Atong mga Panimalay, Atong mga Pamilya
Nagpuasa ug Nag-ampo alang ni Emma
Ang tagsulat nagpuyo sa Capital Region sa Denmark.
Human nahulog ang akong anak nga babaye sa bintana, naghunahuna ko nga ang labi namong gikahadlukan natinuod.
Image © iStock/Thinkstock
Bag-o lang nauli ang akong pamilya gikan sa usa ka nindot nga bakasyon. Human sa panihapon gitugutan nako ang among duha ka anak, ang kwatro anyos nga si Markus ug ang tres anyos nga si Emma, nga magdula didto sa higdaanan sa taas nga bahin sa among ikaupat nga andana nga apartment. Sa Denmark, ang mga bintana abli sama sa mga salimbong [shutter]. Ang mga bintana sa kasagaran gitrangkahan, apan giablihan ni namo og gamay atol sa among bakasyon aron dunay hangin nga makasulod sa apartment atol sa among biyahe.
Samtang nanghugas ko sa plato, kalit lang nga gibati nako nga dunay ngil-ad nga nahitabo. Midagan ko paingon sa sala samtang si Markus nagdagan pakanaug sa hagdanan. Nagsiyagit siya sa kahadlok, nga nag-ingon nga nahulog si Emma sa bintana—usa ka bintana nga mga 40 ka pye (12 m) ibabaw sa sementado nga agianan. Midagan ko pakanaug sa hagdanan, mibalik-balik og siyagit sa ngalan ni Emma. Nakita nako ang akong gamayng anak nga nagbuy-od sa semento nga ingon og wala nay kinabuhi. Nagtuay na lang gayud siya sa dihang ako siyang gialsa, ug naghunahuna ko nga ang labi nakong gikahadlukan nakumpirmar. Ang akong bana, nga misunod nako sa gawas, mikugos kaniya ug mihatag dayon kaniya og panalangin sa priesthood.
Miabut dayon ang ambulansya, ug si Markus ug ako nag-ampo samtang gitabang si Emma sa mga paramedics. Sa wala madugay diha na kaming tanan sa ambulansya paingon sa ospital.
Sa intensive care unit miapil dayon namo ang mga sakop sa pamilya nga miabut aron mosuporta namo. Mipauli si Markus uban sa iyang mga ig-agaw, samtang ang akong bana ug ako nagpabilin, nga wala masayud kon unsay kondisyon ni Emma.
Human sa dugay nga pagpaabut, sa katapusan usa sa mga doktor ang misulod, nga nangutana sa mga detalye bahin sa aksidente. Miingon sila nga kasagaran ang pagkatagak sa ingon kataas moresulta unta og mga kadaut sa sulod sa lawas ug gamay lamang nga tsansa nga mabuhi. Dunay kadaut sa bat-ang ni Emma ug sa iyang ulo, apan ang iyang samad naa ra sa ibabaw. Miingon ang doktor nga basin dunay anghel nga misalo kaniya.
Bisan tuod nga ang pagkaluwas ni Emma usa ka milagro, wala gihapon siyay panimuot tungod sa kadaut diha sa ulo. Ang akong bana ug duha ka suod nga mga higala nangalagad pag-usab ni Emma. Niana nga panalangin gisaaran siya og hingpit nga pagkaayo nga walay bisan unsa nga malungtarong mga problema ug nga mahimo kining usa ka positibo nga kasinatian sa iyang kinabuhi. Mibati ko og labihan nga pasalamat alang sa gahum sa priesthood. Ang tanan nakong mga pangamuyo sa tibuok gabii natubag.
Naulian si Emma sa iyang pagka-coma paglabay sa upat ka adlaw. Atol niadtong upat ka adlaw, ang mga higala, mga miyembro sa Simbahan, ug uban pa nagpuasa ug nag-ampo alang niya. Gibati nako nga ang mga pag-ampo sa matinud-anong mga Santos milibut nako, nga naglig-on sa akong pamilya ug nako. Gibati nako nga morag ang Langitnong Amahan migakos kanako ug mipuno kanako og kahupayan.
Ang among stake mipahigayon og pagpuasa sa adlaw sa wala pa siya nakamata. Nagtuo kami nga gidungog sa Langitnong Amahan ang among mga pag-ampo ug nga ang pagkamata ni Emma usa ka direkta nga resulta sa pagpuasa. Gikan nianang higayuna paspas ang pagkaayo ni Emma. Lima ka adlaw human niana nalitok niya ang iyang unang pulong sukad sa aksidente, ug siyam ka adlaw human niana gipagawas na siya sa ospital. Migahin siya og lima ka semana diha sa wheelchair ug dayon gisugdan ang physical therapy.
Mga usa ka bulan human sa aksidente, kalit lang nga misakit ang akong likod tungod sa pag-alsa kang Emma. Usa ka pagbati nga walay mahimo dili lamang sa pisikal apan sa espiritwal usab ang miabut ngari kanako. Unsaon man nako sa pagpadayon og atiman kaniya?
Usa ka gabii ang pagbati nga wala gayuy mahimo lisud na kaayong pas-anon. Mibiya ko sa balay ug nakakita og lingkuranan sa parke, diin nag-ampo ko sa Langitnong Amahan hapit sa usa ka oras. Sa unang higayon sa akong kinabuhi, gibati nako ang milagrusong gahum sa Pag-ula sa Manluluwas nga milukop kanako. Ang tanang kasakit ug kagul-anan nga akong gidala gikuha gikan nako; ang tanan nakong gipas-an gitangtang gikan sa akong abaga human niana nga pag-ampo. Si Emma naa pa gihapon sa wheelchair, ug kanunay kong nakadawat og regular nga pagtambal sa sakit sa akong likod, apan nalig-on ko nga magpadayon.
Usa ka tuig human niana, si Emma makadagan na, makakatawa, makasaysay og mga istorya, ug makahunahuna sama gayud sa usa ka kwatro anyos.
Nasayud kami nga dunay usa ka mahigugmaong Amahan sa Langit, nga nagpakabana kanato ug nakaila sa tagsa-tagsa kanato. Nasayud Siya sa mga hagit nga atong nasinati. Dili gayud ako magduhaduha sa milagro nga Iyang gihatag kanamo pinaagi sa pag-ampo, pagpuasa, ug mga panalangin sa priesthood.