Me Tiki ni Noda Bula na Koniferedi

Tabana e 86: E tukuna o Peresitedi Thomas S. Monson e dua na tikina mai na Alice’s Adventures in Wonderland me vakaraitaka kina na bibi ni vakatulewa. A vakayaloqaqataki keda meda digitaka na dodonu, ena gauna mada ga ke dredre sara na kena sala. Mo dou veivosaki vakamatavuvale, me baleta na dredre ni vakatulewa e sotavi tiko. Na cava o rawa ni cakava mo dou veivukei kina me digitaki na dodonu? Me itaviqaravi, droinitaka e dua na isasabai ni DND (CTR) ena posita ka vola kina na nomuni vakasama. Mo qai vakaliliga ena vanua mera raica vakawasoma tiko kina na lewe ni matavuvale.

Tabana e 101: A vakamacalataka o Peresitedi Dieter F. Uchtdorf, Karua ni Daunivakasala ena Mataveiliutaki Taumada, e dua na siti mai Jamani a vakarusai ena ivalu ka taravou tale ka caka me totoka tale. A vakavulica o Peresitedi Uchtdorf ni gauna eda bula kavoro kina, sa rawa vua na iVakabula kei na Tamada Vakalomalagi me buli keda vou. Na ivakaraitaki cava era sa raica na lewe ni nomu matavuvale me baleta e dua na ka sa kavoro sa mai yaco me totoka ka kaukauwa tale? Sa rawa mo wasea na nomu ivakadinadina baleta na Veisorovaki i Jisu Karisito vei ira na luvemu.

Tabana e 53: E vakayaloqaqataki keda o Elder Mervyn B. Arnold ena Vitusagavulu meda “gole ka laki veivueti” ena noda dodoliga yani vei ira na luluqa vakalotu kei na itokani sega ni lewenilotu. Vakasamataka vakamatavuvale, na sala mo dou dodoliga yani kivei ira sa sega tu ni mai lotu vakabalavu se sega ni lewenilotu. Na cava o rawa ni cakava mo wasea na kosipeli vei ira na tamata? Vakasamataka e dua na sala marautaki me caka kina e dua na ituvatuva ni kaulotu ni matavuvale ena kena lalawa, e rawarawa ka rawa me vakayacori.

Tabana e 13: Sa sureti keda tu o Sisita Linda Burton, na peresitedi raraba ni iSoqosoqo ni Veivukei, meda vakasamataka ena masumasu na sala meda vukei ira kina na ise ni valu ena noda itikotiko. Mo ni sikova vakamatavuvale na IWasaStranger.lds.org ka sarava na vidio “I Was A Stranger: Love One Another.” Na cava eso na ka me na cakava na nomu matavuvale mera qaravi kina na neiba era tiko leqa?

Tabana e 86: E kaya kina o Peresitedi Thomas S. Monson, “Na katuba ni itukutuku ni veigauna e tadola ena iji lalai, sa vakakina na bula ni tamata.” A kaya talega, “Na salatu eda muria ena bula oqo e veimuataki ki na keda icavacava ena bula e tarava.” Vakasamataka mada na digidigi cecere sa yaco tiko mai ena nomu bula. Raitayaloyalotaka mada na vanua ena kauti iko kina na digidigi oqori, ka vola na vakasama kei na nanuma e yaco mai vei iko.

Tabana e 46: A kaya o Elder Ronald A. Rasband ena Kuoramu ni iApositolo Le Tinikarua,“A tekivu na Vakalesui mai ni kosipeli mai vua e dua na cauravou, o Josefa Simici, ni a taroga e dua na ka.” E kaya o Elder Rasband ni taro sa tukuna tiko ni gadrevi na vuli, vakuri na noda ivakadinadina, ka “mo dou toso ki liu ka tudei vei Karisito” (2 Nifai 31:20). Mo taro vua na Kalou ena masu, vulica na ivolanikalou kei na vosa mai na koniferedi raraba, ka raica ka rogoca sara vakavinaka na isau ni taro.

Tabana e 10: O sa bau rere mada se galili? A wasea o Sisita Neill F. Marriott, ikarua ni daunivakasala ena mataveiliutaki raraba ni Goneyalewa, na cava a yaco ni sa vakarau vakamau sara tu ga. A yawa sara mai vale o koya ka me na laki tiko mada vua e dua na wekai watina me na vakamautaka ka se bera mada ni sotava. Ni yaco yani ena vale nei weka o ya, a kaya o Sisita Marriott, “A dola mai na katuba … sa tu mai o Nei Carol, a sega tale ni vosa, ka mokoti au mai.” Sa takali tani e kea na nona rere. “Na loloma sa dau vagalalataka na nomu bula ena vukuna e dua tale,” a kaya o koya. E dua beka mo na vagalalataki iko tiko kina?

