E pae hiero ’āpī

’Ua fa’aara mai te peresideni Thomas S. Monson i te mau fa’anahora’a nō te patura’a e pae fa’ahou hiero, i te mau ’oire i muri nei :

Brasília (Peretīria). E riro te hiero nō Brasília (Peretīria) i te 10ra’a o te hiero i Peretīria, ’oia ho’i e ono e ’ohipa nei ’e e toru tei fa’aarahia ’aore rā tē patuhia ra. Ta’a ’ē noa atu tō Marite ’e Mehiko, ’ua hau atu te feiā mo’a i te mau mahana hope’a nei (hau i te 1.3 mirioni) e ora nei i Peretīria, i te tahi noa atu fenua ’ē. ’Ia tai’ohia te huira’atira i Peretīria e 211 mirioni taata.

Grand Manille (Firipino). E riro teie hiero i te pitiraa i Manila ’e te mahara’a i te fenua Firipino. Fātata e 750 000 feiā mo’a i te mau mahana hope’a nei i Firipino, te huira’atira i reira, e 104 mirioni taata.

Nairobi (Kenia). E tāvini teie hiero hau atu i te 30 000 melo i ’Āfirita Hiti’a o te rā, ’oia ato’a te 13 000 melo i Kenia, te huira’atira i reira e 48 mirioni taata. E va’u atura ïa hiero e ’ohipa nei, e pātuhia ra, ’aore rā tei fa’aarahia i ’Āfirita.

Pocatello (Idaho, Marite). ’O te onora’a ïa o te hiero i Idaho, e tuha’a fenua fātata e 450 000 feiā mo’a i te mau mahana hope’a nei ’e te huira’atira e 1,7 mirioni taata.

Saratoga Springs (Utah, Marite). E ’itehia teie hiero i te hō’ē o te mau vāhi tupu vitiviti i Utah ’e e riro te reira i te 18ra’a o te hiero i roto i te tuha’a fenua. I te tuhaa fenua nō Utah, tei reira te pū fa’atere o te ’Ēkālesia, e 2,1 mirioni melo, ’e te huiraatira fātata i te 3,1 mirioni taata.

’Āmuihia teie nau hiero e pae tei fa’aarahia, ’ua 182 atura ïa hiero nā te ao ato’a nei, e mau hiero e ’ohipa nei (155) ’e e mau hiero i fa’aarahia ’aore rā e patuhia ra ’e e fa’a’āpīhia ra (27).

Mai te ’āmuira’a rahi nō ’ātopa 2016 i teienei, ’ua ha’amo’ahia te hiero nō Fort Collins (Colorado), te hiero nō Star Valley (Wyoming), te hiero nō Hartford (Connecticut, Marite), ’e ’ua ha’amo’a-fa’ahou-hia te hiero nō Suva (Fītī).

Te mau ha’amo’ara’a i fa’anahohia mai tei fa’a’itehia i raro nei :

’Ua tāpāhia te repo nō te hiero nō Winnipeg (Manitoba,Tanata), te hiero nō Kinshasa (Repupirita Hau Manahune nō Tōneto), te hiero nō Barranquilla (Colombia), te hiero nō Arequipa (Peru) ’e te hiero nō Rio de Janeiro (Peretīria).

Te tahi ’ohipa faufaa ato’a, tē tāmau noa ra te patura’a o te hiero nō Roma (’Ītāria), ’ua tu’uhia te mau ti’i o Iesu Mesia ’e te tino ’Ahuru Ma Piti ’āpōsetolo mātāmua roa i roto i te pū fāri’ira’a rātere, ’e ’ua tu’uhia hō’ē ti’i o te melahi Moroni i ni’a i te tara.