Fa’ariro i te ’āmuira’a ’ei tuha’a nō tō tātou orara’a

’Api 86 : ’Ua ani te peresideni Thomas S. Monson ia tātou ’ia tai’o i te Buka a Moromona i te mau mahana ato’a, ma te parau fafau ē, « e fa’a’ite mai ïa te Vārua Maita’i ia ’outou ē, e parau mau ». Ta’a ’ē noa atu tā ’outou iho mau tuatāpapara’a, e nehenehe tā ’outou ’ia fa’ariro i te tuatāpapara’a Buka a Moromona ’ei peu mātau nō ’outou ’e tō ’outou ’utuāfare. E nehenehe ato’a ’outou e ha’uti ta’ata ora i te tahi mau ’ā’amu ’aore rā e fa’atupu i te tahi ha’utira’a nō te tauturu i te ha’amana’o i te mau ’īrava faufa’a rahi ’e te mau ’ā’amu faufa’a rahi. ’A haere i te friend.lds.org ’e ’a hi’o i te mau ve’a Liahona nō 2016 nō te tahi mau ’ā’amu o te Buka a Moromonama, te mau tārena tai’ora’a ’e tē vai atu ra.

’Api 117: ’Ua fa’ati’a Elder Gary E. Stevenson nāhea tōna metua tāne i fa’aro’o i te Vārua Maita’i ’e i pāruru iāna i te hō’ē ’ōphi. ’A ani i tō ’outou metua e nehenehe ānei e fa’atupu i te hō’ē tāu’ara’a parau nō ni’a i te uira’a : Nāhea te Vārua Maita’i i te tauturu ia ’outou ? ’A fa’a’ite i te tahi mau taime i reira te Vārua Maita’i i fa’aara ai, i tāmāhanahana ai ’aore rā i fa’a’ite pāpū ai ia ’oe. E nehenehe ato’a ia ’outou ’ia pāpa’i i te reira ’ei buka.

’Api 87 : ’Ua ha’api’i Joy D. Jones ē, e nehenehe ’outou e fa’aineine nō te fāri’i i te mau fafaura’a mo’a nā roto i te ha’api’ira’a i te ha’apa’o i tā ’outou parau i teienei. ’A ha’amau i te hō’ē fā ’e ’a parau fafau ’ia pe’e i te reira. ’A ani i te hō’ē hoa ’ia hi’o ia ’oe nō te ha’apāpū ē, tē ha’apa’o ra ’oe i tā ’oe i parau.

’Api 90 : ’Ua hōro’a mai Elder Yoon Hwan Choi i te tahi parau a’o mai roto mai i tōna metua tāne : « ’Eiaha e hiʼo i te tahi atu vāhi, ’a hiʼo i niʼa ! » I te tahi taime, e fa’a’ōnevaneva tātou ’e e mo’e ia tātou ’ia rōtahi i ni’a i te Metua i te Ao ra ’e ia Iesu Mesia. Nō reira, e ha’amana’o ia ’oe iho ’ia hi’o i ni’a ! E nehenehe tā ’outou e fa’atautau i te hō’ē hōho’a nō Iesu i roto i tō ’outou piha. ’A haere i rāpae i te fare ’e ’a hi’o i te ra’i. ’A fa’ata’a i te hō’ē taime hau i te mau mahana tāta’itahi nō te feruri nō ni’a i te Metua i te Ao ra ’e ia Iesu Mesia, ’e ’ia putapū i te Vārua.

Mau ’api 93 ’e 117 : ’Ua ani ānei ’outou ia ’outou iho : Nāhea e ti’a ai i te Vārua Maita’i ’ia pārahi noa iā’u nei ? Nāhea e ’ite ē, ’o te Vārua Maita’i terā ? Nāhea te Vārua Maita’i e tauturu nei iā’u ? ’Ua pāhono Elder Ronald A. Rasband ’e Elder Gary E. Stevenson i teie mau uira’a ’e tē vai atu ra. « E hōpoi’a mo’a tā tātou ’ia ha’api’i ’ia ’ite i tōna mana i roto i tō tātou orara’a ’e ’ia pāhono atu », ’ua parau Elder Rasband. Nāhea ’outou i te rave i te reira hōpoi’a ?

