Ang Bili sa Matag Kalag

Sa dihang si Nephi gipangutana sa usa ka anghel kalabut sa pagpakig-angay sa Dios, mapainubsanon sya nga mitubag, “Ako nasayud nga siya nahigugma sa iyang mga anak; bisan pa niana, ako wala masayud sa kahulugan sa tanan nga mga butang’ (1 Nephi 11:17). Kanunay kong nahibulong kon giunsa ni Nephi nga makasabut niining yano, matahum nga kamatuoran: ang Dios nahigugma sa Iyang mga anak. Klaro nga siya nasayud sa doktrina ni Kristo sama sa gitudlo sa iyang “mga matarung nga ginikanan” (1 Nephi 1:1). Apan nasayud usab siya sa “ngano” sa Manluluwas. Ug unsa man kana nga “ngano?”

Ngano nga ang Dios mitugot sa Iyang Anak nga magsilbing usa ka sakripisyo? Ngano nga Siya mipadala kanato dinhi aron mapamatud-an ug masulayan? Tungod kay, sama sa gitudlo diha sa usa ka susama katahum nga kamatuoran, “ang bili sa kalag mahinungdanon sa panan-aw sa Dios” (Doktrina ug mga Pakigsaad 18:10).

Nganong ingon kita niana ka dako og bili ngadto Kaniya? Natural lang, tungod kay kita Iyang mga anak Siya nahigugma kanato. Apan diha sa nagsunod nga pipila ka mga bersikulo, Iyang gihulagway ang mahinungdanon nga gasa nga gihatag sa matag usa kanato tungod sa Iyang gugma alang kanato—ang Iyang Bugtong Anak, si Jesukristo. Gipadala Niya ang Iyang Anak nga mag-antus sa “kamatayon diha sa unod; busa siya nag-antus sa kasakit sa tanan nga mga tawo, nga unta ang tanan nga mga tawo maghinulsol ug moduol ngadto kaniya. Ug siya nabanhaw pag-usab gikan sa patay, nga siya unta modala sa tanan nga mga tawo ngadto kaniya, sa mga kondisyon sa paghinulsol” (Doktrina ug mga Pakigsaad 18:11–12). Siya miingon kanato nga, “Kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).

Dili ikatingala nga ang Langitnong Amahan mobati og dakong kalipay kon kita maghinulsol. Ang atong kaandam sa paghinulsol maoy ebidensya sa atong lawom nga pasalamat alang sa talagsaon ug dili hitupngan nga gasa sa Manluluwas ug Manunubos sa kalibutan. Pinaagi lamang sa ug pinaagi ni Jesukristo nga kita mahimong takus nga mobarug uban sa pagsalig diha sa atubangan sa Dios (tan-awa sa Doktrina ug mga Pakigsaad 121:45).

Si Presidente Russell M. Nelson mipasabut nga “Daghan ra kaayo ang nagkonsiderar sa paghinulsol isip silot––usa ka butang nga likayan gawas lang sa labing seryuso nga mga sirkumstansya. Apan kining pagbati nga gisilutan hinimo-himo ni Satanas. Siya mosulay sa pagpugong kanato sa paghunahuna kang Jesukristo, kinsa nagbarug nga andam mogakus, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato. …

“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon ubanan sa hugot nga pagtuo, ang paghinulsol moabli sa atong agianan ngadto sa gahum sa Pag-ula ni Jesukristo.¹

Sa makadaghang higayon diha sa mga pagpadayag sa ulahing mga adlaw, ang Ginoo nagdapit sa Iyang mga anak nga mga sulugoon aron sa pagtabang Kaniya ug sa Iyang mga Anak sa buhat sa kaluwasan ug kahimayaan (tan-awa sa Doktrina ug mga Pakigsaad 18:14). Hunahunaa kana! Sa atong dili hingpit nga kahimtang, ang Dios sa uniberso mipadangat og imbitasyon ngari kanato sa pagtabang sa Iyang mga anak, kinsa adunay dakong bili, aron makabalik ngadto Kaniya. Nasayud Siya nga ang buhat malisud. Adunay daghan kinsa dili modawat sa atong imbitasyon aron “maminaw Kaniya.” Hinoon, Siya nagmatuod nga Siya mao ang Dios sa “usa.” “Ug kon kini mahimo nga ikaw manlimbasog sa tanan nimo nga mga adlaw sa pagsangyaw og paghinulsol ngadto niini nga mga katawhan, ug magdala, bisan usa ka kalag ngari kanako, unsa ka dako ang imong hingpit nga kalipay uban kaniya diha sa gingharian sa akong Amahan!” (Doktrina ug mga Pakigsaad 18:15).

Tingali makapangutana kamo sa inyong kaugalingon, “Unsay akong mabuhat aron makatabang og tawo nga moduol kang Kristo, maghinulsol, ug mapanalanginan pinaagi sa Iyang maulaon nga sakripisyo?”

Si Elder Dieter F. Uchtdorf sa Korum sa Napulog Duha ka mga Apostoles mihatag niining tambag mahitungod sa pag-apil sa buhat sa kaluwasan ug kahimayaan: “Sabta nga dili inyong trabaho ang pagkabig sa mga tawo. Mao kana ang tahas sa Espiritu Santo. Inyong tahas ang pagpakigbahin kon unsa ang anaa sa inyong kasingkasing ug ang pagpuyo sumala sa inyong gituohan.

