Usa ka Kahingpitan sa Kalipay
Lisud nga ihulagway ang talagsaong kalipay nga mipuno sa akong kalag sa akong pagbiya sa klinika nianang adlawa.
Samtang naglingkod diha sa usa ka lawak nga hulatanan sa klinika, nakamatngon ko og usa ka inahan kuyog sa iyang anak nga babaye. Ang bata nagsul-ob og face mask ug giubo sa makadaghang higayon. Nanglawom ang iyang mga mata, ug nagluspad ang iyang nawong. Dili ko kapugong nga malooy kaniya. Ang iyang inahan gikapoy na tan-awon.
Gamay ra ang lawak sa hulatanan, busa madungog nako ang tanan niyang gisulti. Human siya mibayad sa iyang pagpakonsulta, ang resepsyonista mipahinumdom kaniya sa iyang milapas na nga balayranan nga mikapin na sa doble sa kantidad nga iyang gibayaran karon sa maong pagpakonsulta.
Ang babaye mipasabut, nga naglisud sa pagkontrolar sa iyang emosyon, nga siya walay subra nga kwarta hangtud sa mosunod nga bulan. Miingon siya nga siya hapit wala nay igong ikabayad sa iyang abangan. Ang resepsyonista misulti kaniya nga kinahanglan iyang paningkamutan sa pag-impas ang iyang balanse sa labing dali nga panahon. Ang babaye ug ang iyang anak giadto dayon sa luyo alang sa ilang appointment.
Samtang naglingkod ko didto, dili ko makahunong sa paghunahuna mahitungod sa babaye ug sa iyang sitwasyon. Dili ako adunahan, apan kon maghunahuna ko kon unsa ka maayo ang Ginoo sa akong pamilya ug kanako, mibati ko og dakong tinguha sa pagtabang niining babaye ug sa iyang anak.
Miduol ko sa resepsyonista, naghunahuna kon ang akong gustong buhaton mahimo ba kaha. Mipasabut ko nga akong nadungog ang lisud nga sitwasyon sa maong babaye ug gustong mobayad sa iyang nahabilin nga balanse. Nahibulong ang resepsyonista apan nalipay usab nga tahuron ang akong hangyo.
Gihangyo nako siya nga sultihan ang babaye nga nabayran na ang balanse ug dili na siya kinahanglan mabalaka mahitungod niini. Gisultihan usab nako ang resepsyonista sa dili pagsulti kon si kinsa ang mibayad niini. Dayon gibayaran nako ang balanse ug mipadayon sa akong appointment. Wala na ko makakita sa babaye o sa iyang anak pag-usab, apan nag-ampo ko nga ang mga butang sa dili madugay moarang-arang na alang kanila.
Lisud nga ihulagway ang talagsaong kalipay nga mipuno sa akong kalag sa akong pagbiya sa klinika nianang adlawa. Mao diay nga ang Manluluwas namulong kabahin sa usa ka hingpit nga kalipay (tan-awa sa Doktrina ug mga Pakigsaad 11:13). Sukad pa gayud kaniadto, nasayud ko nga gusto kong mas mahisama sa Manluluwas ug sa mas kanunay nga pagsinati sa kalipay nga moabut gumikan sa pagserbisyo Kaniya.