Ang Kahayag sa Hingpit nga Adlaw
Ni Elder Larry R. Lawrence
Sa Seventy
Ang pagtipon og kahayag kutob sa atong mahimo mao ang yawe sa malampuson nga paglampos sa pagsulay sa mortal nga kinabuhi.
Paghulagway sa litrato © iStock/Thinkstock
Ikatingala ba ninyo nga mahibalo nga ang inyong kalampusan sa kinabuhi mag-agad kon unsa ka dako ang kahayag nga inyong maangkon samtang ania kamo dinhi? Ang kalampusan dili mahitungod sa unsa kadakong salapi ang inyong naangkon o pila ka medalya ang inyong nadaog o unsa kamo ka sikat. Ang tinuod nga tumong sa atong pagpakabuhi mao ang pag-angkon sa kahayag.
Ang atong mga pisikal nga lawas magkadako kon ato kining alimahon sa pagkaon. Ang atong mga espiritu magkahayag kon ato kining pakan-on og kahayag. “Ang Dios kahayag, ug diha kaniya wala gayuy kangitngit” (1 Juan 1:5). Ang atong Amahan sa Langit nga kaniadto usa ka mortal nga tawo kinsa hinay-hinay miuswag hangtud Siya nahimo nga usa ka binuhat uban sa kahingpitan sa kahayag. Ingon ana ang Iyang gusto alang kaninyo ug kanako tungod kay ang kahingpitan sa kahayag nagpasabut og hingpit sa kalipay.
Ang atong Langitnong Amahan nahigugma kanato sa hilabihan nga sa dihang mibiya kita sa atong kinabuhi sa wala pa dinhi sa yuta aron moanhi sa kalibutan, Siya mihatag sa matag usa nato og usa ka panamilit nga gasa: ang Kahayag ni Kristo, ang atong konsensya. Sigun sa gipahayag sa mga kasulatan, “Ang Espiritu naghatag og kahayag ngadto sa matag tawo nga mianhi nganhi sa kalibutan” (D&P 84:46).
Ang labing dakong tinguha sa Langitnong Amahan mao nga kita mosunod sa kahayag diin kita gipakatawo aron madawat nato ang dugang nga kahayag. Samtang kita magpadayon sa pagsunod sa kahayag nga hinatag sa atong Amahan ngari kanato, kita makadawat og dugang nga kahayag ug kita mas mahisama Kaniya.
Ang gasa sa Espiritu Santo—agig dugang ngadto sa kahayag diin kita gipakatawo—naghatag kanato og dakong bintaha. Usa kini sa labing talagsaong gasa nga atong madawat sa mortalidad tungod kay naghatag kini og dugang oportunidad alang sa pag-angkon sa kahayag ug kamatuoran. Kon wala ang Espiritu Santo, sama ra kita sa usa ka tawo nga hinayng naglakaw diha sa kangitngit paingon sa panimalay nga ispat lang ang nagsilbing giya. Sa dihang nadawat nato ang ebanghelyo ni Jesukristo ug nagpabunyag, gitanyagan kita og floodlight ug usa ka giya kinsa nasayud sa agianan. Karon mas paspas na kitang makalakaw ug makakita sa atong agianan atol sa atong panaw padulong sa panimalay.
Naglambo diha sa Kahayag
“Kana nga gikan sa Dios mao ang kahayag; ug siya nga nakadawat sa kahayag, ug magpadayon diha sa Dios, makadawat og labaw pa nga kahayag; ug kana nga kahayag mag-anam og labaw kahayag ug labaw sa kahayag hangtud sa hingpit nga adlaw.” (D&P 50:24).
Kini nga bersikulo hingpit nga minubo sa atong katuyoan dinhi sa yuta. Ang mahangturong kalamboan nagpasabut lamang sa naglambo diha sa kahayag. Samtang ang atong mga espiritu magkahayag ug magkahayag pa, kita naglihok ngadto niana nga “hingpit nga adlaw” kon kita mahimong sama sa Dios ug uban sa Dios.
Paghulagway sa litrato sa Bountiful Utah Temple pinaagi ni David Stoker
Hunahunaa kini nga konsepto sa kahayag sa sunod higayon nga motambong kamo og sesyon sa endowment didto sa templo. Kamo magsugod sa usa ka dili kaayo hayag nga kwarto. Samtang madugangan ang inyong kahibalo, ang kwarto mahimong mas hayag. Sa katapusan ang inyong panaw sa kahayag modala kaninyo ngadto sa mahimayaong kwarto nga celestial. Ang atong kasinatian sulod sa templo mao ang simbolo sa atong panaw dinhi sa yuta. Mga butang magkahayag ug magkahayag pa hangtud sa katapusan makasulod kita pag-usab sa presensya sa Ginoo.
Naghingapin nga kahayag mao ang kinaiya sa matag nabanhaw nga celestial nga binuhat. Dihang si anghel Moroni nagpakita ni Joseph Smith sa iyang kwarto, ang batan-ong propeta nakaobserbar sa mga anghel nga ang ilang “panagway [mao] tinuod sama sa kilat” (Joseph Smith—Kasaysayan 1:32). Si Mateo migamit sa sama nga mga pulong nga naghulagway sa mga anghel didto sa lubnganan sa Ginoo, nagrekord nga ang ilang “dagway sama sa kilat” (Mateo 28:3 [tan-awa usab sa Hubad ni Joseph Smith, Mateo 28:3, footnote og]).
