Nagkatigulang nga Matinud-anon
Mga Panalangin ug mga Hagit sa Pagminyo sa Ulahing Bahin sa Kinabuhi
Ang tagsulat nagpuyo sa Utah, USA.
Pipila ka mga istorya ug mga sugyot alang sa pagpalig-on sa kaminyoon sa bisan unsang pangidaron.
Paghulagway ni Malte Meuller; imahe sa mga singsing nga pangkasal gikan sa Getty Images
Ang pagminyo sa ulahing bahin sa kinabuhi mahimong maglambigit og pipila ka talagsaon ug kalit nga mga kausaban nga wala damha. Apan kon ang mga magtiayon maglakaw niini nga dalan uban sa hugot nga pagtuo, sila makadiskubre og dako nga kalipay ug makapalambo og Kristohanong mga hiyas. Aniay tulo ka leksyon sa kinabuhi gikan niadtong kinsa nagkahigugmaay atol sa ilang katigulangon, gisundan og tulo ka sugyot alang sa paghiusa og mga pamilya. Nanghinaut ko nga ang pagpaambit niini makatabang sa mga edaran na nga bag-ong minyo—o niadtong naghulat pa sa kaminyoon—nga makaamgo nga wala sila mag-inusara sa ilang panaw. Kining mugbo nga mga baruganan makaaghat og mga ideya alang sa pagpalig-on sa bisan unsa nga kaminyoon, bisan kon 50 na ka tuig kamo nag-uban o 5 ka bulan.
Pagbaton og Mahangturon nga Panglantaw
Si Mona (ang mga ngalan giusab) wala naghunahuna nga siya makakita gayud og mahangturong kauban human sa duha ka pakyas nga kaminyoon. Dayon mibalhin siya ngadto sa usa ka sentro sa pagretiro ug nahimamat si Bob. Nagkahigalaay sila, ug gipaila-ila niya siya ngadto sa ebanghelyo. Atol sa higayon nga sila kaslonon, nahiling si Bob nga adunay kanser. Nangutana siya ni Mona kon gusto pa gihapon siya nga makigminyo kaniya.
“Siyempre,” miingon siya. “Makigminyo ko kanimo alang sa kahangturan, dili lamang niini nga kinabuhi.”
Ang magtiayon naminyo, ug si Bob nabunyagan. Silang duha parehong naka-wheelchair dihang gisilyo sila sa templo. Si Mona miingon nga adunay usa ka celestial nga kahayag mahitungod ni Bob nianang adlawa. Nabuhi siya og laing unom ka bulan, nagmaya sa matag adlaw kauban sa iyang hinigugma. Karon si Mona dili makahulat hangtud nga sila magkauban pag-usab.
Magbansay sa Pagpakig-istorya
Sa dihang si Cassie nahigugma ni Albert, nabalaka siya mahitungod sa pagbalik ngadto sa samang negatibo nga mga naandang pagpakig-istorya nga iyang nasinati sa iyang unang kaminyoon. Busa sila magkaubang mikuha og klase alang sa kaminyoon [marriage class], diin nakakat-on sila nga:
-
Magbansay og mga kahanas sa pagpaminaw.
-
Matinuorong pagpaambit sa mga gibati.
-
Magtinabangay, dili magkompetensyaay.
-
Magsinabtanay bisan og adunay dili pag-uyon kon gikinahanglan.
-
Maghisgot sa pagdumala sa kwarta.
“Ang pagtukod og malampusong kaminyoon nagkinahanglan og pagbansay, apan igo ang among paghigugmaay aron mahimo kini,” miingon si Cassie.
Pagsagubang sa mga Kausaban inubanan sa Gugma
Gihinuktukan og maayo ni Amanda ang iyang patriyarkal nga panalangin. Miingon kini nga mahimo siyang mahinungdanon kaayo nga impluwensya sa iyang mga anak ug mga apo, apan milapas na siya sa edad nga makaanak ug wala gayud maminyo. Dayon nahimamat niya si Patrick, usa ka piloto. Malingaw sila nga magkaubang maminaw og musika ug magdula og golf. Wala madugay, naminyo sila.
Ang unang asawa ni Patrick namatay, diin siya adunay tulo ka anak nga babaye. Bisan tuod og naguol sila sa pagkawala sa ilang inahan, sila sa katapusan mihangop sa gugma ni Amanda. Mga katuigan ang milabay.
Usa ka adlaw, si Patrick nagpalupad og eroplano ug wala na makabalik. Human sa mga semana nga pagpangita, ang eroplano nakit-an dapit sa duol nga lim-aw. Nakaamgo si Amanda nga siya na lamang ang buhi nga ginikanan nga nahibilin alang sa mga anak nga babaye ni Patrick. Mihimo siya og dako nga paningkamot sa pagsuporta ug pagpakig-istorya kanila, ilabi na atol sa ilang kaguol.
Karon siya ug ang iyang humabdos nga mga babaye [stepdaughters] nagkasuod na og maayo. Motawag sila kaniya alang sa tambag ug modangup ngadto kaniya human sa usa ka makaugtas nga adlaw. Uban sa pagpaubos ug pasalamat, nakaamgo si Amanda nga ang iyang patriyarkal nga panalangin natuman sa katapusan.
Tulo ka Sugyot alang sa Paghiusa og mga Pamilya
-
Magkaubang magdula. Sila si Terry ug Lucinda parehong anaa sa ilang ikaduhang mga kaminyoon. Ang humabdos nga lalaki ni Terry ganahan nga mag-golf, mao nga nagplano sila nga magkaubang mag-golf matag semana. Si Lucinda mipahimutang og usa ka espesyal nga dapit nga adunay mga libro, mga dula, ug mga puzzle alang sa mga apo kon mobisita sila.
-
Magmapailubon. Human si Cassie ug Albert naminyo, ang mga anak ni Cassie midumili sa pagbisita sa Pasko. Ang magtiayon mihukom gihapon sa paghatud og mga regalo, nga mogakos sa mga apo, ug mopahibalo sa tanan nga welcome sila bisan unsang panahona. Wala ra magdugay ang tibuok pamilya nakat-on sa paghigugma ni Albert ug misugod sa pagpundok alang sa mga holiday.
-
Paningkamot gayud og maayo sa pagpakigdait. Si Amanda mobasa og mga istorya ngadto sa iyang bag-ong mga apo pinaagi sa computer ug gani nag-andam og sayon nga mga leksyon sa siyensya alang kanila. Laing inahan mopasiugda og online nga chat kausa sa usa ka bulan uban sa mga sakop sa pamilya nga nagpuyo sa lain-laing mga dapit sa nasud.
Ang paghigugma niadtong kinsa moabut sa atong kinabuhi—sama sa bag-ong mga kapikas ug mga anak—tingali dili sayon, apan ang kaminyoon ug ang bag-o nga mga pamilya makahatag og kalipay nga mohulip sa kamingaw. Samtang mohangyo kita sa Langitnong Amahan sa pagpanalangin kanato og gugma nga putli, kita mahimong, sa bisan unsang edad, motubo nga mas takus nga makighimamat sa atong Manluluwas.