Elder Massimo de Feo

Ni voleka toka me taura nona veikacivi ni kaulotu tudei, a vulica o Elder Massimo De Feo na veilesoni bibi ni solibula kei na loloma mai vei tamana, o Vittorio De Feo.

E vica toka ga na nodratou ivurevure vakailavo na matavuvale na De Feo, ka rau sega ruarua ni lewe ni Lotu o Vittorio kei na watina o Velia. Ia erau rokova na De Feo na nona gagadre na luvedrau tagane me wasea na kosipeli.

“A tarogi au na tamaqu, ‘O vinakata dina mo cakava na ka oqo?’” e nanuma lesu o Elder De Feo. “Au kaya, ‘Io, au vinakata mai vuniyaloqu meu qarava na Turaga.’”

A yalataka o Vittorio ni na cakava na ka taucoko e rawata me sauma kina na isau ni rua na yabaki ni nona veiqaravi na luvena ena Tabana ni Kaulotu na Italy Rome.

“Au raica na bibi ni ilavo oya—ni vua ni solibula cecere mai vua e dua na turaga ka sega ni vakabauta na Lotu,” e kaya o Elder De Feo. “O koya au solia kina na yaloqu, noqu kaukauwa, vakasama, kei na igu taucoko ena noqu veiqaravi vakaulotu baleta niu lomana na Turaga ka lomana na tamaqu.”

Era sa veivuke ena nona vakamacalataki o Elder De Feo na ivakavuvuli eso ni kosipeli me vaka na cakacaka vakaukauwa, matavuvale, kei na veiqaravi.

A sucu mai Taranto, Italy, ena 14 ni Tiseba, 1960, a vulica me baleta na Lotu o Massimo De Feo ni yabaki ciwa ena nodrau tukituki ena katuba ni nona vale e rua na daukaulotu. Sega ni dede rau sa papitaiso o Massimo kei tuakana o Alberto.

Erau dau marautaka na cauravou na De Feo na nodra loloma kei na veitokoni na iliuliu yalodina ni tabana ni rau dau lakova na Lalai kei na, e muri, na Muavata. A bukia talega o Massimo na isema vakaveitokani ni bula taucoko kei ira na itabagone tale eso ena tabana—okati kina o Loredana Galeandro ka rau saumaki vata mai, ka rau qai vakamau ni oti mai nona kaulotu. Erau a vakamau ena 14 ni Okosita, 1984, ena Valetabu na Bern Switzerland. E tolu na luvedra na veiwatini na De Feos.

Ni se bera ni yaco me Vitusagavulu Vakaitutu Raraba, a vakaitikotiko mai Roma o Elder De Feo ka cakacaka ena sivia ni 30 na yabaki ena Tabacakacaka ni Yasana kei Amerika. Sa veiqaravi oti o koya vakaperesitedi ni tabana, peresitedi ni tikina, peresitedi ni iteki, kei na Vitusagavulu ni iWasewase.