ʻEletā Moisés Villanueva

Naʻe kei taʻu 10 ʻa ʻEletā Moisese Vilanueva he taimi ko iá, ka kuo teʻeki ke ngalo ʻiate ia ʻa e ongo naʻá ne maʻu ʻi hono akoʻi kiate ia mo hono fāmilí ʻa e ongoongoleleí ʻe he ongo faifekaú ʻi ʻOasaka, Mekisikou.

Naʻá ne pehē, “ʻOku ou manatuʻi ʻa e Laumālie naʻá na tuku maí, ʻa e nonga naʻá ku ongoʻi ʻi hoku lotó.”

ʻI he taimi ne papitaiso ai ʻa Moisese mo e toko fā ʻi hono ngaahi tuofāfine/tokouá, naʻe toe foki ʻene fineʻeikí—ko ha faʻē naʻá ne ohi toko taha hake ʻa Moisese mo hono ngaahi tokoua/tuofāfine ʻe toko fitú ʻi ha ngaahi tūkunga faingataʻa—ʻo mālohi ʻi he Siasí.

Kimui ange ai, ʻi he teuteu ʻa e talavou taʻu 18 ko Moisesé ke ngāue fakafaifekaú, ne kei hokohoko atu pē e fehangahangai ʻa hono fāmilí mo e ngaahi pole fakatuʻasinó. Naʻá ne veiveiua ki heʻene fili ke mavahé peá ne talaange ki heʻene fineʻeikí naʻá ne fie nofo ke tokoni kiate ia.

Naʻá ne talaange, “Kapau ʻokú ke fie tokoni kiate au, ʻalu ʻo ngāue maʻá e ʻEikí.”

ʻI he tūʻulutui ʻa Moisesé ʻi hono veʻe mohengá ʻi he fakaʻosinga ʻo hono ʻuluaki ʻaho ʻi he Misiona Mexico Hermisillo, naʻá ne ongoʻi naʻe hōifua ʻa e ʻEikí ʻi he fili naʻá ne faí. ʻOkú ne houngaʻia ʻi heʻene ngāue fakafaifekaú koeʻuhí ko e tupulaki ʻa ʻene fakamoʻoni ki he ongoongolelei kuo fakafoki maí.

Naʻe pehē ʻe ʻEletā Vilanueva, “Oku tataki e Siasí ni ʻe hotau Fakamoʻui ko Sīsū Kalaisí. ‘Okú Ne ʻafioʻi takitaha kitautolu ʻaki hotau hingoá. ʻOkú Ne ʻafioʻi ʻetau ngaahi fiemaʻú, ngaahi faingataʻá mo e ngaahi meʻa ʻoku tau hohaʻa ki aí. ʻOkú Ne ʻafioʻi foki hotau mālohingá pea mo e ngaahi holi hotau lotó.”

Naʻe fanauʻi ʻa Moisese Vilanueva Lopesi ʻi he ʻaho 13 ʻo Tīsema 1966, ʻi ‘Oasaka, Mekisikou, kia Lūpeni Vilanueva Palatasi mo Telafina Lopesi Tominikesi. Naʻá ne mali mo Letisia ʻEivalosi Losano ʻi he Temipale Mexico City Mexico ʻi he ʻaho 30 ʻo Sune 1995. ʻOkú na maʻu ha fānau ʻe toko tolu.

Naʻe maʻu ʻe ʻEletā Vilanueva ha mataʻitohi BA ki hono puleʻi ʻo e pisinisí mei he Southeast Regional University ʻi he 1997 pea mo ha mataʻitohi MA ki hono fakatupulaki ʻo e pisinisí mei he ʻapiako Fakatekinolosia ʻo Monitaleí (Tecnológico de Monterrey) ʻi he 2011. Naʻá ne ngāue kimuí ni mai ko ha pule lahi ʻo e Sertexa, ko ha kautaha feʻaveʻaki koloa.

ʻI hono uiuiʻi ʻa ʻEletā Vilanuevá, naʻá ne lolotonga ngāue ko ha Fitungofulu Fakaʻēlia ʻi Mekisikou. Kuó ne hoko foki ko ha palesiteni ‘o e Misiona California Arcadia mo ha aleaʻanga māʻolunga, tokoni ʻi ha kau palesitenisī fakasiteiki, pīsope, pea mo ha talēkita ʻo e vaʻa fetuʻutaki mo e kakaí.