“Busa, ayaw pagpakawala sa kadasig kon ang tawo dili dayon modawat sa mensahe sa ebanghelyo. Dili kini usa ka personal nga kapakyasan.

“Tali ra kana sa indibidwal ug sa Langitnong Amahan.

“Ang inyo mao ang paghigugma sa Dios ug sa inyong silingan, nga Iyang mga anak.

“Tuohi, higugmaa, buhata.

Sunda kini nga dalan, ug ang Dios mobuhat og mga milagro pinaagi kanimo sa pagpanalangin sa Iyang bililhong mga anak.”²

Ang imbitasyon sa pagduol ngadto kang Kristo pinaagi sa paghinulsol wala ireserba alang lamang niadtong nagpuyo dinhi sa yuta. “Ang mga patay kinsa maghinulsol mahimo nga matubos, pinaagi sa pagkamasulundon ngadto sa mga ordinansa sa balay sa Dios.” (Doktrina ug mga Pakigsaad 138:58). Ang templo ug ang buhat sa family history mao ang importante nga mga aspeto sa pagpundok sa nagkatibulaag nga Israel sa duha ka habig sa tabil. Atong mabati ang hingpit nga kalipay samtang kita magbuhat sa buhat alang niadtong kinsa miadto na sa kalibutan sa espiritu nga masayud niana nga dapit, sama sa gisulti ni Presidente Wilford Woodruff (1807–98), “gamay ra gyud kaayo, kon duna man, nga dili modawat sa Ebanghelyo.”³ Walay duda, nagpaabut sila sa adlaw nga ang makaluwas nga mga ordinansa gipahigayon alang kanila diha sa balay sa Ginoo.

Si Elder Dale G. Renlund sa Korum sa Napulong Duha ka mga Apostoles mitudlo: “Kon tigumon nato ang atong mga family history ug moadto sa templo para sa atong katigulangan, tumanon sa Dios ang daghan niining gisaad nga panalangin sa mga buhi ug patay na. Sa samang paagi, panalanginan kita kon tabangan nato nga ang uban sa atong ward ug stake mohimo sa parehong butang. Ang mga miyembro nga nagpuyo layo sa templo makadawat usab og mga panalangin pinaagi sa pag-apil sa buhat sa family history, magkolekta og mga ngalan sa ilang katigulangan alang sa mga ordinansa nga himoon sa templo.”⁴

Nindot kaayo nga masayud nga ang atong Langitnong Amahan nahigugma sa Iyang mga anak. Kita bililhon kaayo ngadto Kaniya. Matag usa kanato adunay sagradong responsibilidad sa pagpangalagad sa Iyang mga anak sa duha ka habig sa tabil ug makatabang kanila nga makaamgo sa ilang dakong bili.

Dapiton ko kamo sa pagtabang niadtong kinsa nahimong kabahin sa inyong kinabuhi ug tingali niadtong nahikalimtan sulod sa dugay ng panahon. Tabangi kadtong kinsa mibiya sa dalan sa pakigsaad. Pangalagari kadtong nagkinahanglan sa Kristohanong gugma. Pakigkonektar sa mga tawo nga atoa sa pikas nga tabil pinaagi sa buhat sa templo ug family history, lakip na ang indexing. Tabangi ang uban nga mobati sa gugma sa Dios pinaagi kaninyo.

Sama sa gisaad, ang akong minahal nga higala nga taga-Belgium ug ako nag-istoryahanay matag Dominggo sa sobra sa upat ka bulan. Ako siyang gidapit sa pag-download sa Gospel Library nga app. Ang lokal nga presidente sa branch nahibalo na kaniya, ug ang full-time nga mga misyonaryo mibisita ug mihatag kaniya og panalangin sa pagkapari. Pagkasunod semana, sa unang higayon sa kapin sa 30 ka tuig, mitambong siya sa miting sa sakramento. Sa katapusang higayon sa among pag-istoryahanay napuno siya sa kalipay nga makakonekta pag-usab sa organisasyon sa Simbahan ni Jesukristo.

Miingon usab siya kanako nga ang iyang kinamagulangan nga anak nga babaye misalmot gihapon sa Simbahan. Mikontak dayon ko sa anak nga babaye agi sa video chat. Gipaila-ila ko niya sa matag usa sa iyang upat ka matahum nga anak, dayon misulti nako nga ang mga misyonaryo moabut sa ilang panimalay nianang gabhiona alang sa panihapon. Pagkadako niadto nga panalangin nga makita siya nga matinud-anon pa gihapon nga miyembro sa Simbahan!

Sa akong pakig-istorya kaniya, nasabtan nako sa hinay-hinay, ang mensahe niining kasulatan: “Ug karon, kon ang imong hingpit nga kalipay dako tungod sa usa ka kalag nga imong gidala ngari kanako diha sa gingharian sa akong Amahan, unsa kaha kadako ang imong hingpit nga kalipay kon ikaw makadala og daghan nga mga kalag ngari kanako!” (Doktrina ug mga Pakigsaad 18:16).

Ang bili sa matag kalag mahinungdanon!