Batan-ong mga Babaye
Ni Bonnie L. Oscarson
Kinatibuk-ang Presidente sa Young Women
Mosaad ako kaninyo batan-ong mga babaye nga samtang kamo maningkamot nga makaila sa mga sister sa inyong ward, sila mopanalangin sa inyong kinabuhi ug kamo mahimong usa ka panalangin ngadto kanila. Ambak uban ang duha ka tiil ug ipahibalo nga kamo andam nga mahimong aktibo nga miyembro sa usa sa pinakakaraan ug pinakadako nga organisasyon sa kababayen-an sa kalibutan. Mahinungdanon kamo nga bahin sa buhat sa kaluwasan sa ulahing mga adlaw, ug isip usa ka naghupot sa pakigsaad nga anak nga babaye sa inyong Langitnong Amahan, kamo andam sa pagbuhat sa inyong bahin sa pagtukod sa gingharian sa Dios dinhi sa yuta. Andama ang inyong kaugalingon aron makasinati og usa ka talagsaon nga butang.
Unsa ang Mahimo sa 18 Anyos nga mga Laurel?
Samtang kamo motan-aw sa palibut sa kwarto sa Relief Society nga puno sa mga sister sa lain-laing mga edad, pangutana, “Unsa ang akong makat-unan gikan niining talagsaon nga mga babaye?” Samtang inyong ablihan ang inyong mga hunahuna ug kasingkasing, kamo matingala sa panaghigalaay nga inyong mahimo uban sa mga sister nga mas magulang kaninyo apan kinsa adunay daghang maipakigbahin nga kasinatian ug kaalam.
Unsa ang Mahimo sa mga Lider sa Young Women?
Ang inyong kinaiya mahitungod sa pagkahimong aktibo nga miyembro sa Relief Society adunay dakong impluwensya kon unsay bation sa young women bahin niini sa inyong mga klase. Mahimo kamong mopakigbahin og personal nga mga kasinatian nga nagpakita kon sa unsang paagi kamo napanalanginan o sa unsang paagi nga ang kinabuhi sa uban napanalanginan pinaagi sa pag-apil sa Relief Society. Kinahanglan ninyong awhagon ug tabangan ang 18 anyos nga mga Laurel aron malipayong mo-uswag ngadto sa Relief Society.