Te mau hāmanira’a ’e te mau mātēria ’āpī

Teie te hō’ē ha’apotora’a nō te mau hāmanira’a ’e te mau mātēria ’āpī a te ’Ēkālesia tei hāmanihia iho nei.

Te mau buka ’ā’amu pāpa’ira’a mo’a ’e tāpēni. Nō te fa’aitoito i te ta’ata ’e te ’utuāfare ’ia tuātapapa i te mau pāpa’ira’a mo’a, ’ua pūhara te ’Ēkālesia i te mau mātēria ’āpī nō ni’a i te mau ’ā’amu pāpa’ira’a mo’a, ha’amata nā roto i te hō’ē ’āpapara’a buka tāpēni e tano nō te mau tamari’i mai te 2 ē tae atu i te 8 matahiti. Te vai ra te PDF tāmoni ’ore i ni’a ia scripturestories.lds.org, ’e e nehenehe e poro’i i te nene’ira’a o te mau buka i ni’a ia store.lds.org ’e i te mau pū ’ōperera’a buka.

E ’īritihia te mau buka tāpēni nā roto i te mau reo tē vai ra te mau buka pāpa’ira’a mo’a LDS. E roa’a mai te mau buka i ’īritihia i te roara’a o te matahiti 2017, e ha’amata nā te reo pāniora, pōtītī, farani, tāpone, kōrea, tinito (tumu), purutia, rusia ’e ’ītālia.

Te mau pāpa’ira’a mo’a. ’Ua fa’aara te Peresidenira’a Mātāmua i te hō’ē ’īritira’a ’āpī nō nā toru buka o te pāpa’ira’a mo’a nā roto te reo farāni, e roa’a i ni’a ia écritures.lds.org ’e i ni’a i te fa’anahora’a ’āfa’ifa’i Bibliothèque [Vaira’a buka]. Tē vai ra te hō’ē tuha’a ’iti tei tauihia i roto i te hō’ē o te mau pure ha’amaita’ira’a ’ōro’a. ’Ua fa’aara ato’a mai rātou i te hō’ē ’īritira’a nā roto i te reo toroatia o nā toru buka o te pāpa’ira’a moa, e roa’a i ni’a te ’itenati. ’Aita i maoro a’enei, ’ua pūharahia te nene’ira’a pāpie nō nā toru buka o te pāpa’ira’a mo’a nā roto i te reo toroatia, rusia, ’e itirane i teienei.

Tauturu nō te mau ’utuāfare e fa’aruru nei i te fa’ahina’arora’a ta’ata nō tōna iho ’āpeni. Nō te tauturu i te mau melo ’ia pāhono maita’i ’e ma te feruri maita’i i te taime e fa’aū rātou i te fa’ahina’arora’a ta’ata nō tōna iho ’āpeni i roto i tō rātou iho ’utuāfare, i rotopū i te tahi mau melo o te ’Ēkālesia ’e ’aore rā i te tahi atu vāhi ’ē, tē vai ra te mau mātēria mai te tahua ’itenati ’āpī mormonandgay.lds.org ’e te hō’ē tumu parau o te ’evanelia tei fa’atanohia nō ni’a i te fa’ahina’arora’a ta’ata nō tōna iho ’āpeni (nā roto i te reo peretāne) tē vai ato’a ra te mau uira’a e ’ui-pinepine-hia ’e te mau ha’api’ira’a a te ’Ēkālesia.

Fa’atanora’a nō te fa’anahora’a Bibliothèque (Vaira’a buka ’evanelia). ’Aita i maoro a’enei, ’ua pūharahia te hō’ē fa’atanora’a rahi nō te fa’anahora’a e fa’a’ohipahia nei e te mau melo nā te ao nei nō te tuātapapa i te mau pāpa’ira’a mo’a, te mau a’ora’a o te ’āmuira’a, ’e te tahi atu mau mātēria, te iOS ’e te Android. I roto i te pūharara’a 4, ’ua hau atu te maita’i o te mau mauiha’a nō te tuātapapara’a, e mea au maita’i te mau mea ta’a ’ē ’e te fa’aterera’a ’e e roa’a te mau video ha’api’ipi’ira’a ’āpī. Nō te mea ho’i i teienei ē, e nehenehe e tāpa’opa’o i te mea ato’a e vai ra, e nehenehe ’oe e fa’a’ū, e tu’u i te hō’ē mana’o, e tū’ati, e tātīteti, ’e e fa’anaho i te mau mea ato’a e vai ra, i roto i te buka nota. E nehenehe e tāpa’opa’o i ni’a i te mau video, te upo’o parau o te mau pene o te pāpa’ira’a mo’a ’e te mau tauturu nō te tuātapapara’a, te mau tāpura i roto i te mau buka ha’api’ira’a rau, te mau hīmene ’e te mau hīmene Paraimere ’e tē vai atu ra.

Fa’anahora’a LDS Tools tei fa’atanohia. E fa’ati’a te pūharara’a 3.2.0 o te fa’anahora’a LDS Tools ’ia haere ’ōhie noa i te hiero. Tē vai ra te tahi mau mea ta’a ’ē tei tu’uhia e tauturu i te mau melo ’ia ’ite i tā rātou hiero, ’ia ’ite mai e pae hiero fātata, ’ia niuniu i te hō’ē hiero ’e ’aore rā ’ia ’ite i te tai’o mahana e ’ōpani ai, ’e ’ia fa’aha’amana’ohia nā mua a’e te hopera’a tā rātou parau fa’ati’a.