Sisita Jean B. Bingham

Ena voleka ni ono na yabaki, sa dau taleitaka o Sisita Jean Barrus Bingham na qarava nona ilesilesi ena matabose raraba ni Lalai. E dau sikova nodra itikotiko na lewenilotu ka tiko ena Lalai, ka vakadinadinataka nodra vakabauta kaukauwa na Yalododonu Edaidai—vakauasivi o ira na gone ena Lalai—e vuravura raraba.

O Sisita Bingham, ka se qai tokoni walega me imatai ni daunivakasala ena mataveiliutaki raraba ni Lalai, sa vakayagataka e levu na gauna ni nona bula ena veivakavulici, veisusu, ka lomani ira na gonelalai. Se vei iratou na tacina ni ratou tubu cake tiko, oi rau na luvena yalewa e lewe rua, luvena yalewa vakube, maukubuna, vulagi mai nodratou vale, se o ira a sotavi ira ni lewena voli na matabose raraba ni Lalai, sa dau vakasala ka ivurevure ni kaukauwa vei ira e vuqa.

E kaya o koya “Na gone yadua e vakasakiti na kedra inaki, kevaka eda raici ira ena matana na Tamada Vakalomalagi, ena rawa ni da vukei ira me ra vaka na veika kece e buli ira kina ko Koya.”

A sucu ena 10 ni June, 1952, mai Provo e Utah, Amerika, vei rau o Edith Joy Clark kei Robert Rowland Barrus, e ikatolu o Sisita Bingham vei ira e ciwa na gone. Ni se qai vula tolu eratou, sa toki nona matavuvale ki Indiana me laki vuli tale na tamana. Ena imatai ni ono na yabaki ni nona bula, eratou a vakaitikotiko o Sisita Bingham kei na nona matavuvale ena va na yasana.

Ni oti nona vuli torocake mai New Jersey, a toki o Sisita Bingham ki Provo, Utah, me vuli ena Brigham Young University. Ena ikarua ni nona yabaki e kea, a sota kei koya me rau qai veiwatini e muri, o Bruce Bryan Bingham, na gonetagane ena vanua ni teitei mai Illinois ka a papitaiso ni yabaki tinivakacaca kei rau nona itubutubu. Erau a vakamau ena 22 ni Tiseba, 1972, ena Valetabu e Provo Utah.

Nona veiqaravi ena Lotu ena nona bula e oka kina na peresitedi ni Lalai ena tabanalevu, peresitedi ni Goneyalewa, daunivakasala ena dua na mataveiliutaki ni iSoqosoqo ni Veivukei, peresitedi ni Goneyalewa ena iteki, liganicakacaka ni valetabu, ka qasenivuli ni semineri ena mataka lailai.

“Na ivakarau au raica ena nona bula, ena loma ni 43 na yabaki ni neirau bula vakawati, sa dau vakarorogo tudei ka cakava na veivakauqeti ni Yalo,” e kaya o Baraca Bingham me baleta na watina. “Sa dau cakava e veigauna na veika e vinakata na Turaga na watina me cakava.”