Sa Digital Lamang: Mga Young Adult

Akong Tambag alang sa Pagpangita og Trabaho human sa Kolehiyo

Ni Goodluck Isioma Ugbah

Ang kinabuhi human sa gradwasyon dili kanunay sayon, apan kon kita adunay pagtuo, ang Langitnong Amahan makatabang kanato nga makita ang mga oportunidad nga naglibut kanato.

Imahe

lalaki nga nagpainterbyu alang sa trabaho

Nabunyagan ako sa Ang Simbahan ni Jesukristo sa mga Santos sa Ulahing mga Adlaw sa Nigeria kauban sa akong mga ginikanan sa dihang 10 anyos ko. Samtang nagkadako ko, nagsugod ako sa pagtabang sa lokal nga mga misyonaryo sa ilang buluhaton. Nakapakurat kini kanako kay sa kasagaran mga walay degree sa kolehiyo, kini nga mga misyonaryo nakahimo sa pagpakigsulti sa tanang matang sa mga tawo, ug gibuhat nila kini uban sa gahum, awtoridad, ug kombiksyon, ug sa walay kahadlok.

Ang ilang ehemplo nakatabang kanako sa pagkaamgo nga ako ganahan nga moserbisyo og misyon, apan gusto sab ako nga makakuha og mas taas nga edukasyon. Nagduhaduha ako nga madawat sa kolehiyo, mao nga miaplay ko ug misumiter sa akong mga papeles sa misyon sa susama nga panahon. Ang sulat nga nadawat ko sa eskwelahan ug ang tawag sa pagmisyon nagdungan sa pag-abut. Nasayud ko nga gusto kong moeskwela sa kolehiyo, apan akong giuna sa pagpili ang pagserbisyo sa Ginoo pinaagi sa pag-adto og una sa misyon.

Bisan og usa kadto ka sakripisyo, ang pagserbisyo og misyon mas importante kay sa unahon ang pag-eskwela sa kolehiyo. Nakakat-on ko og daghang bililhon nga kahanas—mga butang sama sa pagdisiplina sa kaugalingon, pokus, komunikasyon, pagkapangulo, ug pagsalig sa Ginoo. Ug ang tanan nga akong nakat-unan nakatabang nako sa akong pag-eskwela sa wala madugay. Dili gayud ako magmahay nga akong giuna ang Ginoo.

Ang akong Panaw human sa Paggradwar

Alang kanako, ang edukasyon susama sa usa ka yawe nga moabli sa mga pultahan sa oportunidad. Ug ang edukasyon pinaagi sa programa sa BYU–Pathway Worldwide sa PathwayConnect sa Ghana naghatag kanako sa oportunidad nga molambo ang akong kahibalo. Ang kahibalo usa ka gahum alang sa pagpalambo sa kinabuhi sa mga sakop sa akong kaugalingong pamilya ug sa nagpalibut kanako.

Human makagradwar sa BYU–Idaho sa online degree nga programa, nag-intern ko sa usa ka pang-pinansyal nga kompanya sa Ghana ug nagsugod og full-time nga trabaho didto nila. Ganahan ko sa unsay akong gibuhat, ug ganahan sila sa akong mga serbisyo. Apan pagkataud-taud, nasarado ang kompanya, ug wala na koy trabaho.

Makapaluya kadto, apan mipadayon ko sa pagpangaplay gamit ang akong nakat-unan sa eskwelahan ug gikan sa akong misyon. Mihukom ko nga gamiton ang mga kahanas [skills] nga akong nakat-unan sa una nako nga trabaho ug nagsugod og akong kaugalingong negosyo nga pagsangkap og mga serbisyo nga pinansyal.

Ang akong panaw human sa paggradwar puno sa mga maayo ug sa dili maayo, apan wala ako magmahay nga gihimo ang edukasyon nga usa ka prayoridad. Kon wala kini, wala unta ako makadumala og akong kaugalingon nga negosyo karon.