’Api 33 : ’Ua fa’ahiti Elder Ulisses Soares i te hō’ē tuha’a nō te tumu parau a te Feiā ’Āpī : « E ani ma te fa’aro’o, ’eiaha e fē’a’a. ’O tei fē’a’a ra, e au ïa i te ’aru miti i patuhia ’e te mata’i e fēto’ito’i a’era » (Iakobo 1:6). Nāhea ʼoutou i te ha’apae i te fē’a’a ? Ha’amata nā roto i te ha’apūaira’a i tō ’outou fa’aro’o ia Iesu Mesia. ’A tuatāpapa rahi atu ā nō ni’a iāna. ’A ha’amana’o i te mau taime ’ua putapū ’outou i tōna here ’e tōna hau.

Mau ’api 86 ’e 9 : ’Ua ani te peresideni Thomas S. Monson ia tātou : « Mai te peu ē, ’aita ’outou e tāi’o nei i te Buka a Moromona i te mau mahana ato’a, ’a rave i te reira. » ’E ’ua ani te tuahine Carol F. McConkie : « Tē vaiiho ra ānei tātou i te niuniu, te tāpura ’ohipa roa roa ’aita e hope’a ’e te ha’apa’ora’a i te huru o teie nei ao ? Nā te pure, te tuatāpapara’a ’e te fa’aro’ora’a i te parau a te Atua e tītau i te here tāmā ’e te fa’aora nō tō tātou vārua. » ’A fa’ata’a i te hō’ē taime i te mahana tāta’itahi nō te tai’o i te Buka a Moromona ’e ’a tu’u i te tahi fa’aha’amana’ora’a i ni’a i te tārena ’aore rā te niuniu.

’Api 62 : E aha tā ’outou mau fā nō te orara’a ? E mea maita’i te mau fā nō te tōro’a ’ohipa, te ’utuāfare ’e tae noa atu i te tū’aro ’e te mau ’ohipa fa’a’āreareara’a, terā rā, « tā tātou mau ’ōpuara’a rahi a’e ’e te faufa’a a’e, ’ia au ïa te reira i te fa’anahora’a mure ’ore a tō tātou Metua i te Ao ra e ti’a ai. », ’ua ha’api’i Elder M. Russell Ballard. Nāhea tā ’oe mau ’ōpuara’a e tū’ati nei i te ’ōpuara’a a te Metua i te Ao nō ’oe ? Nāhea ’oe i te tūtonu rahi a’e i ni’a i te fā e ora e a muri noa atu ’e te Metua i te Ao ra ’e ’o Iesu Mesia ?

’Api 39 : I te ’ōmuara’a o teie matahiti, ’ua ani te peresideni Russell M. Nelson i te feiā ’āpī pa’ari ’ia « fa’ata’a i te hō’ē taime i te hepetoma ato’a nō te tuatāpapa i te mau mea ato’a ’ua parau Iesu ’e ’ua rave ho’i mai tei pāpa’ihia i roto i te [mau pāpa’ira’a mo’a] » (« Te mau peropheta, te fa’aterera’a ’e te ture a te Atua » [Purera’a ’ati a’e i te ao nō te Feiā ’Āpī Pa’ari 8 nō tēnuare 2017], broadcasts.lds.org). ’Ua tu’u fa’ahou ’oia i te reira anira’a i roto i te ’āmuira’a rahi ’ei hō’ē o nā tuha’a rahi e maha nō te tītaura’a i te mana o te Fa’aora i roto i tō tātou orara’a. Tuatāpapa i te a’ora’a a te peresideni Nelson nō te ha’api’i nāhea e nehenehe ai e roa’a ia ’outou « te mana e navaʼi nō te faʼaruru i te mau hōpoiʼa, te mau fifi, ʼe te mau faʼahemaraʼa nō tō tātou tau. »

Mau ’api 100 ’e 26 : ’Ua hina’aro ānei ’outou i te hō’ē hōho’a fa’a’ite ’avei’a nō tō ’outou orara’a ? ’Ua ha’api’i Elder Dallin H. Oaks : « Nō te mea tē mau nei tātou i te parau mau nō ni’a i te Atuara’a ’e tō tātou aura’a ’e ’o rātou, te fā o te orara’a e te nātura o tō tātou haere’a mure ’ore, tē mau nei tātou i te hōho’a fa’a’ite ’avei’a hope nō tō tātou tere i te tāhuti nei. » To’opiti rāua Elder Weatherford T. Clayton tei ha’api’i ē, e ti’a i te ’ite nō ni’a i te fa’anahora’a nō te fa’aorara’a e tauturu mai i roto i tā tātou mau tāmatara’a nei. ’A tuatāpapa i tā rāua a’ora’a ’e ’a ani i te Metua i te Ao ra nāhea te mau parau tumu mure ’ore e nehenehe e riro ’ei hōho’a fa’a’ite ’avei’a i roto i tō tātou orara’a.

