Kitang Tanan Makakaplag og Kalipay sulod sa Atong Personal nga mga Bilanggoan

Imahe

babaye sa may bintana

“Kay ako nakakat-on man sa pagpahaom sa akong kaugalingon sa bisan unsang kahimtang nga akong nahimutangan” (Mga Taga-Filipos 4:11). Mao kini ang mga pulong ni Pablo sa usa ka sulat ngadto sa mga tawo sa Filipos. Apan ang pagpahaom sa bisan asa ang atong nahimutangan o unsay atong gisinati mas sayon nga litukon kay sa nabuhat.

Labawng ikatingala nga si Pablo, sa tanang mga tawo, nakahimo nga mopahaom diha sa kahimtang nga iyang nahimutangan. Misulat siya niini nga mga pulong samtang nabalhog sa bilanggoan—ug gani, dili kini sama sa mga bilanggoan nga atong mahunahuna karon. Karon, ang mga bilanggoan sa kasagaran usa ka lawak nga may konkretong mga tisa, usa ka kasilyas, pagkaon, ug limpyong mga sapot ug may kahigayonang makatrabaho ug makipaghugoy-hugoy sa uban, pinakaminos sa ubang paagi. Apan si Pablo gibilanggo sigun sa gihulagway sa mga tigsaysay diha sa “napulog duha ka pye [3.6 m] ang giladmon ngadto sa yuta” ug “makapikal ug makalolooy tungod sa kahugaw, kangitngit, ug sa kabaho.” Kini nga lawak, nga may 6 ½ ka pye (2 m) ang gitas-on, 30 ka pye (9 m) ang gitas-on, ug 22 ka pye (7 m) ang gilapdon, mao ang dapit diin itambog “ang mga binilanggo kinsa gihukman nga patyon pinaagi sa paghigot sa liog o palunosan.”¹

Didto gibutang si Pablo.

Ug bisan pa niana, hinoon, niining makahadlok nga dapit, misulat siya sa unsay gitawag sa daghang Kristiyano nga pinakamalipayong basahon diha sa Biblia. Militok siya og pasalamat (tan-awa sa Mga Taga-Filipos 1:3), paglaom (tan-awa sa Mga Taga-Filipos 1:20), ug pagsalig diha sa Ginoo (tan-awa sa Mga Taga-Filipos 2:19). Gihisgutan niya ang kalipay ug kamaya kapin sa 15 ka higayon niini nga sulat lamang.

Dili sama ni Pablo, kadaghanan kanato wala makagahin sa atong mga adlaw nga kinandaduhan sulod sa mga bongbong sa bilanggoan. Apan daghan kanato pwede nga makandaduhan sa usa ka susama sa bilanggoan nga kahimtang sa hunahuna—natanggong sa usa ka pagsulay nga daw motapos kanato. Ang atong mga bilangoan posibling mao ang pagkawala sa trabaho, pagkamatay sa usa ka minahal, pag-inusara, kahadlok, problema sa pinansyal, pagkaadik, kasakit, o kahingawa. Kon mobati kita nga nakandaduhan diha sa atong personal nga mga bilanggoan, kita ba, sama ni Pablo, mipuno sa atong mga kasingkasing ug sa atong mga pulong uban sa pagpasalamat, paglaom, pagtuo, pagsalig, ug kalipay? Makalantaw kaha kita og balik sa atong mga panahon sa pagkabilanggo ug ikonsiderar kini isip ang pinakamalipayong mga yugto sa atong kinabuhi? Sa unsang paagi kaha kini posible?

Mahimo kini nga posible kon kita motuo sa unsay gituohan ni Pablo dihang miingon siya, “mahimo ko ang tanang butang pinaagi kang Kristo nga nagapalig-on kanako” (Mga Taga-Filipos 4:13). Pinaagi kang Jesukristo kita mapuno kaayo sa kalipay bisan sa atong labing lisud nga mga dapit, “sa bisan unsang kahimtang nga akong nahimutangan” (Mga Taga-Filipos 4:11).

Si Pablo mihangyo sa mga tawo sa Filipos, “Ayaw kamo kabalaka mahitungod sa bisan unsang butang”—sa laing pagkasulti, ayaw palabihi ang pagkabalaka mahitungod sa bisan unsang butang, “apan sa tanang butang ipahibalo ninyo sa Dios ang inyong mga hangyo pinaagi sa pag-ampo ug sa pagpangamuyo uban ang pagpasalamat” (Mga Taga-Filipos 4:6). Si Pablo mipadayon, “Ug ang kalinaw sa Dios, nga milapaw sa tanang pagpanabot, magbantay sa inyong mga kasingkasing ug sa inyong mga hunahuna diha kang Kristo Jesus (Mga Taga-Filipos 4:7). Kon kita anaa sa atong mga bilanggoan ug mag-ampo sa tanan nga atong naangkon, nga magpasalamat sa Langitnong Amahan alang sa tanan nga Iyang gihimo, kita makasiguro gayud nga ang tanan mamaayo ra tungod ni Jesukristo.

Hinumdumi lamang, nga tungod kang Kristo nga, sa dihang si Pablo gibilanggo, gisulat niya ang labing malipayon nga basahon diha sa Biblia. Ang atong kaugalingong mga pagkabilanggo mamahimo usab nga atong labing malipayon nga mga yugto. Sama sa gitudlo ni Presidente Russell M. Nelson: “Kon ang sentro sa atong kinabuhi anaa sa plano sa Dios sa kaluwasan … ug ni Jesukristo ug sa Iyang ebanghelyo, mobati kita og kalipay bisan unsa pay mahitabo—o wala mahitabo—sa atong kinabuhi.”² Kita pweding magmalipayon ug malig-on pinaagi ni Jesukristo, bisan unsa pay atong kahimtang.