugod sa pagbasa sa sunod nga kapitulo sa homework. Nanghupaw ko og lawom, gustong mopahulay, ug mihangad, ug nakita ang walay nada nga butang duol nako. Sa akong hununganan nanaog ko ug milakaw padulong sa institute, naghunahuna og maayo sa homework nga kinahanglan nakong i-submit pagkasunod adlaw.

Bisan og ako nagpuyo sa mga sumbanan sa ebanghelyo, ang palibut sa unibersidad mipabug-at kanako samtang ako nisulod sa building sa institute. Ako misulod ug nakita ang mga estudyante sa kolehiyo nga mga young adult nga ligdong ang sinul-oban ug nakadungog kanila nga nagsulti sa matinahuron nga paagi ngadto sa usag usa. Unsa nga mga kurso ilang kuhaon niini nga semester? Ang Doktrina ug mga Pakigsaad? Ang Basahon ni Mormon? Misyonaryo nga Pagpangandam?

Miduol ko sa klerk, nakadawat sa tubag sa pangutana nga akong gusto nga ipangutana, ug milakaw. Duol sa gawasanan milingi ko, mibati sa palibut sa institute. Migawas ko sa pultahan, ug ang mga luha mipuno sa akong mga mata samtang akong gibati ang dakong kalipay. Misakay kog pangpubliko nga sakyanan pauli sa akong balay, naghilak ug nagpahiyum. Usa ka dili mapapas nga hunahuna miabut kanako: Wala ako mag-inusara.

Nianang higayuna akong nadawat ang tubag sa akong mga pag-ampo. Akong gibati ang Espiritu, naghunahuna mahitungod sa akong kasinatian, ug ako nagpasalamat sa akong Langitnong Amahan alang sa kalipay sa pagtuo diha sa ebanghelyo.

Sa pag-abut nako sa balay, gigakos nako ang akong mama ug misulti kaniya mahitungod sa akong talagsaon nga kasinatian sa pagbati sa gugma sa Dios. Wala gayud Siya mibiya kanako ug sa kanunay nag-uban kanako, samtang Siya nag-uban sa matag usa kanato kon kita labing nagkinahanglan Kaniya. Mitambong ako sa institute sa akong tibuok panahon sa kolehiyo ug nakahimamat og daghang mga tawo kinsa nagpabilin nga akong maayo nga mga higala. Apan si Jesukristo mao ang atong labing maayo nga tinubdan sa gugma ug suporta, ug Siya dili gayud mobiya kanato nga mag-inusara.