Te tāmau nei te tāvinira’a a te mau ’āpōsetolo nā te ao

Tē tāmau noa nei te mau peropheta ’e te mau ’āpōsetolo i te tāvini nā te ao ato’a nei (hi’o PH&PF 107:23 I te roara’a o nā ’āva’e e ono i ma’iri :

I roto i te ha’apurorora’a Mata e Mata i Palmyra (New York, Marite), ’ua fa’aitoito te peresideni Henry B. Eyring ’e ’o Elder Jeffrey R. Holland i te feiā ’āpī o te ’Ekālesia ’ia roa’a tō rātou iho ’itera’a pāpū. ’Ua parau te peresideni Eyring : « ’Ia tae ’outou i te ’itera’a nō ’outou iho ē e parau mau teie mau mea ».

I Mehiko, ’ua fa’a’itehia te peresideni Russell M. Nelson i te ’āpo’ora’a ’īriti ture o te fenua (te tuha’a raro o te ’āpo’ora’a rahi), ’e ’ua ha’apoupouhia te ’Ēkālesia nō te maita’i tāna i rave nō te pārurura’a i te ti’amāra’a i te pae fa’aro’o ’e i roto i te ha’apūaira’a i te mau ’utuāfare. ’Ua fārerei ato’a te peresideni Nelson i te mau melo ’e te mau misiōnare ’e ’ua parau ’oia ē : « ’ua riro te mau melo ’ei pūai itoito nō te maita’i o tō rātou huira’atira ».

I Arizona (Marite), ’ua a’o ’o Elder Dallin H. Oaks i te mau melo ato’a o te ’Ēkālesia ’ia pāruru i te ti’amāra’a pae fa’aro’o. (E ’itehia te mau ha’amāramaramara’a hau atu i ni’a ia religiousfreedom.lds.org.)

’Ua paraparau te peresideni Dieter F. Uchtdorf i te mau melo nō te ’āma’a nō Parleys Creek (Swahili) i Roto Miti (Utah, Marite). E rave rahi melo o te ’āma’a e mau tītīhoria nō te fenua ’Āfirita, ’e e piti taime tō te peresideni Uchtdorf rirora’a ’ei tītīhoria. ’Ua parau ’oia : « ’ia ha’amana’o tāmau noa ē i te vāhi tei reira ’outou, ’o te ’evanelia te fare ».

’Ua haere atu na Elder M. Russell Ballard ’e D. Todd Christofferson i te ’ōro’a ha’amaura’a o te ’episekōpo ’āpī nō te ’episekōpora’a Katorita Roma i Roto Miti ’e ’ua mānava iāna i roto te orara’a huira’atira.

I te Fenua Mo’a, ’ua ’āmui atu ’o Elder Holland ’e ’o Elder Quentin L. Cook i te hō’ē pupu ti’a fa’atere feiā mo’a ’e te feiā tōro’a teitei ’āti Iuda nō Marite mai, tei putuputu i te hō’ē māhora ’ā’amu i Ierusalema nō te ha’amana’ora’a i te 175ra’a o te ’īritira’ahia te fenua e Elder Orson Hyde (1805–78) nō te pupu nō te Tino ’Ahuru Ma Piti ’āpōsetolo ’ei vāhi ha’aputuputura’a nō te nūna’a ’āti Iuda.

’Ua fārerei ato’a Elder Holland i te mau melo ’e te mau misiōnare nō Tāpōnē, Kōrea ’e Guam, i reira ’ua parau ’oia ē : « ’ua ha’apāpū mātou ia rātou i te hō’ē orara’a [maita’i] i muri nei ». ’Ua parau ’oia ē maoti te ha’apurorora’a ti’a o te mau purera’a i te fenua ato’a « ’ua fāna’o mātou i te rāve’a nō te fa’atae i tā mātou parau poro’i i te ta’ata e rave rahi roa », ’e ’ua fāna’o e ’ahuru tauatinira’a melo.

I New York (Marite), ’ua ’āpiti atu ’o Elder David A. Bednar i roto i te hō’ē ’āparaura’a nō ni’a i te fa’aipoipora’a, ma te parau ē te hō’ē o te mau hōpoi’a rahi i tō tātou tau—hō’ē e ti’a i te mau ha’apa’ora’a fa’aro’o ta’a ’ē e ’āmui mai—’oia ho’i te tauturura’a i te mau ta’ata ’ia hāro’aro’a i te aura’a mau ’e te fā o te fa’aipoipora’a.

