Kalig-on sa Pagpadayon sa Unahan

Imahe

Karina Guerra and children

Sa dihang ang akong bana ug ako nawad-an sa among unang anak, ang mga doktor misulti kanamo nga dili na gayud ko makaanak. Nasagmuyo ako. Naguol ko ug nangita og mga tubag. Ang akong bana nagguol usab. Nag-ampo kami ug nasayud kon unsa ka importante ang mahimong usa ka mahangturong pamilya. Sa kadugayan, kami na-silyo sa Los Angeles California Temple.

Naningkamot gihapon ko nga makasabut nganong nahitabo kining pagkawala sa dihang akong nahinumduman ang akong patriyarkal nga panalangin. Nagsugod ko sa pagbasa sa akong panalangin ug nakakita og usa ka bahin nga hingpit na nakong nakalimtan. Nag-ingon kini nga ako mapanalanginan og mga anak nga mga lalaki ug mga anak nga babaye. Naghunahuna ko nga adunay sayop sa gisulti sa mga doktor kanako. Miadto ko sa doktor ug gisultihan na usab nga dili na ko makabaton og anak.

Mga lima ka tuig human kami nawad-an sa among unang anak, nakahukom kami nga mosulay og vitro fertilization. Sa unang appointment, ang paghiling sa pagpanamkon nakita nga positibo. Dili ko katuo niini. Nagpadagan usab sila og dugang paghiling ug nakumpirmar nga mabdos ko. Siyam ka bulan ang milabay, among gihangop ang among anak nga babaye diha sa among pamilya. Karon, ako inahan sa upat ka talagsaong mga anak.

Laing hagit ang miabut pipila ka tuig ang milabay sa dihang ang akong bana ug ako nagdiborsyo. Miabut kini nga nakapakurat kanako. Wala ko masayud unsay buhaton. Nagtuo ko nga nakaangkon ko og hingpit nga gamayng pamilya. Nag-eskwela usab ko og pagkadentista nianang panahona. Mibiya ko sa pag-eskwela aron mag-focus sa akong mga anak. Akong gibati nga mao kini ang labing maayo nga pagpili. Wala gyud ko magmahay niini. Apan aduna koy dako kaayong kasuko. Ngano kaha nga ang usa ka tawo basta lang mobiya sa usa ka kaminyoon ug sa upat ka talagsaong mga anak?

Nahadlok kaayo ko mahitungod sa unsay mahitabo kanako ug sa akong mga anak. Mihilak ko ug mibati nga dili ko makaginhawa, naghunahuna kon silyado pa ba kaha gihapon kami. Nakigsulti ko sa akong bishop, ug siya miingon nga ang Langitnong Amahan misaad nga kami nasilyo hangtud sa kahangturan, apan ang among kabubut-on ang motino kon kami magkauban ba hangtud sa kahangturan. Nakahatag kini nako sa maong kahupayan nga masayud nga ako nasilyo pa gihapon sa akong mga anak.

Apan mibati gihapon ko og kasuko ug mibati nga dili ko takus nga moadto sa templo. Unsaon nimo pag-adto sa templo nga adunay ingon ka dakong kasuko? Dili sab ko gustong moadto sa templo tungod kay ako usa ka deborsyada. Akong gibati nga dili ko angayan niini tungod kay angay unta nga minyo pa gihapon ko.

Nakigsulti ko pag-usab sa akong bishop, ug misulti siya nako nga si Satanas dili gusto nga mobalik ko sa templo. Gusto siya nga mauyamot ko ug mobati nga dili takus. Nindot kaayo kadto sa dihang misulod ko pag-usab sa templo. Ang pag-adto og balik sa templp nakapahimo nako nga mobati og mas maayo ug mas lig-on. Ang pagkasayud nga ang Langitnong Amahan nagtabang kanako nga mahimong usa ka mama, nga wala ako mag-inusara, ug nga Siya dili gayud mobiya kanako o sa akong pamilya nakahatag kanako og dako kaayong kalig-on. Karon akong siguroon nga ang akong rekomend sa templo kanunayng aktibo.

“Nasayud ko nga kinahanglan lang ko nga mopadayon sa unahan ug maduol sa Langitnong Amahan sa matag adlaw. Mao kini ang paagi nga makauban nako ang akong mga anak hangtud sa kahangturan.”

Bisan tuod og ang ilang papa wala nay kalambigitan diha nila, kanunay nakong gisulti sa akong mga anak nga naa ko kanunay alang nila. Nagsimba kami, nagbuhat kami sa among pagtuon sa kasulatan, ug nag-ampo kami. Kami adunay pagsabut kon unsa kaimportante ang pamilya ug nga kami kinahanglan mopasaylo sa usag usa, mosuporta sa usag usa, ug modasig sa usag usa.

Ang mga tawo nangutana nako unsay akong buhaton kon aduna koy subra nga oras sa matag adlaw. Matulog ba ko? Mokaon ba ko? Unsay akong buhaton? Aduna koy 15 minutos nga dekalidad nga panahon uban sa matag usa sa akong mga anak.

Kon kinahanglan nga buhaton ko kini pag-usab, magminyo ko sa mao gihapon nga tawo ug molahutay og usab niining lima ka tuig sa pagpanglimbasug basta mao lang gihapon ang akong mga anak nga anaa nako karon. Ingon niana sila ka bililhon ngari kanako. Duna koy makalingaw, talagsaon, ug buotan nga mga anak. Bisan pa man sa ilang mga panlimbasug, kanunay silang maghunahuna og mga paagi sa pagtabang sa uban.

Ang pagsiguro nga ang among pagtuo lig-on nakapahimo kanamo nga mopadayon isip pamilya. Kon kami mobuhat sa among bahin, anaa ang Ginoo nga motuman sa Iyang mga saad ug mopanalangin kanamo. Usa kana ka butang nga kinahanglan nakong masunod, ug ako napanalanginan kaayo.