ʻEletā Thierry K. Mutombo

Naʻe ʻi ai ha fakamoʻoni mālohi ʻa ʻEletā Tieli K. Mutomupou ki he ongoongoleleí ʻi he taimi naʻá ne maʻu ai ʻa hono uiuiʻi ke ngāue fakafaifekau ʻi heʻene kei talavoú. Naʻá ne papitaiso mo hono fāmilí ʻi hono taʻu 10, peá ne mātā tonu ʻa e founga mālohi ne hanga ai ʻe he ongoongoleleí ʻo liliu ʻa hono fāmilí.

Ka ne aʻu pē ki he taimi ne teuteu ai ke ngāue fakafaifekau ʻi he Misiona Côte d’Ivoire Abidjan, ne teʻeki ke ʻi ai haʻane fakamoʻoni mālohi ki he Tohi ʻa Molomoná. Kuo teʻeki ai ke ne lau ia kimuʻa.

Ne fakatukupaaʻi ʻa Tieli ʻe he pīsope ne ueʻi fakalaumālie ke ne lau e Tohi ʻa Molomoná he ʻaho kotoa pē kimuʻa pea ʻalu ʻo ngāue fakafaifekaú. Naʻá ne ʻoange foki kia Tieli ha kī ki he ʻapisiasi fakalotofonuá ke lava ke ne ako ai ʻo ʻikai fakahohaʻasi.

Ne lau tohi ʻa Tieli ʻi he ʻaho kotoa ʻi ha māhina ʻe tolu. ʻI he taimi naʻá ne ʻalu ai ki he malaʻe ngāue fakafaifekaú, ne ʻikai ngata pē ʻi heʻene maʻu ha fakamoʻoni mālohi ki he Tohi ʻa Molomoná, ka naʻá ne fakatupulaki ha tōʻonga ako naʻá ne tokoniʻi ia ʻi heʻene ngāue fakafaifekaú.

Naʻá ne pehē, “Ko e meʻa ngāue maʻongoʻonga taha ʻoku tau maʻu ke ʻomi ʻaki e kakaí ki he maama ʻo e ongoongoleleí pea mo hono tānaki ʻo ʻIsileli kuo fakamoveteveteʻí ko e Tohi ʻa Molomoná.”

Na‘e fanauʻi ʻa Tieli Kasuangi Mutomupou ʻi Kinisasa, Lepupelika Faka-Temokalati ʻo Kongokoú, ʻi he ʻaho 31 ʻo Sānuali 1976, kia ʻAnitoine Kasuangi Mutomupou mo Malia Telesi Matasanga Mutomupou. Naʻá ne mali mo Sai Netalī Sinitā ʻi ha ouau fakapule‘anga ʻi he ʻaho 29 ʻo Nōvema 2002. Naʻá na toki sila kimui ange ʻi he Temipale Johannesburg South Africa ʻi he ʻaho 19 ʻo Nōvema 2004. ʻOku ʻi ai ʻena fānau ʻe toko ono.

Naʻe fakaʻosi ako ʻa ʻEletā Mutomupou mei he ʻUnivēsiti ʻo Sepolomatí ʻi he 2010 mo ha mataʻitohi BA ʻi hono fakalele e pisinisí pea ʻi he 2012 naʻe maʻu hono BA ʻi hono tokangaʻi ʻo e ngaahi maʻuʻanga tokoni fakaetangatá. Naʻá ne ngāue maʻá e Siasí ʻi he Lepupelika Faka-Temokalati ʻo Kongokoú ko ha pule ʻi he Potungāue Hisitōlia Fakafāmilí mo e Maʻuʻanga Tokoni Fakaetangatá pea mo ha supavaisa ʻi he Potungāue Naunau Fakatuʻasino ʻo e Siasí.

ʻI he taimi ne maʻu ai e uiuiʻi ʻo ʻEletā Mutomupou ko ha Fitungofulu Taki Māʻolungá, naʻá ne lolotonga hoko ko e palesiteni ʻo e Misiona Maryland Baltimore. Naʻá ne hoko kimuʻa ko ha palesiteni fakasiteiki, tokoni ʻi ha kau palesitenisī fakasiteiki, taki ngāue fakafaifekau fakauooti, faiako Lautohi Faka-Sāpate, pea mo ha sekelitali pule he siteikí.