Usa ka Resipe alang sa Pagkat-on

Imahe

recipe for learning

Sa dihang bata pa ko, migahin ko og daghang oras sa pagtan-aw sa akong mama sa kusina. Mohimo siya sa labing lamian nga mga pagkaon, pan, cookies, ug mga pie alang sa among pamilya. Paglabay sa panahon, misugod ko pagbasa sa mga resipe, pagsunod sa mga instruksyon, ug paghimo og mga pagkaon. Dili na ko magsalig sa akong mama—makahimo ko niini sa akong kaugalingon.

Sama sa pagkat-on sa pagluto, makakat-on kita sa ebanghelyo ug makapalambo sa atong pagpamatuod pinaagi sa pagbuhat. Human si Lehi misulti sa iyang pamilya mahitungod sa iyang damgo sa kahoy sa kinabuhi, si Nephi miingon nga siya gusto nga “makakita, ug makadungog, ug masayud niini nga mga butang” sa iyang kaugalingon (1 Nephi 10:17). Sa laing pagkasulti, dili igo alang kang Nephi ang pagpaminaw sa pagpamatuod sa iyang amahan. Gusto niyang makat-unan kon unsay nasayran na sa iyang amahan.

Ang resipe alang sa pagkat-on sa ebanghelyo adunay pipila ka yanong mga lakang. Makagamit kamo sa mosunod nga upat ka mga ideya sa pagtabang sa inyong pagkat-on sa ebanghelyo uban sa inyong pamilya, sa simbahan, o atol sa inyong personal nga pagtuon.

• Pagbasa aron makasabut. Ang gidaghanon sa mga pahina nga inyong nabasa o unsa ka paspas kamo nga nagbasa dili sama ka importante sa pagsabut kon unsay inyong gibasa. Tingali kinahanglan ninyong balik-balikon pagbasa ang pipila ka mga sentence. Paggamit og diksyonaryo aron tan-awon ang mga pulong nga wala ninyo mahibaloi. Sama pananglit, unsay kahulugan sa dispensasyon? Mahimo ninyong gamiton ang Giya ngadto sa mga Kasulatan aron mahibaloan.

• Pangutana kabahin sa unsay inyong gibasa. Tingali maghunahuna mo, “Unsay nahitabo sa Jerusalem sa panahon nga si Lehi ug ang iyang pamilya mibiya? Nganong wala man maminaw ang mga tawo kang Lehi?”

• Paningkamoti sa pagtubag kining tulo ka mga pangutana mahitungod sa bisan unsang pagtudlo sa ebanghelyo: Nganong importante man kini ngadto sa mga katawhan niana nga panahon? Sa unsang paagi kini magamit ngari kanato karon? Sa unsang paagi kini magamit ngari kanako?

• Pangita og mga sumbanan ug mga koneksyon. Sama pananglit, unsa ang mga sumbanan diha sa paagi nga si Nephi mitubag sa kalisdanan? Sa unsang paagi ang panaw sa iyang pamilya diha sa kamingawan susama sa panaw sa mga Israelite gikan sa Ehipto?

• Isulat ang inyong pagbati ug impresyon diha sa journal. “Samtang magsulat kamo sa bililhon nga mga impresyon, kasagaran adunay daghan pa nga moabut. Usab, ang kahibalo nga inyong naangkon maanaa sa inyong tibuok kinabuhi” (Richard G. Scott, “To Acquire Knowledge and the Strength to Use It Wisely,” Liahona, Ago. 2002, 12, 14). Ilabi na nga isulat kon unsay kahulugan sa mga ideya diha sa inyong kinabuhi.

• Pagdrowing og hulagway. Lain nga paagi sa pagrekord sa unsay imong nakat-unan mao ang pagdrowing niini. Kausa dihang mibisita ko sa usa ka higala alang sa family home evening, ang iyang lola mipakigbahin og personal nga mga istorya kabahin sa hugot nga pagtuo ug pag-ampo. Sa wala pa magsugod ang leksyon, ang akong higala mihatag og papel ug mga crayon ngadto sa iyang gagmayng mga bata aron ilang madrowing ang mga istorya samtang ang ilang apohan sa tuhod nag-istorya. Ang pagdrowing og mga hulagway nakatabang kanila nga mohatag og pagtagad, ug gani nangutana pa sila panahon sa kalihokan aron maklaro ang mga parte sa istorya.

Samtang mosunod kita niining upat ka yanong mga lakang ug makugihong maningkamot nga makaila sa Manluluwas, kita gisaaran nga “ang mga misteryo sa Dios ipadayag [nganhi kanato], pinaagi sa gahum sa Espiritu Santo” (1 Nephi 10:19).