ʻEletā Jorge T. Becerra

Naʻe mā mo anga fakalongolongo ʻa Hōkei T. Pasela ʻi heʻene tupu haké, ka naʻe ʻoange ʻe heʻene palesiteni fakamisioná ha ngaahi faingamālie ke hoko ko ha taki. Naʻe foki ʻa Hōkei ki ʻapi mei he Misiona California Arcadia mo ha loto holi ke kau atu ki he ngāue ʻa e ʻEikí ʻi he toenga ʻo ʻene moʻuí.

Naʻe lahi mo ha toe ngaahi faingamālie fakataki ne hoko vave mai ne ʻikai ke ne ʻamanaki ki ai. Ne uiuiʻi ia ʻi hono taʻu 27 ki ha kau pīsopeliki. Ne uiuiʻi ia ko ha pīsope ʻi hono taʻu 32. Naʻá ne ongoʻi taʻefeʻunga ʻi he kamataʻangá ʻi he taimi ne fakafeʻiloaki ange ai e kakaí mo honau ngaahi faingataʻaʻiá.

Naʻá ne talaange ki heʻene tangataʻeikí, “ʻOku ʻikai ke u ʻilo ʻa e meʻa ʻoku ou faí.”

Naʻe akoʻi ange ʻe he tali ʻa ʻene tangataʻeikí ha lēsoni mahuʻinga fau, ʻo fakamanatu ange kiate ia ʻa e falala ange ʻa ʻene palesiteni fakamisioná kiate iá, mo tokoniʻi ia ke mateuteu ki he ngaahi uiuiʻi fakatakimuʻa ʻi he kahaʻú, kau ai ʻa hono uiuiʻi ko ha palesiteni fakasiteiki ʻi hono taʻu 37.

“Naʻe talamai ʻe heʻeku tangataʻeikí, ʻFoha, ko e taʻu fiha nai ʻeni ʻo e Laumālie Māʻoniʻoní?’” Ko e manatu ia ʻa ʻEletā Paselá. “Ko ha momeniti akoʻi ma‘ongoʻonga ia kiate au he naʻá ku ʻilo ʻe lava ke u fakahoko ha faʻahinga meʻa pē ʻe kole mai ʻe he ʻEikí ke u fai.”

Kuo manatu maʻu pē ʻa ʻEletā Pasela ki he lēsoni ko iá lolotonga e ngaahi taʻu lahi ʻo e ngāue ʻosikiavelenga ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.

Naʻe fanauʻi ʻa Hōkei ʻEtuato Talesi Pasela ʻi he ʻaho 18 ʻo Tīsema 1962, kia Huani C. Pasela mo Sīlia T. Pasela ʻi Sōleki Siti, ʻIutā, USA, ʻa ia naʻá ne tupu hake pē ai.

Hili e ngāue fakafaifekau taimi kakato ʻa ʻEletā Paselá, naʻá ne mali mo Tepi ʻAilini Sanipeika ʻi he Temipale Salt Lake ʻi he ʻaho 10 ʻo ʻAokosi 1984. Ko ha ongomātuʻa kinaua ki ha fānau ʻe toko fā.

Naʻe maʻu ʻe ʻEletā Pasela ha mataʻitohi BA ʻi he ako fakalūkufuá mei he ʻUnivēsiti ʻo ʻIutaá pea mo ha mataʻitohi BA ʻi he tauhitohí mei he Kolisi ʻo e Komiunitī ʻo Sōlekí. Naʻá ne ako ki he pisinisí ʻi he ʻUnivēsiti ʻo Fīnikí. ʻI he 1998 naʻá ne hoko ko ha hoa ngāue ʻi he Allegis Advisor Group, ʻa ia ko ha kautaha faifaleʻi fakapaʻanga. ʻI he taimi ne uiuiʻi ai ia ko ha Fitungofulu Taki Māʻolungá, naʻá ne lolotonga ngāue ko ha faifaleʻi fakahū paʻanga maʻá e Intermountain Financial Partners.

Kuo hoko ʻa ʻEletā Pasela ko ha Palesiteni ʻo e Kau Talavou ʻi he uōtí, tokoni ʻi ha kau palesitenisī fakamisiona, tokoni ʻi ha kau palesitenisī fakakolo, faiako semineli, tokoni ʻi ha kau pīsopeliki, pīsope, palesiteni fakasiteiki, mo e palesiteni ʻo e Misiona California Arcadia. ʻI he taimi naʻe uiuiʻi ai iá, naʻá ne lolotonga hoko ko ha Fitungofulu Fakaʻēlia.