Elder W. Mark Bassett

Ena vulaikatakata kece ni se gonetagane lailai, ena dau lako o W. Mark Bassett kei na nona matavuvale mai na nodratou itikotiko e Sacramento, California, Amerika, me ratou laki sikova nona bubu mai vei tinana e Alabama, Amerika. Ena veisiga ni ratou lako tiko ki kea, eratou dau raica me ratou sikova na veivanua kilai ena itukutuku ni Lotu.

Eratou sikova tiko na veivanua kilai ena itukutuku makawa e Nauvoo, Illinois, se ratou taubale curuma na Veikau Tabu e Palmyra, New York, e dau nanuma o Elder Bassett na veika mana e dau vakila—ni se gonetagane lailai sara mada ga—ni sikova na veivanua tabu oya.

“Keitou dau vakila e kea eso na ka,” e kaya o koya. “Oqori na ivakarau a tarai cake kina noqu ivakadinadina, mai na veika lalai au sotava.”

Na ivakadinadina oya a rawati ni se cauravou gone sa ivurevure ni kaukauwa ena bula taucoko nei Elder Bassett.

A sucu ena 14 ni Okosita, 1966, vei rau o Edwina Acker kei William Lynn Bassett, mai Carmichael, California, e ikarua o Elder Bassett vei iratou e lima na gone. Era sa rui ka bibi sara ki na nona matavuvale na veiqaravi ena Lotu kei na bulataki ni kosipeli.

Ni oti nona veiqaravi ena Tabana ni Kaulotu na Guatemala Guatemala City mai na 1985 ki na 1987, a toki o Elder Bassett ki Provo, Utah, me laki vuli ena Brigham Young University. A vakamautaki Angela Brasher ena Valetabu e Salt Lake ena 20 ni Tiseba, 1989. Erau nodratou itubutubu e lima na gone ka rua na makubudrau.

Ena 1991, a rawata o Elder Bassett e dua na diqiri ni daunivika mai BYU ka qai toki vata kei na nona matavuvale ki na yasayasa vaka-Sacramento me laki cakacaka ena vanua ni volitaki yaya vakaidini umauma. A cakacaka vakadauniyau ena Brasher’s Sacramento Auto Auction ka vakailesilesi liu ena tabana vakailavo ka itokani itaukei ni West Coast Auto Auctions, Inc., ka dau volitaki motoka kina ena ra kei Amerika raraba.

Sa veiqaravi vakalevu ena Lotu o Elder Bassett, okati kina na peresitedi ni cauravou, bisopi, lewe ni matabose e cake, peresitedi ni iteki, peresitedi ni Tabana ni Kaulotu na Arizona Mesa Mission mai na 2007 ki na 2010, ka Vitusagavulu ni iWasewase.