Kon Ikaw Wala Mahibalo Unsay Isulti

Sa akong hunahuna kana nga pagkawala sa usa ka anak tingali ang kinapaitang butang nga mahitabo sa usa ka ginikanan. Ug walay makatangtang niana nga kasakit, apan ang mga tawo sa imong palibut makahimo og dako aron makatabang kanimo nga makasugakod sa imong kasubo. Atol niana nga makalilisang nga panahon, wala magkulang ang among pamilya, mga higala, o ang tabang. Sukad sa una gayud nga gabii nga nakita namo nga siya wala na, ang mga tawo mitabang. Ang among mga silingan, mga higala ni Daniel, ug ang among mga lider sa Simbahan nangabut. Ang mga sister sa Relief Society nagdala og mga pagkaon, ug dunay wala mailhing mga donor mihatag og igo alang sa among mga panginahanglan.

Ang among bishop sa wala madugay misulti kanamo nga daghang tawo ang gustong motabang apan wala mahibalo unsaon. Ug mao nga nangutana sila kaniya, “Unsay among mahimo alang sa mga Hunt?”

Wala kini mahitabo sa kanunay, apan usahay kon ang mga tawo makadungog mahitungod ni Daniel, dili sila mahibalo unsay isulti o unsaon nila kami sa pagtratar. Sa akong hunahuna susama ra kini sa panahon diin dili kita mahibalong makigsulti og tawo nga lahi og pinulongan. Dili kita mahibalo unsay isulti o mabalaka basin makasulti kita og sayop, mao nga dili na lang kita makigsulti kanila. Apan palihug tabang lang gyud. Ang mamatyan makapasubo ug makapabati nga nag-inusara. Ang katinuod nga gilibutan kami og daghan kaayo kinsa mitabang gayud nakahimo sa tanan nga kalainan.

Usa ka butang diin kami nakapasalamat mao ang among nadungog nga mga sugilanon mahitungod sa among anak. Wala kami mabalaka kang Daniel. Nahibalo kami unsa nga matang siya nga pagkabata. Nahibalo kami nga may sakit siya, ug nahibalo kami nga “ang Ginoo nagtan-aw sa kasingkasing” (1 Samuel 16:7). Ug si Daniel adunay usa ka mapinanggaon nga kasingkasing. Nahibalo kami niana. Apan ang pagkadungog sa mga pagsugilon sa mga tawo sa kaugalingon nilang mga istorya bahin kang Daniel talagsaon.

Si Nate Olsen usa sa mga higala ni Daniel. Barkada na sila sukad pa sa unang ang-ang sa eskwelahan. Dihang si Nate nauli og sayo gikan sa iyang misyon tungod sa medikal nga mga hinungdan, gidapit dayon siya ni Daniel og paniudto. Misugilon si Nate sa unsang paagi si Daniel didto aron sa pagpaminaw, paghigugma, ug pagdasig—sa oras nga si Nate mibati nga nawala ug nag-inusara. Sigun sa giingon ni Nate, si Dan mao ang matang sa tawo nga tinuod gayud nga nagpakabana sa mga tawo.

Importante ang imong pagkaikaw kon si kinsa ka ug sa pag-angkon nga ikaw tawo lamang. Usahay magkinahanglan kita nga mangayo og tabang, aron sa pagtabang—bisan kon kita ang gisakitan. Kita makahimo sa pagdawat sa uban ug motugot nga makita nila kon si kinsa kita.

Pito ka tuig ang milabay, lisud gihapon kadto. Usahay si Celi mokalit lang sa paghilak, nga mag-ingon, “gimingaw ko sa akong anak. Gimingaw ko sa akong anak.” Apan gipadayag niya nga siya adunay mga kahupayan nga malahutay kadto nga mga panahon—espirituhanong kahupayan. Ang espirituhanong kahupayan maoy hingpit nga komunikasyon. Ang pagtinguha og espirituhanong kahupayan mao ang pinakamaayong paagi aron bation ang hingpit nga pagkahisakop. Ug kini nga espirituhanong kahupayan naglakip sa mga tawong anghel kinsa mibati og kadasig sa pag-adto ug pagtabang.

Si Sheri L. Dew, kanhi Ikaduhang Magtatambag sa Kinatibuk-ang Kapangulohan sa Relief Society, kausa mipaambit og usa ka istorya mahitungod sa usa ka General Authority kinsa nangutana unsaon nimo sa pagkaila nga ang usa ka tawo tinuod nga sumusunod ni Jesukristo. Ang tubag nakapalibug kanako sa sinugdanan, apan karon mouyon na gayud ako: “Ang paagi nga mailhan nimo nga ang usa ka tawo tinuod nga nakabig kang Jesukristo mao ang pagkahibalo kon giunsa nianang tawhana sa pagtratar ang uban.”¹ Ang Kristohanong paagi sa pagtratar sa uban mao ang pagtahud, paghigugma, ug pagkamanggiloy-on—bisan kinsa kita o unsay atong maagian.