Ngaahi Momeniti Faka-Silesitiale

ʻI he ʻaho ʻe taha, naʻe akoʻi kimautolu ʻe heʻemau kau taki ʻi he Kau Finemuí, ʻo fekauʻaki mo ha ngaahi momeniti makehe ʻokú ke ongoʻi moʻoni ai e Laumālié mo ofi ai ki he ʻOtuá. Naʻa nau ui ia ko ha “ngaahi momeniti fakasilesitiale,” ko ha kupuʻi lea maʻamaʻa naʻe faingofua hono manatuʻí. Kiate au, ne u ʻiloʻi lelei pē ʻa e ʻuhinga ʻo e “momeniti fakasilesitialé”; ne u ʻosi ongoʻi ia kimuʻa, hangē ko e taimi ʻokú ke ongoʻi pe aʻusia ai e faʻahinga moʻui ʻoku lava ke maʻu ʻi he puleʻanga fakasilesitialé. Pea naʻe lahi fau hoku ngaahi momeniti pehení!

Hili hono fakafeʻiloaki mai ʻe homau kau takí ʻa e fakakaukaú, ne mau ō leva ki tuʻa. Naʻe fetapaki mai e laʻaá he ʻuluʻakaú. Ne kuikui homau matá. Ne u ongoʻi e laʻaá hoku fofongá, pea māʻiliʻili māfana mai ʻa e ʻeá. Ne hiva e fanga manupuná pea ʻuʻulu e ʻuluʻakaú he havilí, ʻi heʻemau fiefia he ngaahi fakatupu ʻa e ʻOtuá. Ko ha momeniti fakasilesitiale ia.

Ko ha taimi ʻe taha ne u aʻusia ai ha momeniti fakasilesitialé, ko e hili ko ia e papitaiso hoku kaungāmeʻa mamaé. ʻI heʻemau lue ʻo foki ki ʻapisiasi ki he fakaʻosinga ʻo e ouaú, naʻá ne ala mai ʻo puke hoku nimá peá ma talanoa ki he fakafiefia ʻo ʻema hoko ko ha kaungāmeʻá pea te ma kaungāmeʻa maʻu pē—ʻo aʻu ki he taʻengatá. He ʻikai toe ngalo ia. Naʻá ku vēkeveke mo fiefia mo loto houngaʻia!

Hili ha taʻu nai ʻe taha mei ai, ne ma toe lava ʻo ongoʻi e fiefia fakataha ko iá ʻi heʻema tuʻu he veʻe faiʻanga papitaisó mo sio ki hono papitaiso ʻene faʻeé. Naʻe fakaʻofoʻofa moʻoni e meʻa kotoa.

Mahalo ko e feituʻu lelei taha ke maʻu ai e ngaahi aʻusia ko ʻení, ko e loto fale ʻo e ʻEikí. ʻI he fuofua taimi ne u hū ai ki he temipalé, ne u monūʻia ke u ʻi ai mo ʻeku ongomātuʻá pea mo hoku tokouá. Naʻá ku papitaiso ʻo fakafofongaʻi ʻeku kuifefine uá, pea ne u ongoʻi naʻá ne fiefia.

ʻE lava ke hoko ha ngaahi momeniti fakasilesitiale ʻi ha faʻahinga feituʻu pē mo ha faʻahinga taimi pē—lolotonga e fanongo hivá pe efiafi fakafāmili ʻi ʻapí pe ʻi he akó. ʻOku ou manatuʻi haʻamau efiafi fakafāmili naʻe fiu taʻofi ai e kakata ʻa e taha kotoa! Ko e taha ia ʻeku ngaahi momeniti fakaʻofoʻofa tahá.

Kuo hanga ʻe he ngaahi momeniti fakasilesitiale ko ʻení ʻo fakamālohia ʻeku fakamoʻoní mo tokoniʻi au ke u maʻu ha laumālie houngaʻia ange. Kuo nau akoʻi mai ha ngaahi lēsoni maʻongoʻonga. Kae meʻatēpuú, kuo nau ʻai ke u fiefia mo vēkeveke ki he ongoongoleleí! ʻOku ou ʻilo kapau te u hokohoko atu hono moʻuiʻaki e ongoongoleleí, te u lava ʻo ongoʻi maʻu pē ʻa e fakaʻofoʻofa, fiefia, nonga pea mo e ʻofa ʻoku ou maʻu mei he momeniti fakasilesitiale kotoa pē ʻoku ou aʻusia—pea toe lahi ange ai—ʻi he puleʻanga fakasilesitialé.