Elder Adilson de Paula Parrella

I te va’ura’a te matahiti o Elder Adilson de Paula Parrella, ’ua ha’amata te mau misiōnare i te ha’api’i i tōna ’utuāfare, te ha’api’ira’a nō ni’a i te peropheta Iosepha Semita ’e te fa’aho’i-fa’ahou-ra’a-hia mai te ’evanelia.

Tē parau ra ’o Elder Parrella, tei pāturuhia i te 1 nō ’ēperēra 2017, ’ei Hitu ’Ahuru Hui mana fa’atere rahi ē : « i tō’u tamari’ira’a iho ā, ’aita tā’u e uira’a ’ua ’ite mau ānei Iosepha Semita i te Atua ’e ia Iesu Mesia ». « ’Aita roa atu vau i fē’a’a ē tae roa mai i teienei ».

’Ua fānauhia ’o Elder Parrella i te matahiti 1962, i Guarujá, Peretīria, i te pae Ataranetita, fātata ia São Paulo, e Fioravante ’e e Vany de Paula Parrella.

’Ua tāvini tōna nā taea’e pa’ari i te misiōni. Nā tō rāua hi’ora’a maita’i ’e tō te hō’ē ’episekōpo here, ’o Angelino Borges de Freitas, tei a’o noa iāna nāhea te rirora’a ’ei ti’a tei mau i te autahu’ara’a a Aarona, i tūra’i iāna ’ia hina’aro ’ia tāvini i te hō’ē misiōni rave tāmau. ’Ua ha’apūai te tāvinira’a misiōnare iāna « e mea mau te Atua ’e tāna Tamaiti ’e e tamari’i tātou pā’āto’a nā te Atua ».

I muri iho i te tāvinira’a i roto i te misiōni nō Porto Alegre (Peretīria), ’ua haere ’o Elder Parrella i te fare ha’api’ira’a teitei nō Brigham Young i Provo, Utah, Marite, i reira ’ua fāri’i ’oia i te parau tū’ite licence ha’apararera’a parau ’e te master fa’aterera’a faufa’a. ’Ua ’ohipa ’oia ’ei ti’a fa’atere rahi nō Kodak Polychrome Graphics ’e ’ei ’āpiti nō Korn Ferry International. ’Aita i maoro a’enei, ’ua riro na ’oia ’ei ’āpiti nō Caldwell Partners.

’Ua fa’aipoipo ’oia ia Elaine Finholdt i te ’āva’e tītema 1988 i roto i te hiero nō São Paulo (Peretīria). E metua rāua nō e pae tamari’i.

’Ua tāvini na ’o Elder Parrella ’ei peresideni ’āma’a, ’episekōpo, melob’apo’ora’a teitei, tauturu i roto i te peresidenira’a titi, Hitu ’Ahuru ārea ’e ’ei peresideni nō te misiōni nō Belo Horizonte (Peretīria) mai te matahiti 2009 e tae atu i te matahiti 2012.

I tōna fārereira’a i te mau misiōnare, ’ua riro tōna orara’a ’ei raterera’a nō te hāro’aro’a i te ’itera’a tāna i fāri’i i te va’ura’a o tōna matahiti. ’Ua tauturu te haerera’a i te purera’a, te tāmaura’a i te ha’api’i mai nā roto mai i te parau a te Atua, ’e te tītaura’a ’ia ora i te mau fa’auera’a i te fa’a’ā’ano i tōna hi’ora’a mai terā ’ite ri’i o te parau mau tāna i fāri’i i tōna tamari’ira’a. « Teie mau te bāsileia o te Atua i ni’a i te fenua nei », tē parau ra ’oia.