ʻEletā Jeremy R. Jaggi

ʻI he kei taʻu hongofulu tupu ʻa ʻEletā Sēlemi R. ʻIakí, ne maʻu ʻe hono kiʻi tuofefine taʻu fitu ko Kilisitení, ha siemu naʻá ne uesia hono ʻutó. Naʻe pehē ʻe he kau toketaá he ʻikai ke ne moʻui.

Naʻe tūʻulutui e talavou ko Sēlemí ʻi hono veʻe mohengá ʻi he ʻapi honau fāmilí ʻi Sōleki Siti, ʻIutā, USA pea tautapa ki he ʻEikí ke ʻilo ʻa e ʻuhinga kuo pau ke mate kei siʻi aí. Ka naʻe maʻu ʻe hono tuofefiné ha tāpuaki lakanga fakataulaʻeiki peá ne moʻui.

Ko ha founga ʻeni naʻe kamata ai e feinga ʻa e talavou taʻu 17 ko Sēlemí “ke ne taau ʻi he ʻao ʻo e ʻOtuá,” ʻo tataki ai ia ke ne fuofua lau fakamaatoato ʻa e Tohi ʻa Molomoná. Naʻá ne ngāue fakafaifekau taimi kakato kimui ange ʻi he Misiona Ohio Cleveland.

Ne toe tūʻulutui ʻa Sēlemi ʻo lotu ʻi he loto tāumaʻu ʻi he ngaahi taʻu kimuí ʻi he fāʻele taʻehoko ʻa hono uaifi ko ʻEimí ʻi heʻena tamasiʻi fika tolú. Naʻá ne pehē, “Ne u ongoʻi he taimi ko iá, ha nonga moʻoni—ko ha nonga ʻe ala fakamatalaʻi pē ko e toʻukupu ʻofa ʻo ha Tamai Hēvani ʻokú Ne ʻōʻōfaki au ʻi he māfana ʻo e Laumālie Māʻoniʻoní.”

Ne faitokonia ia ʻe he melino ko iá ʻi he vahaʻataimi nounou ne moʻui ai e kiʻi pēpeé pea mo e ngaahi māhina ʻo e loto mamahi ne toe hoko ai ha tamatō ʻe tahá. Naʻá ne pehē, “ʻOku ʻahiʻahiʻi kotoa kitautolu ʻi he founga pē ʻa kitautolu, ka ʻoku tau ui ia kotoa pē ko e meʻa fakafiefia’ [Sēmisi 1:2] kuo ʻomi ʻe he Fakamoʻuí ha founga ke tau maʻu ʻa e melinó mo e fiefiá.”

Ne fanauʻi ʻa Sēlemi Lōpeti ʻIaki ʻi Sōleki Siti, ʻIutā, USA, ʻi he ʻaho 23 ʻo Māʻasi 1973, kia Lōpeti Sitanilei ʻIaki mo Siuti Ane Lusi. Naʻá ne mali mo ʻEimi Ane Sitiuati ʻi he Temipale Salt Lake ʻi he ʻaho 12 ʻo Sune 1995. Ko e mātuʻa kinaua ki ha fānau ʻe toko nima.

Naʻe maʻu ʻe ʻEletā ʻIaki ha mata‘itohi BA ʻi he saienisi ʻo e ʻulungaanga mo e tuʻunga mo‘ui leleí mei he ʻUnivēsiti ʻo ʻIutaá pea mo ha mataʻitohi MA ʻi hono puleʻi e pisinisí mei he ʻUnivēsiti Pepatainí. Naʻá ne taki ʻi he fefakatauʻaki ʻa e ʻōfisi fakavahe maʻá e Alkermes pea hoko ko ha pule leʻoleʻo ʻi he fakatau kelekele ʻa e HCA Investments ʻi he taimi ne uiuiʻi ai iá.

Kuo ngāue ‘a ʻEletā ʻIaki ko ha Fitungofulu Fakaʻēlia, palesiteni ʻo e Misiona Utah Ogden, tokoni sekelitali pule fakasiteiki, pīsope, palesiteni ʻo e kōlomu ʻo e kaumātuʻá, faiako semineli, tokoni ‘i ha kau palesitenisī fakauooti ʻa e Kau Talavoú, faiako fakasiteiki ʻo e kalasi teuteu ngāue fakafaifekaú, mo ha taki ngāue fakafaifekau fakauooti.