Kon moabut na kining panahon alang sa matag usa kanato nga mabanhaw, unsaon pag-ila sa Ginoo kon kita modawat sa telestial nga lawas, usa ka terrestrial, o usa ka celestial nga lawas? Ang tubag mas sayon pa kaysa inyong mahunahunaan. Kon kita nakatigum og igong celestial nga kahayag sa atong mga espiritu, kita mabanhaw nga may celestial nga mga lawas. Kon kita nakatigum lang og igong kahayag aron mokwalipay alang sa terrestrial o telestial nga mga lawas, mao kana ang himaya nga atong madawat sa Pagkabanhaw.
Ang Doktrina ug mga Pakigsaad mipasabut:
“Ang inyong himaya mao kana nga himaya diin ang inyong mga lawas gipabuhi.
“Kamo kinsa gipabuhi pinaagi sa usa ka bahin sa celestial nga himaya makadawat unya sa mao gihapon, gani sa kahingpitan” (D&P 88:28–29).
Hangtud nga magpabilin kita sa higpit ug pig-ot nga dalan, naningkamot sa pagsunod sa mga sugo ug sa pagpalambo sa atong kaugalingon, kita nagtigum og kahayag. Apan unsa ang mahitabo kon kita nahisalaag gikan sa dalan ug molapas sa mga sugo? Unsa ang mahitabo sa atong kahayag?
Ang mga kasulatan miklaro kabahin niini: “Siya nga dili maghinulsol, gikan kaniya pagakuhaon bisan ang kahayag nga siya nakadawat” (D&P 1:33; empasis gidugang). Sa laing pagkasulti, samtang ang ubang mga tawo nag-angkon sa kahayag, ang uban nawad-an niini. Si Satanas makapawala sa kahayag sa higayon nga kita mosupak sa kamatuoran (tan-awa sa D&P 93:39).
Ang importante nga butang nga ipangutana mao nga, unsaon nato nga makabaton og dugang nga kahayag aron kini “mag-anam og labaw kahayag ug labaw sa kahayag” sulod kanato? Mosugyot ko og lima ka mga paagi.
Higugmaa ang Uban
Usa sa labing maayo nga paagi sa pag-angkon sa kahayag mao ang pagkat-on sa paghigugma sama sa paghigugma sa atong Amahan sa Langit. Mitawag kita niining matang sa gugma nga gugmang putli. Si Mormon nag-awhag kanato sa “pag-ampo ngadto sa Amahan uban sa tibuok kusog sa kasingkasing, nga kamo unta mapuno niini nga gugma” (Moroni 7:48) Ang gugma daling makahatag og dugang nga kahayag sa atong mga espiritu; ang panagbingkil ug kasina makapawagtang sa kahayag.
Hinumdumi, ang unang sugo mao ang paghigugma sa Ginoo uban sa tibuok natong kasingkasing, kalag, ug hunahuna (tan-awa sa Mateo 22:37–38). Ang ganti sa paghigugma sa Dios ug sa pagbutang Kaniya nga una sa atong kinabuhi dako kaayo. Si Jesus mitudlo, “Kon ang inyong katuyoan usa ngadto sa akong himaya, inyong tibuok kalawasan mapuno sa kahayag” (D&P 88:67; empasis gidugang).
Ang ikaduhang dakong sugo mao ang paghigugma sa uban sama sa paghigugma sa atong kaugalingon (tan-awa sa Mateo 22:39). Mahimong mas lisud kining buhaton tungod kay ang atong mga silingan dili hingpit. Ang tinuod nga sekreto sa pagkat-on sa paghigugma sa uban makaplagan diha sa pagserbisyo kanila. Mao nga kini ingon og natural nga mohigugma kita sa atong mga anak, bisan og sila layo ra sa pagkahingpit.
Magkadako ang inyong pagserbisyo, mas madugangan ang inyong gugma, ug kon magkadako ang inyong gugma, mas madugangan ang kahayag nga inyong madawat. Ang mga misyonaryo—tigulang ug batan-on—nakapalambo og kasanag sa ilang kaugalingon nga makita sa uban. Ang full-time nga pagserbisyo gigantihan og daghang mga espirituhanong kahayag.
Pagtuon sa mga Kasulatan
Walay shortcut sa pagkat-on sa kamatuoran. Kinahanglang mopundar kamo og panahon sa pagbasa sa mga kasulatan ug sa mga pagtulun-an sa mga propeta. Kon gusto kamo nga molambo sa espirituhanong paagi, kinahanglan inyong pakan-on ang inyong espiritu pinaagi sa pagbusog sa pulong sa matag adlaw. Sumala sa Doktrina ug mga Pakigsaad, ang kamatuoran mao ang laing pangalan alang sa kahayag (tan-awa sa D&P 84:45).
