Naʻá ku papi ʻi he 2012 peá u maʻu lotu ʻi ha kiʻi kolo ʻi he Vahefonua ʻIpomea Palāsilá. Talu mei he 2014, mo ʻeku ngāue mālohi heʻeku hisitōlia fakafāmilí. Naʻe kamata ʻaki ia ha fakaafe meia ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi he RootsTech ke u fakahoko e papitaisó maʻa ʻeku ngaahi hingoa fakafāmilí. Ne u ongoʻi tukupā moʻoni ke u fai ʻeku hisitōlia fakafāmilí, heʻeku ʻiloʻi kapau te u “tukituki,” ʻe “toʻo” kiate au (vakai, Mātiu 7:7).

ʻOku toe lahi ange he taimí ni ʻa e ngaahi toʻu tangatá, ʻū taá, kae meʻa mahuʻinga tahá, ko ha ngaahi talanoa fakafāmili lahi ange, pea ʻoku tōtōatu moʻoni ia. ʻI heʻeku maʻu e fakamatalá ni, naʻá ku hiki ia ʻi ha tohi mo ha ʻū tā kae pehē ki he ngaahi ʻahó, mei heʻeku hisitōlia fakafāmilí. Naʻe tokoni e ngāué ni ke u fetuʻutaki ai mo hoku fāmili teʻeki ai ke nau siasí pea ne u maʻu ai ha faingamālie ke u vahevahe ʻeku fakamoʻoní ʻoku lava ke taʻengata ʻa e fāmilí.

Kuo tokoni ʻa e ngāué ni ke u tuʻu ai ʻi he ngaahi potu māʻoniʻoní, ngāue mālohi ʻi he Siasí pea mo tali ha uiuiʻi ke u ngāue fakafaifekau ʻo tokoni ki he ʻEikí.

ʻOku ou fakamoʻoni ʻoku moʻoni e ngāue faifakamoʻui ʻoku fai ʻe he Siasí ni, ʻi he ongo faʻahi fakatouʻosi ʻo e veilí, pea ko e finangalo ia ʻo e Tamai Hēvaní. Kimuʻa peá u ʻalu ʻo ngāue fakafaifekaú, ne u maʻu ha faingamālie ke u papitaiso ai maʻa ʻeku ngaahi kuí pea ʻi heʻeku hoko ko ʻeni ko ha faifekaú, ʻoku ou maʻu ai ha faingamālie ke papitaiso ʻa e kakai moʻuí pea ʻoku ou fakaʻamu ke liliu ʻenau moʻuí ʻo taʻengata.