Te pūai o te Buka a Moromona

Tō’u mau taea’e ’e tuahine, e ’oa’oa rahi nō’u ’ia fa’atae atu i tō’u here ia ’outou i roto i teie ’āmuira’a rahi a Te ’Ēkālesia a Iesu Mesia i te Feiā Mo’a i te mau Mahana Hope’a Nei. Hou ’a ha’amata ai au i ta’u parau poro’i tumu i teie mahana, tē hina’aro nei au e fa’a’ite ē, e pae hiero ’āpī e patuhia i teie mau fenua i muri nei : Brasília (Beresiria) ; Grand Manille (ārea nō te Fenua Philipino) ; Nairobi (Kenya) ; Pocatello (Idaho, Marite) ; ’e Saratoga Springs (Utah, Marite).

I teie po’ipo’i e paraparau vau nō ni’a i te pūai o te Buka a Moromona ’e te tītaura’a rahi ia tātou te mau melo o teie ’Ēkālesia, ’ia tai’o, ’ia feruri hōhonu ’e ’ia fa’aohipa i tōna mau ha’api’ira’a i roto i tō tātou orara’a. ’Aita e tāhiti te faufa’a o te fāri’ira’a i te hō’ē ’itera’a pāpū pūai nō ni’a i te Buka a Moromona.

Tē ora nei tātou i te hō’ē tau ’ati ’e te ’ino rahi. E aha te mea e pāruru ia tātou i te hara ’e te ’ino rahi e vai nei i te ao nei i teie mahana ? Tē parau nei au ē nā te hō’ē ïa ’itera’a pāpū pūai no ni’a i tō tātou Fa’aora ’e tāna ’evanelia e arata’i ia tātou i te vāhi pāpū. Mai te peu ē, ’aita ’outou e tāi’o nei i te Buka a Moromona i te mau mahana ato’a, ’a rave i te reira. Mai te mea e nā reira ’outou ma te pure ’e te hina’aro mau ’ia ’ite i te parau mau, e fa’a’ite mai ïa te Vārua Maita’i ia ’outou ē, e parau mau te buka. ’E mai te mea e parau mau—’e tē fa’a’ite hanahana nei au ē, e parau mau, e peropheta ïa ’o Iosepha Semita tei ’ite i te Atua te Metua ’e tāna Tamaiti ’o Iesu Mesia.

Nō te mea ho’i ē, e parau mau te Buka a Moromona, ’ua riro ïa te ’Ēkālesia a Iesu Mesia i te Feiā Mo’a i te mau Mahana Hope’a Nei ’ei ’Ēkālesia nā te Fatu i ni’a i te fenua nei, ’e ’ua fa’aho’ihia mai te autahu’ara’a mo’a o te Atua ’ei maita’i ’e ’ei ha’amaita’ira’a nō tāna mau tamari’i.

Mai te peu ē, aita ā tō ōutou e itera’a pāpū pa’ari no teie mau mea, a rave ïa i te mea e titauhia e noa’a ai te reira. Mea faufa’a rahi roa nō ōutou ia fari’i i tō ōutou iho itera’a pāpū nō te mea e afa‘i te mau itera’a pāpū o vetahi ē ia ōutou i te hō’ē noa faito. ’Ia noa’a te reira, e ti’a ïa i te hō’ē ’itera’a pāpū ’ia tāpe’a-ora-hia ’e ’ia pūai noa nā roto i te ha’apa’o-tāmau-ra’a i te mau fa’auera’a a te Atua ’e nā roto i te purera’a ’e te tai’ora’a i te mau pāpa’ira’a mo’a i te mau mahana ato’a.

E au mau ’āpiti here i roto i te ’ohipa a te Fatu, tē tāparu nei au ia tātou pā’āto’a ’ia tuatāpapa ’e ’ia feruri hōhonu nā roto i te pure i te Buka a Moromona i te mau mahana ato’a. ’Ia nā reira ho’i tātou, e vai ïa tātou i roto i te hō’ē fāito e fa’aro’o ai tātou i te reo o te Vārua, e pāto’i ai i te fa’ahemara’a, e upo’oti’a ai i ni’a i te mana’o fē’a’a ’e te mata’u, ’e e fāri’i ai i te tauturu o te ra’i i roto i tō tātou orara’a. Tē fa’a’ite pāpū nei au i te reira i te i’oa o Iesu Mesia, ’āmene.