Veisautaki Na Vulici kei na Vakavulici ni Kosipeli

Vulica, bulataka, ka vakavulica na kosipeli era sa bibi sara ena noda tubu yadua ka ra tiki bibi sara ni noda sokalou ena Siga ni Vakacecegu. Me tiki ni sasaga ena nodra vukei na lewenilotu me ra tubu ena nodra taracake na vakabauta na Tamada Vakalomalagi kei Jisu Karisito ka vakavinakataka cake na sokalou ena Siga ni Vakacecegu, era sa tauyavutaka kina na Mataveiliutaki Taumada kei na Kuoramu ni iApositolo Le Tinikarua ena soqoni ni veiliutaki ena koniferedi raraba e dua na sasaga vou me vakavinakataki cake na vakavulici kei na vulici ni kosipeli. Ni sa sureti kina na lewenilotu:

1. Taura na ivakavuvuli ena Veivakavulici ena iVakarau ni iVakabula. Na ivolavakarau vou oqo e vakanamata ena ivakavuvuli rawarawa ia e mana a vakayagataka o Qasenivuli Levu. Na takete ni qasenivuli taucoko me vaka e tukuni ena ivolavakarau, oya “mera vakatavulica na ivunau savasava duadua ni kosipeli, ena Yalotabu, me rawa ni ra vukei kina na luve ni Kalou ena taraicake ni nodra vakabauta kivua na iVakabula ka vakataki Koya vakalevu cake.”

E dina ni inaki ni ivolavakarau me baleti ira era kacivi me ra veivakavulici, eda na raica na tamata kecega ni yaga sara ena kena vulici na veivakavulici ena ivakarau ni iVakabula. Ena yaga vei ira na itubutubu me ra vakayagataka na ivakavuvuli ena loma ni ivolalailai ni ra veivakavulici e vale.

2. Vakaitavi ena soqoni ni matabose ni qasenivuli. Na soqoni ni matabose ni qasenivuli era sega ni tautauvata kei na vuli ni nodra vakavinakataki cake na qasenivuli dau caka e liu. Ni ra matabose, ena vakarautaki ena veisoqoni oqo na madigi vei ira na qasenivuli me ra veivosakitaka ka veivakavulici ena ivakavuvuli ni Veivakavulici ena iVakarau ni iVakabula. Na soqoni oqo me dau vakayacori vakadua e veivula ena gauna ni soqoni tolu na auwa ena Sigatabu, ena vakayacori e vuravura raraba ena 2016 taucoko.

3. Dau vulica vagumatua na kosipeli. Era sa vakayaloqaqataki vata na qasenivuli kei na lewenilotu me ra dau vulica vagumatua na kosipeli mai vale. Ni vulici ka bulataki na kosipeli ena loma ni macawa ena vakarautaki keda na lewenilotu me da vakaitavi ena lesoni ni Sigatabu, ka rawa ni vakavuna na gauna momona ni vuli vakaibalebale vei keda kece.

Ni da luvena na Tamada Vakalomalagi, e rawa ni da yaco kece me da vakataki Koya. Na tamata yadua e yalona me vulica ka bulataka na kosipeli e rawa ni yaco me vakataki rau na itubutubu vakalomalagi vakalevu cake ka lesu ka laki bula vata kei rau. Na sokalou ena lotu vakakina mai vale ena vukea noda tara cake na mataqali vakabauta vakakoya vua na Tamada Vakalomalagi kei Jisu Karisito.