Mga Tingog sa mga Santos sa Ulahing mga Adlaw
Usa ka Panahon alang sa Family History
Paghulagway pinaagi ni Wilson Ong
Isip inahan sa duha ka mga batan-ong anak nga babaye, kanunay kong mangatarungan nga dili ko makaapil sa pipila ka mga butang nga ganahan nako tungod kay dili lang gyud nako “panahon” ang pagbuhat sa ingon. Usa niadtong mga butanga mao ang buhat sa family history.
Bisan kon nakaapil ko og indexing isip makalingaw nga kalihokan sa Dominggo kaniadto, nabantayan nako sa akong kaugalingon nga nangatarungan nga wala koy panahon ni kahibalo sa paghangup sa akong buhat sa family history nianang higayuna.
Nausab ang akong kasingkasing usa ka sayo sa buntag pipila ka bulan ang milabay samtang naglingkod ko diha sa templo. Samtang giribyu nako ang mga pangalan sa nangamatay na diha sa mga temple card, nga nag-ampo nga dawaton nila ang mga ordinansa sa templo nga gipahigayon alang kanila, naghunahuna ko sa akong kaugalingon, “Dili ba maayo unta kon kini sila mga sakop sa akong kaugalingong pamilya? Ganahan kong mohimo sa buhat alang kanila.” Ang Espiritu mikumpirmar ngari kanako nga kon mao kini ang akong mga tinguha, nan motabang ang Ginoo nga mahimo nako ang akong buhat sa family history, ilabi na sa adlawng Igpapahulay. Matabangan ko Niya nga makagahin og panahon ug kahibalo sa pagtuman sa Iyang mga katuyoan.
Niana nga Dominggo, miuli ko ug mi-log on sa FamilySearch.org. Midagayday ang mga luha sa akong mga mata sa dihang nakita nako ang mga pangalan sa akong mga katigulangan. Ang akong koneksyon ngadto nila mas nagkalig-on. Unsay nakadugang sa akong gugma alang kanila mao ang personal nga mga litrato ug mga dokumento, nga bag-ohay lang nga gidugang sa akong lola, nga nakahimo sa mga sakop sa akong pamilya nga morag mas tinuod ug importante ngari nako. Mibati ko og hingpit nga kalipay sa pagpaapil sa akong dos anyos nga anak, nga nakakat-on na sa pag-ila sa mga litrato sa apohang lalaki sa iyang papa ug inahan sa apohang babaye sa iyang papa, nga nagsangpit sa ilang pangalan. Gibati nako ang unsay gihulagway ni Presidente Russell M. Nelson, Presidente sa Korum sa Napulog Duha ka mga Apostoles: “Ang Igpapahulay naghatag og talagsaong oportunidad sa paglig-on sa mga relasyon sa pamilya. Total, ang Dios gusto sa matag usa kanato, isip Iyang mga anak, nga makabalik ngadto Kaniya isip natugahan nga mga Santos, na-sealed sa templo isip mga pamilya, ngadto sa atong mga katigulangan, ug sa atong kaliwatan” (Ang Igpapahulay usa ka Kahimut-an, Liahona, Mayo 2015, 130).
Sukad nianang nag-unang kasinatian, nagpadayon ko sa pag-apil sa buhat sa family history panahon sa adlawng Igpapahulay. Napanalanginan ko nga makahimo sa buhat sa templo alang sa pipila sa nangamatay na nga mga sakop sa akong pamilya. Usa ka piho nga panalangin mao ang pagkahibalo bahin sa akong mga kaparyentihan ug pagbaton og mas suod nga relasyon sa akong mga apohan nga dili mga sakop sa atong tinuohan. Nakapalig-on kini sa akong determinasyon nga motuman sa akong mga pakigsaad ug molahutay aron mahimo kong lig-on nga sumpay sa akong mahangturong pamilya.
Bisan kon dunay daghan pa nga angayang buhaton, mapasalamaton ko sa akong Langitnong Amahan sa pagpalambo sa akong kapasidad aron makaapil ko sa Iyang buhat, ilabi na sa Iyang adlaw. Alang nako, ang Igpapahulay usa gayud ka kahimut-an.