Dihang ang Pagpangita og Trabaho Malisud

Daghan sa mga young adult nga akong nakaistorya aduna sa hunahuna nga ang degree sa kolehiyo maoy paagi nga diha-diha maghatag kanimo og trabaho. Apan ang akong pinakadako nga hagit mao ang pagpangita og tawo nga mopatrabaho [employer] kinsa mohatag og bili sa akong degree sama sa akong gibuhat. Kon naglisud ka sa pagpangita og trabaho o pagpangita sa imong kaayohan human sa kolehiyo, wala ikaw mag-inusara. Ania ang pipila ka butang nga akong nahimo sa akong pagpangita og trabaho nga pwede usab nimong buhaton:

Paningkamuti nga makuha ang labing dakong benepisyo gikan sa pag-eskwela. Adunay panultihon sa Africa nga nag-ingon nga kinahanglan nga aktibo ka nga makadawat og edukasyon sa pag-eskwela kay sa motambong lamang og klase. Kon aktibo ka sa pag-eskwela dala ang katuyoan (ug dili lang uyon-uyon sa panghitabo), makaangkon ka og tinuod nga kahibalo ug mga kahanas nga mamatikdan sa mga tigpatrabaho—ug human makakuha og trabaho, mas maayo ang imong agi sa trabaho.
Pakig-istorya sa tanan. Diha sa imong pagpangita og trabaho, lakaw, pakig-istoryahi ang matag usa, ug padaghana ang imong mga kaila.
Pagmasaligon. Pagmasaligon nga ikaw kwalipikado sa trabaho. Tutuki ang imong mga pangandoy ug mga tumong ug tuohi ang imong kaugalingon. Dali ra ang pagwagtang sa pagsalig human sa makaluya nga mga pagbalibad, apan ipadayon ang pagbaton og paglaum. Makakita ra ikaw sa tukma nga tigpatrabaho o oportunidad sa negosyo sa ngadto-ngadto.
Pahimusli ang matag oportunidad. Anaa ra ang oportunidad sa tibuok palibut kanato. Kon ablihan nato ang atong mga hunahuna ug magmapasalamaton sa mga oportunidad nga gihatag sa Ginoo kanato, makakita kita ug makalihok sa mga oportunidad nga Iyang gipahimutang sa atong dalan.
Palibuti ang imong kaugalingon og mga tawo nga pareho nimo og mga hiyas ug modasig kanimo sa imong mga tumong. Mas sayon ang pagpadayon kon kauban nimo ang tukma nga mga tawo—mga tawo nga susama kanimo og tumong. Ang katilingban puno sa kawalay kadasig, apan ang mga tawong pareho nimo og mga hiyas ug mga pangandoy kanunay nga mobayaw kanimo ug modasig kanimo aron makab-ot ang imong mga tumong.
Pagbaton og pagtuo. Usahay ikaw tingali mobangon sa buntag nahibalo nga ikaw sa gihapon walay trabaho ug walay purohan nga makabutang og pagkaon sa lamesa. Apan ang pagtuo diha sa Ginoo nga si Jesukristo makapagaan sa imong mga palas-anon ug mohupay sa imong pagka walay kadasig samtang ikaw maningkamot sa pagtikang sa pagtuman sa imong mga tumong.

Sa katapusan, hinumdumi kanunay nga ang Langitnong Amahan adunay mahangturon nga plano alang kanimo. Bisan og ang mga butang wala kaayoy silbi sa pagkakaron, wala kana magpasabut nga kini wala gayud. Si Elder Dieter F. Uchtdorf sa Korum sa Napulog Duha ka mga Apostoles misulti sa pinakamaayo niini: “Moawhag ko kaninyo sa pagtuo nga ang inyong kinabuhi mas labi pang maayo kon mosalig kamo sa Dios nga mogiya sa inyong mga lakang. Nahibalo Siya sa mga butang nga posibling dili gayud ninyo mahibaloan, ug aduna Siyay giandam kaninyo nga umaabut nga posibling dili ninyo mahunahuna.”¹

Sanag ang umaabut, ug ang inyong pagtinguha og kahibalo ug edukasyon dili mausik. Pagbaton og pagtuo ug padayon sa pagdutdot sa unahan. Giyahan ikaw sa dapit diin ang Ginoo makapanalangin kanimo sa pinakamaayo ug makagamit kanimo ug sa imong mga talento sa pagpanalangin sa uban.