ʻEletā Ciro Schmeil

Kuo feinga maʻu pē ʻa ʻEletā Sailo Simaile ke talangofua ki he ʻEikí, neongo ne ʻikai mahino kiate ia ʻa e ʻuhinga ʻo ha fekau pau. Kuó ne ʻilo, “ʻI heʻetau talangofuá, ʻi heʻetau tauhi e ngaahi fekaú, ʻe tāpuakiʻi maʻu pē kitautolu ʻe he ʻEikí.”

ʻI hono fakahoko hono ngaahi uiuiʻí, kuó ne mamata ai ki he ngaahi tāpuaki ʻoku maʻu ʻi he talangofuá. Lolotonga ʻene hoko ko ha pīsope mo ha palesiteni fakasiteikí, naʻá ne maʻu ai ha ngaahi faingamālie mahuʻinga ke “vakai ki he liliu e moʻui ʻa e kakaí koeʻuhí ko ʻenau fakamoʻoni ki he Fakamoʻuí pea mo e Tohi ʻa Molomoná.”

Naʻe fanauʻi ʻa ʻEletā Simaile ʻi he ʻaho 16 ʻo ʻEpeleli 1971 ‘i Ponta Grossa, Paraná, Brazil, kia Puluno mo ʻElika Simaile, ko ha ongo papi ului fakatouʻosi ki he Siasí. Naʻá ne tupu hake ʻi Curitiba, Brazil, pea ʻi he taimi ne uiuiʻi ai ʻene ongomātuʻá ke na tokangaʻi ʻa e Misiona Brazil Campinas, naʻá ne ʻalu ʻo ngāue fakafaifekau ʻi he Misiona Utah Ogden.

Lolotonga e ako ʻa ʻEletā Simaile ʻi he ʻUnivēsiti ʻo ʻIutaá, naʻá ne fetaulaki ai ʻi ha fakataha lotu mo ʻAlesanitulā Masato Lousa, ko ha tokotaha ako ʻi he ‘Univēsiti Pilikihami ʻIongí. Na‘á ne pehē, “ʻI he fuofua taimi naʻá ma fetaulaki ai ʻi he fakataha lotú, naʻe ʻikai pē haʻane teitei tokanga mai kiate au.” Ka kiate ia, naʻá ne ʻofa pē ai ʻi heʻena fuofua fesiofakí.

Naʻá na mali ʻi he Temipale São Paulo Brazil ʻi Siulai 1994 pea fakaʻosi ʻena akó ʻi he ʻIunaiteti Siteití. Na‘á na foki ki Palāsila ʻi ha taʻu ʻe 20 kimuʻa peá na hiki ki Kololato, USA, pea mei ai ki Folōlita, USA. Naʻe toko ua e fānau ʻa ʻEletā mo Sisitā Simailé.

Naʻe maʻu ʻe ʻEletā Simaile hono mataʻitohi BA ʻi he ʻātí ʻi he ako fakatufungá mei he ʻUnivēsiti ʻo ʻIutaá ʻi he 1995 pea mataʻitohi MA ʻi hono puleʻi ʻo e pisinisí mei he ʻUnivēsiti ʻo ʻOhaioó ʻi he 2010. Kuó ne ngāue ki he kautaha Uolomaati ʻo Palāsilá ko ha tokoni palesiteni mo e talēkita fakatau kelekele, ko ha ʻōfisa pule ʻi hono fakalele ʻo e Scopel, ko ha pule lahi ʻo e Kolo ko Siá, pea hoko kimuí ni mai ko e pule fakatau kelekele maʻá e JBS S.A.

Kuo hoko ʻa ʻEletā Simaile ko ha Fitungofulu Fakaʻēlia, palesiteni fakasiteiki, tokoni ʻi ha kau palesitenisī fakasiteiki, pīsope, palesiteni ʻi he kōlomu ʻo e kaumātuʻá, mo ha palesiteni fakakolo.