Mga Tubag gikan sa mga Lider sa Simbahan
Unsaon Paghimo ni Kristo nga Sentro sa Atong Kinabuhi
Ni Elder D. Todd Christofferson
Sa Korum sa Napulog Duha ka mga Apostoles
Gikan sa debosyonal sa Brigham Young University–Idaho nga gihatag niadtong Enero 27, 2009.
Nakab-ot ni Jesus ang hingpit nga panaghiusa uban sa Amahan pinaagi sa pagtugyan sa Iyang kaugalingon, ang lawas ug espiritu, ngadto sa kabubut-on sa Amahan. Naghisgot sa Iyang Amahan, miingon si Jesus, “kay sa kanunay ginabuhat ko man ang makapahimuot kaniya” (Juan 8:29). Tungod kay kadto kabubut-on sa Amahan, si Jesus mitugyan bisan ngadto sa kamatayon, “ang kabubut-on sa Anak ingon nga gituhop ngadto sa kabubut-on sa Amahan” (Mosiah 15:7). Ang Iyang pagtutok diha sa Amahan mao ang usa sa importanting mga rason sa pagpangalagad ni Jesus nga dunay ingon kaklaro ug gahum. Walay makapabalda nga pagduhaduha diha Kaniya.
Sa samang paagi, kamo ug ako makabutang ni Kristo sa sentro sa atong kinabuhi ug mahiusa uban Kaniya sama nga Siya nahiusa uban sa Amahan (tan-awa sa Juan 17:20–23). Makasugod kita pinaagi sa pagkuha sa tanan gikan sa atong kinabuhi ug dayon ipahimutang kini og balik sumala sa prayoridad nga ang Manluluwas anaa sa sentro. Kinahanglang unahon nato ang pagpahimutang sa mga butang aron mahimong posible ang kanunay nga mohinumdom Kaniya—kanunay nga pag-ampo, pagtuon ug pagpamalandong sa mga kasulatan, mahunahunaong pagtuon sa mga pagtulun-an sa mga apostoles, sinemana nga pagpangandam sa pag-ambit sa sakrament sa takus nga paagi, pagsimba sa Dominggo, ug sa pag-rekord ug paghinumdom unsa ang gitudlo sa Espiritu ug sa kasinatian mahitungod sa pagkadisipulo. Mahimong dunay ubang mga butang nga mosantup sa inyong hunahuna nga angay gayud ninyo niining puntoha sa inyong kinabuhi. Sa higayon nga ang igong panahon ug pamaagi alang niining mga butanga, sa pagpasentro sa atong kinabuhi diha kang Kristo, mapahimutang na makahimo kita sa pagsugod sa pagdugang og ubang mga responsibilidad ug mga butang nga bililhon sigun sa itugot sa panahon ug mga kapanguhaan, sama sa edukasyon ug mga responsibilidad sa pamilya ug personal nga mga panginabuhian. Niining paagiha ang mga importante dili mawala gikan sa atong kinabuhi tungod sa mga maayo lang, ug ang mga butang nga mas gamay og bili mabutang sa mas ubos nga prayoridad o mawala sa hingpit.
Bisan og dili kini sayon, makahimo kita nga kanunayng mopadayon sa unahan uban sa hugot nga pagtuo diha sa Ginoo. Ako makapamatuod nga sa paglabay sa panahon ang atong tinguha ug kapasidad sa kanunay nga paghinumdom ug pagsunod sa Manluluwas molambo. Kinahanglan kitang mapailubon nga maningkamot hangtud sa katapusan ug mag-ampo kanunay alang sa pag-ila ug sa balaan nga tabang nga atong gikinahanglan (tan-awa sa 2 Nephi 32:9).