Sa dili pa ninyo ablihan ang inyong mga kasulatan matag adlaw, pag-ampo nga kamo makakat-on og bag-ong butang aron ikadugang sa kahayag sa inyong espiritu. Dayon pangitaa ang bag-ong mga panabut ug pagsabut. Pangutan-a usab ang inyong kaugalingon, “Sa unsang paagi nga kining mga butang nga akong gibasa magamit sa akong kinabuhi?” Kinahanglan andam kamong mopundar og panahon kon gusto kamong makaangkon og dugang nga kahayag.
Usa ka may kalabutan nga mga tinubdan sa kahayag ngadto sa atong espiritu makita diha sa pagmemorya sa mga kasulatan. Si Elder Richard G. Scott (1928–2015) sa Korum sa Napulog Duha ka mga Apostoles miingon, “Ang mga kasulatan susama sa gagmayng kahayag nga modan-ag sa atong hunahuna” ug kanang “talagsaong gahum moabut gikan sa pagmemorya og mga kasulatan.”1 Ang pagmemorya sa mga kasulatan mahimong usa ka gasa nga imong mahatag sa imong kaugalingon—gasa nga magpadayon sa paghatag og dugang nga kahayag.
Pagsunod sa mga Kasugoan
Samtang kamo nagkaplag sa mga sugo diha sa mga kasulatan, lakaw ug buhata kini. Sama pananglit, kon magbasa kamo sa balaan nga tambag sa “mopahulay sa higdaanan og sayo” ug “bangon og sayo” (D&P 88:124), maayo gayud nga inyong sundon. Kon kamo nagbasa sa Doktrina ug mga Pakigsaad ug makasugat sa sugo nga “Dili kamo magsulti og dautan sa inyong silingan” (D&P 42:27), nan maayo gayud nga imong bantayan ang imong ipanulti sugod karon. Samtang kamo nagkat-on sa kamatuoran, kinahanglan inyo kining gamiton aron makatigum kamo og kahayag.
Kon kamo makabaton sa kahayag apan dili mogamit niini, mahimong mawala kini kaninyo.
Patalinghugi ang Espiritu Santo
Ang pagpatalinghug sa Espiritu mao ang usa ka paagi nga si Presidente Thomas S. Monson nakaangkon og dako nga kahayag. Nakat-unan niya ang pagsunod sa mga pag-aghat ug mga impresyon nga moabut kaniya. Ang mga kasulatan nagtudlo, “Matag usa nga nagpatalinghug ngadto sa tingog sa Espiritu moduol ngadto sa Dios” (D&P 84:47).
Kon naglaum kamo sa espirituhanong mga pag-aghat, moabut ra kini. Kon mobuhat kamo niini, kamo makadawat og dugang. Kon ang Espiritu Santo nagsugo kanimo sa pagbuhat og usa ka butang nga lisud (sama sa paghunong sa bati nga kinaiya), ug kamo naminaw ug misunod sa pag-aghat, inyong masinati ang pagsulbong sa espirituhanong paglambo ug usa ka dakong pagsaka sa kahayag.
Pagserbisyo Diha Sa Templo
Kon atong hunahunaon ang mga templo sa Ginoo, atong mahunahunaan ang kahayag sa natural nga paagi. Sama pananglit, hunahunaa unsay gisulat ni Propeta Joseph Smith mahitungod sa pagpahinungod sa Templo sa Kirtland niadtong 1836: “Ang mga tawo sa kasilinganan miabut nga nagdagan (nakadungog og dili kasagaran nga tingog sa sulod, ug nagtan-aw sa usa ka suwaw nga kahayag sama sa usa ka dako nga gilis sa kalayo nga anaa diha Templo).”2
Adunay hilabihan nga kahayag ug kamatuoran nga naangkon gikan sa mga tulumanon sa templo nga sa templo mahimo nga gipasabut nga Unibersidad sa Ginoo. Ang kahayag sa templo mas nakahatag og dugang nga benepisyo ngadto sa inyong espiritu kay sa hayag sa adlaw diha sa inyong kalawasan. Isipa ang inyong kaugalingon nga bulahan kon kamo makahimo sa magtagbaw niining langitnong kahayag sa regular nga paagi.
Magmahimong usa ka Kahayag
Matag templo, matag chapel, matag opisina sa misyon, matag panimalay sa mga Santos sa ulahing mga adlaw, ug ang matag miyembro sa Simbahan kinahanglang mahimong usa ka kahayag ngadto sa kalibutan. Sama sa gipahinumdom ni Pedro ngadto sa mga Santos sa iyang panahon, ang Dios “nagtawag kaninyo gikan sa kangitngit ngadto sa iyang katingalahang kahayag” (1 Pedro 2:9).
Nga kita mogahin sa atong tibuok kinabuhi sa pagtigum og daghang kahayag kutob sa mahimo sa atong mga espiritu mao ang akong pag-ampo. Nga ang pagbuhat sa ingon mao ang yawe sa malampuson nga pagpasar sa pagsulay sa mortal nga kinabuhi mao ang akong pagpamatuod. Nga kita makaangkon og kahayag pinaagi sa pagsunod sa mga sugyot sa ibabaw mao ang akong pagsaksi.