Tabana e 70: A vakavulica o Baraca Stephen W. Owen, peresitedi raraba ni Cauravou, ni da sa iliuliu ka italai talega. A wasea na gauna a sotava kina e dua na ilawalawa cauravou era veitokoni ka veivakayaloqaqataki vakai ira ena nodra kuoramu. A kaya, “Na veiliutaki sa ivakaraitaki ni bula vakatisaipeli—sa kena usutu ga na nodra vukei na tamata mera gole vua na Karisito.” Digitaka e dua ena macawa oqo o na vukea me gole vua na Karisito.

Tabana e 101: Vinakata beka me kua ni malumalumu mai na nomu vakabauta? E vakavulica o Peresitedi Dieter F. Uchtdorf, iKarua ni Daunivakasala ena Mataveiliutaki Taumada, ni talairawarawa ga sa kena isau! “Na talairawarawa sa drabula ni noda vakabauta,” a kaya. “Ena talairawarawa ga eda na cilava na yaloda ena rarama.” Vakasamataka mada e dua na gauna ko a muria kina na vosa ni Turaga dina ga ni a dredre sara. A qaqaco vakacava nomu vakabauta ena nomu talairawarawa ka vukea mo raica na veika o sa vakaituvakitaki tu kina?.

Tabana e 23, 59, kei na 105: O Sisita Mary R. Durham, na ikarua ni daunivakasala ena mataveiliutaki raraba ni Lalai se qai vagalalataki oti ga, e kaya ni Yalo Tabu sa dua na “ivurevure vakalou ni kaukauwa.” Wilika na nona vosa kei na nodrau vosa o Elder David A. Bednar kei Elder Robert D. Hales ena Kuoramu ni iApositolo Le Tinikarua. Raica matua na vuqa ni nona ilesilesi e dau vakayacora na Yalo Tabu kei na sala ena vakalougatataki iko kina. Mo lalawataka mo veisautaka e dua na ka ena nomu bula mo kilikili kina ena Nona veivakauqeti.

Tabana e 26 kei na 124: Mo vakatarogi iko mada ena taro a taroga o Elder Donald L. Hallstrom ena Mataveiliutaki ni Vitusagavulu: “Ni dau yaco na veika dredre ena noda bula, na cava sara eda dau cakava? O dau veilecayaki se vakatitiqa se luluqa beka vakayalo? Sa voroka beka na noda vakabauta? Eda na beitaka beka na Kalou se tamata ena veika sa yaco vei keda? Se eda na nanuma sara vakatotolo … ni da sa luvena na Kalou sa dauloloma?” E kaya o Elder Jeffrey R. Holland ena Kuoramu ni iApositolo Le Tinikarua, “Na imatai ni ka dina cecere ni veigauna tawamudu o ya ni Kalou e lomani keda ena taucoko ni yalona, igu, vakasama, kei na kaukauwa.” Ena veivuke vakacava na vaqaqacotaki ni nomu ivakadinadina baleta na loloma ni Kalou vei iko mo vosota rawa na veika dredre?

Tabana e 86: E kaya o Peresitedi Thomas S. Monson ni gauna eda vakasamataka tiko noda vakatulewa ena veisiga, “ke da na digitaki Karisito, eda sa digidigi donu tiko.” Na itovo vakalotu cava mo na vakatorocaketaka se vakaqaqacotaka ki na nomu bula kei na nomu matavuvale me na usutu tiko ga na Karisito ena nomu digidigi?

Tabana e 81 kei na 93: E rau vakayaloqaqataki ira na tama o Peresitedi Henry B. Eyring, Matai ni Daunivakasala ena Mataveiliutaki Taumada, kei Elder D. Todd Christofferson ena Kuoramu ni iApositolo Le Tinikarua mera cakava na veisau e gadrevi mera liutaki ira kina nodra matavuvale ki na matanitu vakasilesitieli. Ni ko dua na tama, na cava o rawa ni cakava, mai na vosa nei Elder Christofferson, mo “vakaraitaka vakavinaka cake vua na Kalou na nomu yalodina ena bula ni veisiga”?

Tabana e 77: Ni da bulataka na loloma, ena bula qaqa mada ga na matavuvale e dau sotava tu na bolebole lelevu, e kaya vaqori o Peresitedi Dieter F. Uchtdorf, Karua ni Daunivakasala ena Mataveiliutaki Taumada. “Se cava sara na leqa e sotava tiko na nomu matavuvale, kei na cava mo cakava mo walia kina,” a tomana “na itekivu kei na itinitini ni kena iwali na loloma ga.” Ena nomu matavuvale, sa rawa mo veivakasalataki vakaivolanikalou “dou masuta na Tamada … me vakasinaiti kemudou ena loloma oqo” (Moronai 7:48).

Tabana e 63: E kaya o Elder M. Russell Ballard ena Kuoramu ni iApositolo Le Tinikarua ni matabose ni matavuvale caka wasoma “ena valuta na ravuravu ni tekinolaji nikua ka dau vagolei keda tani mai na gauna dodonu vakai keda ka dau kauta mai na veika butobuto ki na noda itikotiko.” Sa rawa mo tauyavutaka ena nomu matavuvale e va na mataqali matabose ni matavuvale a vakatura o Elder Ballard “ka na vukei keda meda gugumatua cake ka marautaka noda veimaliwai vakamareqeti.”