’Api 104 : E nehenehe te mata’u e fa’aitoito ia tātou ’ia rave, ’ua ha’api’i rā te peresideni Dieter F. Uchtdorf ē, « e’ita roa atu te reira e taui i te ta’ata ’ei ta’ata here i te maita’i ’e te hina’aro e ha’apa’o i te parau a te Metua i te Ao ra ». Nāhea te here mau o te Mesia e riro ai ’ei « rā’au fa’ata’ahia e te Atua » nō tō ’outou mau mata’u ?

’Api 86 : ’Ia tuatāpapa tātou nā roto i te pure i te Buka a Moromona ’e ’ia feruri hōhonu ho’i i te mahana tāta’itahi, ’ua parau te peresideni Thomas S. Monson, « e vai ïa tātou i roto i te hō’ē fāito e fa’aro’o ai tātou i te reo o te Vārua, e pāto’i ai i te fa’ahemara’a, e upo’oti’a ai i ni’a i te mana’o fē’a’a ’e te mata’u, ’e e fāri’i ai i te tauturu o te ra’i i roto i tō tātou orara’a. » Nō ’oe iho ’e nō te ’utuāfare ato’a, ’a fa’ata’a i te hō’ē fā nō te tai’ora’a i te Buka a Moromona i te mau mahana ato’a.

’Api 39 : ’A tāmata i te ’ōpuara’a tā te peresideni Russell M. Nelson i hōro’a i te feiā ’āpī pa’ari (hi’o i ni’a « Nō te feiā ’āpī pa’ari »). Nāhea ’outou i te fa’atano i teie ’ōpuara’a i ni’a ia ’outou ’e tō ’outou ’utuāfare ? ’A paraparau nō ni’a i te mau ha’amaita’ira’a e tae mai nā roto i te ha’api’i rahi atu ā nō ni’a i te Fa’aora.

Mau ’api 93 ’e 117 : ’A tai’o ai ’outou i nā a’ora’a a Elder Ronald A. Rasband ’e a Elder Gary E. Stevenson, ’a ’imi i te mau rāve’a ’ia pārahi mai te Vārua i piha’i iho ia ’outou ’e nāhea te Vārua i te tauturu ia ’outou. Hi’o i te mau rāve’a nō te fa’arahi i tōna mana fa’auru i roto i tō ’outou orara’a.

Mau ’api 39 ’e 62 : ’Ua fa’aitoito te peresideni Russell M. Nelson ’e Elder M. Russell Ballard i te mau melo ’ia tuatāpapa i « Te Mesia Ora : Te ’ītera’a pāpū o te mau ’āpōsetolo » (hi’o i te tāpo’i buka roto). ’Ua parau Elder Ballard : « ’A tu’u hō’ē hōho’a i te vāhi e nehenehe tā ’outou e ’ite atu, ’e ’a rave i te taime nō te hi’ohi’o i te mau fa’ahitira’a parau e ’itehia i roto i teie ’itera’a pāpū fa’auruhia nō ni’a i te Mesia » ’Ei ’utuāfare, ’a tai’o i « Te Mesia ora » ’e ’a paraparau i te mea tā ’outou i ha’api’i mai.

Mau ’api 127 ’e 97 : ’Ua ha’api’i Elder Quentin L. Cook ē, tō tātou niu nō te fa’aro’o, « e haʼamau-marū-noa-hia…te hōʼē ʼāpaparaʼa, te hōʼē ʼohipa, te hōʼē tāmataraʼa, te hōʼē manuia-ʼore-raʼa, ʼe te hōʼē manuiaraʼa i te taime hōʼē. » ’Ua parau Elder L. Whitney Clayton ē : « ’o te fa’atanotanora’a i te mau ’ohipa na’ina’i pae fa’aro’o i te mau mahana ato’a te rāve’a hō’ē roa nō te ha’apūai ia tātou i mua i te mau fifi o te orara’a, noa atu te huru fifi ». E aha tā ’outou e nehenehe e rave i te mahana tāta’itahi nō te ha’apūai i tō ’outou niu nō te fa’aro’o ?