Pagtabang sa mga Bata nga Maandam alang sa Bunyag

Mahimong sayon ang paghunahuna sa bunyag isip usa ka tulumanon nga nagtimaan sa paglabang gikan sa usa ka ang-ang sa kinabuhi ngadto sa lain o usa lamang ka butang nga mahitabo kon ang inyong bata mag-otso anyos. Apan sa tinuod, ang bunyag usa ka sagrado nga pagpili, nga nagpasabut nga sila kinahanglan nga makasabut kon nganong importante kini. Ang pagbaton og katuyoan sa pagtudlo kanila makatabang sa paghimo sa bunyag nga mas makahuluganon (ug dili kaayo makahahadlok). Tudloi sila sa paagi nga inyong buhaton ngadto ni bisan kinsa nga tawo nga nagkat-on mahitungod sa Simbahan sa dili pa bunyagan.

Importante alang kanato ang pagtudlo sa mga bata mahitungod sa mga pakigsaad nga ilang himoon sa bunyag. Ug ang maayong balita mao nga, kini dili usa ka butang nga kinahanglan (o angay) natong paningkamutan nga mabuhat sulod sa tibuok gabii o sa usa ka semana. Ang anam-anam nga pagtuon sa ebanghelyo sa usa ka pamilya mao ang labing maayong paagi sa pagtabang sa inyong anak nga maandam sa paghimo niini nga pakigsaad. Adunay pipila ka butang nga makatabang nga angay kaayong tutukan samtang nagkaduol ang bunyag sa inyong anak:

Ang pipila sa mga bata tingali mabalaka mahitungod sa bunyag tungod kay sila wala magtuo nga sila adunay igong lig-on nga pagpamatuod. Tabangi ang inyong anak nga makahinumdom sa maayong mga pagbati nga ilang nabatonan samtang nagbinuotan sila, nagkanta sa Primary, o nag-istorya mahitungod sa ebanghelyo. Awhaga sila sa paghunahuna og mga pamaagi diin sila nasayud nga ang Langitnong Amahan nahigugma kanila. Ipasabut nga kining tanan mao ang mga sinugdanan sa usa ka pagpamatuod ug nga ang ilang pagpamatuod motubo sa paglabay sa panahon samtang sila magpadayon sa paghimo og maayong mga pagpili.

Kon ang inyong anak may kahadlok mahitungod sa pagpabunyag—o bisan kon sila ingon og wala ra—makatabang ang paghisgot mahitungod sa unsay mapaabut. Usa ka maayong kahigayunan sa pagsugod mao ang pag-andam kanila alang sa moabut unya nga interbyu uban sa ilang bishop o presidente sa branch. Ang pagtabang sa inyong anak sa pagtubag sa mga pangutana sama sa, “Nganong importante ang bunyag?” ug “Unsa ang gipasabut sa pagdala diha kanimo sa ngalan ni Kristo?” makatabang kanila nga maandam alang niini nga panaghisgot. Tabangi ang inyong anak sa paghinumdum nga ang bishop anaa diha aron matabangan sila nga maandam, dili sa pagkwestyon kanila o aron lisud-lisuron sila sa ilang desisyon. Ug hinumdumi, nga kamo kanunay mahimong mokuyog sa inyong anak diha sa interbyu, kon gikinahanglan.

Laing butang aron maandam ang inyong anak mao ang unsay pisikal nga buhaton sa adlaw sa bunyag. Ipakita kanila kon unsaon sa pagbarug kon sila anaa na sa bunyaganan. Gani mahimo ninyong dapiton ang naghupot sa pagkapari kinsa mobunyag sa inyong anak sa pagbansay sa pisikal nga paglihok sa bunyag nga wala sa tubig, aron ang inyong anak mahibalo kon unsay pagbati nga ituslob ug ihaw-as. Ipasabut unsay mahitabo atol sa kumpirmasyon.

Kon ang inyong anak mahadlok nga ituslob ilawom sa tubig, pagmainampuon sa pagkonsiderar og mga paagi nga kamo makatabang kanila sa pagbuntog nianang kahadlok samtang nagkaduol ang ilang bunyag. Tingali kamo ug ang inyong anak makatan-aw og laing tawo nga gibunyagan aron makakita kon unsa ra ka dali sila naa sa ilawom sa tubig. Tingali kamo ug ang inyong anak mahimong magbansay og dungan sa pagtak-op sa inyong mga ilong ug pagtuslob sa inyong mga nawong diha sa tubig alang sa pipila ka segundo sa matag higayon. Tingali adunay usa ka tawo sa inyong dapit nga nagtudlo og mga bata sa paglangoy kinsa makahatag og tambag. Bisan unsay inyong buhaton, siguroha nga buhaton ninyo kini uban sa gugma ug pailub.

Kon ang bata mobati nga mas andam mahitungod sa pisikal nga mga detalye sa bunyag, mas makarelaks sila ug maka-focus sa espirituhanong pakigsaad nga ilang gihimo.

Imahe

illustration of temple

Tutukan ang Pag-uswag, Dili ang Pagkahingpit

Usahay, tingali tungod kay kita naghisgot gayud kaayo mahitungod sa makalimpyo nga aspeto sa bunyag, ang mga bata masayop sa pagsabut ug maghunahuna nga angay silang mahimong hingpit human sa ordinansa. Usa sa labing komon nga mga istorya nga among madungog diha sa Higala mao ang kalisang nga masinati sa usa ka bata kon sila makahimo og sayop sa unang higayon human nga mabunyagan. Human nga mobati nga limpyo ug putli kaayo, ang pakiglalis sa usa ka igsoon o ang pagkalimot sa pagbuhat sa usa ka buluhaton sa panimalay makahimo kanila nga mobati nga daw naguba nila kana nga maayong pagbati hangtud sa hangtud!

Isip mga ginikanan ug mga lider, importante kaayo nga tabangan nato ang atong mga bata nga makasabut sa baruganan sa paghinulsol. Ang atong mga anak ba nakasabut nga ang pag-ila sa atong mga sayop ug ang pagkat-on gikan niini kabahin sa paagi nga kita makat-on ug molambo dinhi sa yuta? Nasayud ba sila nga sila makaampo alang sa kapasayloan sa bisan unsang higayon? ug nga kon sila moambit sa sakramento matag semana, sila nagbag-o niadto nga mga pakigsaad nga ilang gihimo sa bunyag? Ipamatuod nga ang kahigayunan sa paghinulsol usa ka panalangin ug usa ka gasa. Ang bunyag dili mahitungod sa pagkahimong hingpit karon apan mahitungod sa pagsulod sa dalan sa pakigsaad ug sa paghimo og inadlaw nga mga lakang aron mahimong mas mahisama ni Jesukristo.

Imbis nga tan-awon ang bunyag ug kumpirmasyon isip mao ang destinasyon, atong matabangan ang atong mga anak nga makakita niini isip usa ka matahum nga sinugdanan—ang sinugdanan sa usa ka bag-ong kinabuhi isip usa ka disipulo sa pakigsaad ni Jesukristo. Mobati man ang inyong anak og kahinam, kakulba, o medyo sa duha, kamo makasiguro nga sila dili maglakaw niini nga dalan nga mag-inusara. Pinaagi sa pagkamainampoon, pagbaton og katuyoan [intentional], ug kamapailubon, kita makatabang sa atong mga anak nga mobati og kalipay samtang sila mohimo niini nga lakang balik ngadto sa ilang langitnong panimalay.