Upang Sila’y Maging Isa

Larawan

praying in Relief Society

“Ganap na nakiisa si Jesus sa Ama sa pagpapasakop ng Kanyang sarili, laman at espiritu, sa kalooban ng Ama,” pagtuturo ni Elder D. Todd Christofferson ng Korum ng Labindalawang Apostol.

“… Tiyak kong hindi tayo magiging kaisa ng Diyos at ni Cristo hangga’t hindi natin pakahangarin ang Kanilang kalooban at hangarin. Ang gayong pagpapakumbaba ay hindi matatamo sa isang araw, ngunit sa pamamagitan ng Banal na Espiritu, tuturuan tayo ng Panginoon kung nais natin hanggang, sa pagdaan ng panahon, angkop na sabihing Siya ay nasa atin tulad ng ang Ama ay nasa Kanya.”¹

Itinuro ni Linda K. Burton, Relief Society General President, kung paano pagsikapan ang pagkakaisang ito: “Ang paggawa at pagtupad ng ating mga tipan ay pagpapakita ng ating pangakong maging katulad ng Tagapagligtas. Ang nararapat gawin ay pagsikapang magkaroon ng saloobing higit na naipapahayag sa ilang talata ng isang paboritong himno: ‘Tutungo ako saanman [ninyo ako patunguhin]. … Bibigkasin ko ang inyong nais. … Susundin ko ang inyong utos.’”²

Ipinaalala rin sa atin ni Elder Christofferson na “habang sinisikap natin araw-araw at linggu-linggo na sundan ang yapak ni Cristo, lumalakas ang ating espiritu, ang pagtatalo ng kalooban ay nababawasan, at di na tayo ginagambala ng mga tukso.”³

Nagpapatotoo si Neill F. Marriott, Pangalawang Tagapayo sa Young Women General Presidency, tungkol sa mga pagpapala ng pagsisikap na iayon ang ating kalooban sa kalooban ng Diyos: “Nahirapan akong pawiin ang mortal na hangaring gawin ang mga bagay sa aking paraan, na natatanto kalaunan na ang aking paraan ay kulang, limitado, at mas mababa sa paraan ni Jesucristo. “Siya ang daan na naghahatid ng kaligayahan sa buhay na ito at buhay na walang hanggan sa daigdig na darating.”⁴ Mapakumbaba tayong magsikap na maging isa sa ating Ama sa Langit at sa Kanyang Anak na si Jesucristo.

Larawan

Relief Society seal