Bradley R. Wilcox

Lolotonga e kau ʻa Brother Palatilī (Palati) R. Uilikoki ki ha konifelenisi ʻa e toʻu tupú ‘i Kalefōniá, naʻá ne fetaulaki ai mo ha talavou naʻe ʻikai ke fie kau ki ai. Naʻá ne ʻalu atu ki he tokotaha taʻu hongofulu tupú ʻi ha lalo ʻakau malumalu, pea naʻe ʻikai fuoloa kuó na aleaʻi ‘a e tefito ʻoku sai‘ia taha ai ʻa e to‘u tupú—ʻa e sikeitipōtí.

Na‘e kole ange ʻe Brother Uilikoki ki he talavoú ke ne fakaʻaliʻali ange ha niʻihi ʻo e ngaahi founga sikeitipōtí. Naʻá ne saiʻia ai, pea fakaafeʻi e talavoú ke ne fakaʻaliʻali sikeitipooti ʻi he EFY he faʻahitaʻu māfana ko iá. Naʻe momou ʻa e talavoú ka naʻe faifai pē peá ne loto ki ai. Naʻá ne maʻu ha aʻusia liliu moʻui ʻi he EFY pea maʻu ʻene fakamoʻoni ki he ongoongoleleí.

Naʻe pehē ʻe Brother Uilikoki, “Naʻá ne ʻalu ki he EFY ʻi ha sikeitipooti, ka naʻá ne foki ko ha faifekau.”

Naʻe pehē ʻe Brother Uilikoki, “Kuo lahi e taimi kuó u feohi ai mo e fānaú mo e toʻu tupú, pea ʻoku ou ʻofa ʻi he toʻu tupú.”

Na‘e fanauʻi ʻa Palatilī Lei Uilikoki ‘i Polovo, ʻIutā, USA, ʻi he ʻaho 25 ʻo Tīsema 1959 kia Lei T. Uilikoki mo Valo C. Uilikoki. Naʻá ne tupu hake ʻi Polovo tuku kehe ʻa e taimi ne nofo ai ʻi ha ngaahi taʻu ʻi heʻene kei siʻí ʻi ʻItiopea.

Naʻe mali ʻa Brother Uilikoki mo Tēpola Kaneli ʻi he Temipale Provo Utah ‘i he ʻaho 7 ‘o ʻOkatopa 1982, hili ia ‘ene ngāue fakafaifekau taimi kakato ʻi he Misiona Chile Viña del Mar. Ko ha ongomātuʻa kinaua ki ha fānau ʻe toko fā.

Naʻe maʻu e BA mo e MA ʻo Brother Uilikokí mei he ʻUnivēsiti Pilikihami ʻIongí pea maʻu hono Mataʻitohi Toketaá ʻi he akó mei he ʻUnivēsiti ʻo Uaiōmingí. Kuo fakalāngilangiʻi ʻa Brother Uilikoki ʻaki ha ngaahi pale ki heʻene ngāue ʻi he akó, pea ngāue mateaki ʻi ha ngaahi taʻu ʻe 30 tupu maʻá e polokalama EFY ʻa BYU, pea kuó ne fiefia ʻi heʻene hoko ko ha faiako ʻi he Uike Ako ʻi he ʻApiakó.

Naʻe nofo ʻa Brother Uilikoki mo hono fāmilí ʻi Nuʻu Sila pea mo Sipeini lolotonga ia ʻene tokangaʻi ʻa e ngaahi polokalama ako mei he ngaahi feituʻu mamaʻó maʻa BYU. Kuó ne tohi ha ngaahi tohi lahi pea ʻokú ne lolotonga hoko ko ha palōfesa ʻi he Vaʻa ʻo e Ngaahi Folofola Fakakuongamuʻá ʻi BYU.

Kuo hoko ʻa Brother Uilikoki ko ha palesiteni ʻo e Misiona Chile Santiago East pea hoko ko ha mēmipa ʻo e poate lahi ʻo e Lautohi Faka-Sāpaté, ko ha tokoni ‘i ha kau palesitenisī fakasiteiki mo e pisope ʻo ha uooti ʻo e kau taautaha kei talavoú. ʻI he taimi naʻe uiuiʻi ai iá, naʻá ne hoko ko ha aleaʻanga māʻolunga mo e Palesiteni ‘o e Kau Talavou ʻi he siteikí.