I te fārereira’a ’oia i te feiā mo’a i te mau mahana hope’a nei i Tāpōnē ’e i Kōrea, ’ua parau Elder Bednar ē ’ua marū ri’i mai te nu’ura’a o te ’Ēkālesia i Asia e mea tāmau rā. ’Ua parau ’oia : « e’ita iho ā, e māere iho ā ’oe i te itoito, te maita’i ’e te ha’apa’o maita’i o teie feiā mo’a i te mau mahana hope’a nei ». ’Ua a’o ato’a ’o Elder Bednar i e tauatinira’a melo o te ’Ēkālesia ’e ’ua ha’api’i i te mau misiōnare i roto e 7 o nā misiōni e 21 a te ’Ēkālesia i Firipino.

I Mehiko, ’ua a’o ’o Elder Neil L. Andersen i te mau melo o te ’Ēkālesia ’ia upo’oti’a i te mau tāfifira’a ’o te tāpe’a ia rātou ’ia haere i te hiero, ’ia ha’apa’o i te mahana sābati, ’e ’ia ha’apūai i te mau aura’a ’utuāfare. ’Ua ani ’oia ia rātou ’ia fa’aō roa mai i te Fa’aora i roto i tō rātou orara’a.

’Ua tere Elder Quentin L. Cook nā Firipino, 20 matahi i muri iho i tōna tāvinira’a i reira ’ei Hui mana fa’atere ’āpī. ’Ua parau ’oia ē ’ua tāta’ipiti te ’Ēkālesia i te fenua Firipino. « Te vāhi tei reira te mau ’āma’a » ’ua parau ’oia, « tē vai nei te mau titi i teienei ». Te mau tamari’i tā mātou i mātau, e mau misiōnare ïa tei ho’i mai i teienei. Te mau misiōnare tei ho’i mai e mau peresideni titi ïa i teienei. E mea fa’ahiahia ’ia hi’o te nu’ura’a o te ’Ēkālesia i mua ».

I Pōrīvia ’e i Pērū, ’ua a’o ’o Elder Cook i te mau melo ’ia fa’atumu i ni’a i te fa’aro’o i te Fatu ia Iesu Mesia. ’Ua parau ’oia ē e mea fa’ahiahia mau te feiā ’āpī ’e te feiā ’āpī pa’ari i reira ’e tē fa’a’ite ra rātou i te here nō te Fa’aora ’e tāna tāra’ehara ’e tōna ti’a-fa’ahou-ra’a.

I te fenua ’Āfirita Tō’o’a o te rā, ’ua parau ’o Elder Gary E. Stevenson, ’ua hōro’a mai tāna fārereira’a i te rāve’a nō te feruri i ni’a i te here ’e te ’oa’oa o te feiā mo’a i roto i te ’evanelia, noa atu te mau « tāmatara’a ’e te mau ’ati » tā rātou e fa’aruru nei.

I muri iho, i Urutue, Tīreni ’e i Rāparata, ’ua paraparau ’oia i te hō’ē ’āmuira’a feiā ’āpī CJSF. ’Ua parau ’oia e rave rahi feiā ’āpī « tei rave i te mau fa’aotira’a e haere i te misiōni ’e ’ia tāpe’a māite i tā rātou fā ’ia fa’aipoipo i te hiero ’e… [’ia fāri’i] te fāito ha’api’ira’a teitei a’e ».

’Ua a’o ’o Elder Ronald A. Rasband i te mau melo ’e te mau misiōnare i te ārea nō ’Āfirita Rōpū ’ia tāpe’a māite i tā rātou mau fafaura’a ’e ’ia hi’o i te Fatu i roto i te mau taime ’ārepurepu. ’Ua haere ’oia i te hō’ē fare ma’i nō te mau tamari’i tei ro’ohia te ma’i mariri ’aita’ata i Tuatemara, ’ua a’o atu ’oia i te hō’ē putuputura’a nō ni’a i te pārurura’a i te ti’amāra’a pae fa’aro’o tei fa’aterehia e te ’Ēkālesia i El Salvador e ’ua fārerei i te peresideni nō Nītaratua.

I Tona ’ua fārerei ’o Elder Dale G. Renlund i te ari’i vahine ’e te tahi mau melo o te ’utuāfare hui ari’i. ’Ua haere ato’a ’oia i Auterāria ’e i Niuterani, i reira ’ua ani te mau melo iāna ’ia fa’atae atu i tō rātou here i te peresideni Thomas S. Monson.