Ang Buhong nga Grasya ni Kristo

Imahe

babaye nga nagtutok sa layo

Adunay tukma kaayong usa ka leksyon nga akong nahinumduman gikan sa akong klase sa physics sa kolehiyo. Bugtong klase kadto nga hapit ako mahagbong, ug paglabay sa tanang katuigan, ang ikatulong balaod ni Newton mao na lamang ang butang nga ingon og nagpabilin kanako. Ang balaod ingon og sama niini: sa matag lihok, adunay kaparehas ug katugbang nga reaksyon.

Sa akong kinabuhi, akong nakita kon sa unsang paagi kini nga balaod ingon og tinuod diha sa espirituhanong mga kasinatian, dili lang sa pisikal nga mga butang. Akong nakita kon sa unsang paagi ang Ginoo mobalos sa mga pwersa sa dautan pinaagi sa gahum sa Iyang grasya. Diin midagaya ang sala tungod sa Pagkapukan, ang grasya midagaya usab tungod kang Kristo ug sa Iyang Pag-ula.

Ang buhong nga grasya ni Kristo.

Mibati ako sa Iyang grasya. Mahikap. Baga. May igong gahum nga manuotsuot sa kasingkasing. Si Pablo mihulagway niini pinaagi sa pag-ingon nga diin ang sala midagaya, ang grasya “labaw pang midagaya” (Mga Taga-Roma 5:20). Nasaksihan ko kana nga kamatuoran. Samtang ako mibati sa kadako sa Iyang grasya diha sa mga templo ug sa mga chapel, mibati usab ako sa labihan kadako nga grasya sa Manluluwas sa sulod sa mga pultahan sa bilanggoan.

Nataral ako ngadto sa mga dapit nga susama sa bilanggoan—tingali tungod kay may anak ako nga lalaki nga nabilanggo, o tingali tungod kay nahibalo ako unsay pagbati kon ginapos ka sa butang nga dili nimo mahimong buntugon nga ikaw ra sa imong kaugalingon. Mga tuig ang milabay, mibiyahe ko latas sa nasud sa Gadarenes. Hilum kini nga dapit nga adunay lunhaw, nga patungas ug palugsong nga kabungturan. Samtang nagbiyahe ko, naghunahuna ko kon unsa kaha ang pagbati nga sama sa binilanggo ngadto sa usa ka indibidwal diha sa Bag-ong Tugon.

Diha sa Marcos 5 ug sa Lucas 8, atong mabasa ang mahitungod sa dapit sa mga lubnganan. Usa ka tawo nga walay mga bisti gisakit magabii ug maadlaw. Dihang nakakita si Jesus kaniya, nangutana Siya sa ngalan sa maong tawo.

“Legion,” ang tawo mitubag, nag-ingon nga gisudlan siya og daghang mga demonyo (Marcos 5:9; Lucas 8:30). Apan si Jesus nahibalo unsaon sa pagtangtang kon unsa man ang nagbihag niini nga tawo. Adunay mga baboy, ug usa ka pangpang, ug usa ka linaw, ug dayon … usa ka naayo nga tawo, naglingkod diha sa tiilan sa iyang Manluluwas. Nagbisti na ug maayo na ang panimuot. Dili ko kapugong kondili maghunahuna kon unsay anaa sa hunahuna ug mga pagbating mikuyanap sa kalag niining tawhana karon nga sa katapusan nagmalinawon na siya.

Dihang si Kristo misakay sa barko aron molayag, ang tawo mihangyo nga mokuyog Kaniya. Tingali mibati siya nga siguradong luwas kon anaa duol sa Ginoo. Apan ang Manluluwas sa iyang hunahuna adunay lahi nga misyon alang kaniya. Gihangyo ni Jesus ang maong tawo sa pagpauli ug pagsugilon ngadto sa iyang mga higala mahitungod sa unsay nahitabo. Ug mao nga ang tawo miadto, nagpamatuod sa tibuok lungsod “unsa kadako ang nabuhat ni Jesus alang kaniya” (Lucas 8:39).

Gisulayan nako sa paghunahuna ang kinabuhi nianang tawhana sa wala pa si Jesus, sa wala pa makasinati sa Iyang grasya ug gahum. “Adlaw ug gabii, magsuroysuroy siya sa mga lubnganan ug kabungtoran nga magsigig singgit ug magsamadsamad sa iyang lawas pinaagi sa mga bato” (Marcos 5:5). Dayon si Kristo ug ang Iyang grasya miabut, sa mao gayud nga dapit diin anaa siya gigapos. Ug ang kinadenahan nga kinabuhi—pagkabihag ug kontrolado sa mga demonyo—napulihan og usa ka pagpamatuod bahin sa kalooy ug gahum ni Jesukristo.

Nakasulay ka bang mobati nga ang imong nangagi posibling modaot kanimo? Adunay Usa kinsa makakita sa maayo diha kanimo, bisan unsay imong kinabuhi kaniadto. Nakaila Siya sa imong ngalan. Nag-andam Siya og mahinungdanong mga butang alang niadtong kinsa mangita sa Ginoo. Nianang dapita diin ikaw mibati nga ginapos, pangamuyo sa Iyang grasya. Salig lang nga aduna kini diha sa kabuhong.

Si Jesukristo nakakita kanimo.

Makatabang Siya kanimo sa pagbuntog.

Nakakita ako Kaniya nga miusab sa kinabuhi sa akong anak nga lalaki.

Makahimo Siya, ug mohimo, sa samang butang ngadto sa tanan nga moduol Kaniya.