Pagkaplag sa Kalig-on ug Kaisug sa Paglupad
Isip mga anak sa Dios, ang atong diosnong kinaiya naghatag kanato sa potensyal nga makalupad sa espirituhanong paagi.
Bag-ohay lang, usa ka parisan sa salampati misugod sa pagtukod og salag sa usa ka kahoy sa akong tanaman. Nagtan-aw ko samtang nagpundok sila og gagmay nga mga sanga sa paghimo og unsay mahimo nilang panimalay sa katapusan.
Pipila ka adlaw ang milabay, akong nakit-an ang walay sulod nga mga bayanan sa itlog sa kasagbutan. Duha ka matahum nga piso ang nakagawas sa itlog. Paspas kaayo silang midako nga sa wala madugay hapit na sila masama ka dagko sa ilang inahan.
Usa ka buntag nagtan-aw ko samtang usa sa mga piso, nagbarug sa kilid sa salag, mihimo og pipila ka pagsulay sa paglupad. Sa katapusan, ang piso nga salampati milukso, milupad ngadto sa atop sa among panimalay. Sulod sa pipila ka adlaw, kining maisugon nga salampati naglupad na uban sa iyang inahan.
Ang laing piso, sa laing bahin, nagtan-aw gikan sa salag. Tingali naghunahuna nga moabut ang adlaw nga kini moapil kanila. Ako adunay mga pagduha-duha. Kini nga piso nga salampati ingon og walay tinguha sa paglupad.
Sa akong katingala, hinoon, paglabay sa pipila ka adlaw akong nakaplagan ang piso nga naglakaw diha sa sagbot ubos sa salag. Klaro, nga kini misulay sa paglupad. Sulod sa pipila ka adlaw human niana, ang piso mihimo og daghang bakikaw nga mga paningkamot sa paglupad. Sa katapusan, nagmalampuson kini, nakalupad balik ngadto sa salag ug gikan didto ngadto sa kalangitan.
Isip mga anak sa Dios, ang atong diosnong kinaiya naghatag kanato sa potensyal nga makalupad sa espirituhanong paagi. Tingali, hinoon, makahimo kita sa sayop nga pagsukod sa atong pag-uswag sa paagi nga ako sa sinugdanan misukod sa pag-uswag sa maduhaduhaon nga piso nga pati basi sa pag-uswag sa igsoon niini. Kon atong itandi ang atong espirituhanong mga paningkamot ngadto sa uban nga atong gihunahuna nga mas maisugon, kita tingali maghunahuna nga kita walay nahimo nga pag-uswag.
Ang kaaway gusto usab nga kita maghunahuna nga kita dili mouswag sa espirituhanon nga paagi. Gusto siya nga kita magtuo nga ang temporal nga mga butang lamang ang importante, busa motintal siya kanato uban sa mga makabalda sama sa mga uso ug kawang nga mga butang sa kalibutan.
Atol sa atong yutan-ong pagsulay, moagi kita og daghang pagsulay, mga kalisdanan, ug mga kapakyasan. Apan ang atong Langitnong Amahan misulti kanato, “Magmakusganon ka ug magmaisug; ayaw pagkahadlok ug dili magmaluya: kay ang Ginoo nga imong Dios, magauban kanimo bisan asa ikaw paingon” (Josue 1:9). Kon kita mapakyas, ang Ginoo naglaum kanato nga magpadayon sa pagpaningkamot, sa paghinumdom sa atong potensyal, ug, sama sa piso, sa pagtumong sa atong mga panan-aw ngadto sa langit.