Ahmad S. Corbitt

Naʻe fanauʻi ʻa ʻAmeti S. Kōpiti, taʻu 57, ʻi ʻAokosi 1962 kia Sēmisi ʻEli Kōpiti mo ʻAmelia Kōpiti. Naʻe masiva ʻa e fāmilí pea nofo ʻi he ngaahi fale ʻo e puleʻanga ʻo Filatelafia, Penisilivēniá, USA, ‘o ʻātakaiʻi kinautolu ‘e he fai hiá mo e fetāʻaki fakakaukengí. Na‘e ʻikai malu ke ʻalu mei ha kaungāʻapi ki ha kaungāʻapí.

Ka naʻe hanga ʻe he ngaahi ongo fakalaumālie ʻa ʻene fineʻeikí ʻo tataki mo tauhi malu ʻa ‘ene fānau ʻe toko 10. Naʻá ne ʻiloʻi fakanatula pē ʻa e taimi ʻoku totonu ke vaʻinga ai ʻene fānaú ʻi tuʻá, mo e taimi ʻoku totonu ke nau nofo ai ʻi falé.

Ko e ongoʻingofua fakalaumālie ko iá naʻá ne takiekina ia ke fakaafeʻi mai ki hono ʻapí e kau faifekau mei he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Lolotonga e taimi lahi ʻo e kei siʻi mo ʻi he toʻu tupú ʻa ʻĀmatí, naʻá ne lotu mo hono fāmilí fakataha mo e Fonua Faka-ʻIsilamí, pea naʻá ne papitaiso kimui ange ko ha Palotisani. Ka ko e taimi ní naʻá ne ongoʻi ʻoku ʻofaʻi ia ʻe he kāingalotu fakalotofonua ʻo e Siasí.

Naʻe papitaiso ʻene fineʻeikí mo e niʻihi hono ngaahi tokouá/tuofāfiné ʻi he māhina hono hokó. ʻI he ʻaho 16 ʻo ʻAokosi 1980, ʻi he hokosia e taʻu 18 ʻa ʻĀmatí, naʻá ne papitaiso ai foki. Ne kau mai ki he Siasí ʻa Henelī Pelenifoti Kemipolo ko e mali ua ʻo ʻene faʻeé, ʻi he taʻu hono hokó.

Naʻá ne pehē, “Ne ʻikai ʻuhinga ia ko kimautolu. Ne ʻuhinga ia ko e ʻOtuá mo e meʻa naʻá Ne finangalo ke mau faí. Naʻa mau loto fiemālie ke loto-fakatōkilalo pea tauʻatāina. Naʻá Ne tataki kimautolu.”

Hili ʻa ʻene ako ʻi he Kolisi Likí pea ngāue fakafaifekau ʻi he Misiona Puerto Rico San Juan mei he 1982 ki he 1984, na‘á ne fetaulaki mo Seini Sosilini lolotonga ha ʻaʻahi ʻa e kau taautaha kei talavoú ki he temipalé. Naʻá na mali ʻi he ʻaho 24 ʻo ʻAokosi 1985, ʻi he Temipale Washington D.C pea ko ha ongomātuʻa kinaua ki ha fānau ʻe toko ono.

ʻI he taʻu ʻe hiva hono hokó, naʻá ne ngāue ʻi he ʻahó pea ako ʻi he poʻulí, ʻo maʻu hono ngaahi mataʻitohí mei he Kolisi Lisiate Sitokitoni ʻo Niu Sēsií pea mo e ʻUnivēsiti Ako Lao ʻo Lutikaá.

Kuó ne hoko ko ha tokoni ʻi ha kau palesitenisī fakasiteiki, palesiteni fakasiteiki, aleaʻanga māʻolunga, mo e palesiteni ʻo e Misiona Dominican Republic Santo Domingo East.

Naʻe ngāue ʻa Brother Kōpiti ko ha loea fai hopo, ʻi he vā fetuʻutaki mo e kakaí pea mo ha talēkita ʻo e ʻŌfisi Fetuʻutaki mo e Kakaí mo e Ngaahi Meʻa Fakavahaʻapuleʻanga ʻa e Siasí ʻi Niu ʻIoké. ‘Okú ne lolotonga ngāue ʻi he Potungāue Ngāue Fakafaifekau ʻa e Siasí.