Sa Digital Lamang: Mga Young Adult
5 ka Sugyot aron Molambo isip usa ka Estudyante sa Unibersidad
Gusto ka bang makalahutay? O gusto ka bang molambo? Kini nga mga sugyot makahimo og dako kaayo nga tabang.
Maanaa ka man sa usa ka campus sa kolehiyo o mikuha og usa ka degree pinaagi sa online, ang kasinatian sa unibersidad makahatag og managlahing mga pagbati: sa kahinam nga ikaw nag-umol sa kaugalingon nimong dalan dinhi sa kalibutan ug tingali sa mga kabalaka mahitungod sa pagtapos sa mas dakong buluhaton sa klase ug mga balayranan sa pag-eskwela. Alang kanako, ang pag-eskwela sa unibersidad mao ang usa ka hingpit nga bag-ong kasinatian. Akong gipili nga moeskwela sa usa ka campus, nga nagpasabut nga mopuyo layo sa panimalay, makigbahin sa usa ka kwarto uban sa usa ka (kanunayng dili hapsay) nga langyaw, ug maningkamot nga makakaon og pagkaon gawas sa mga sandwich—tanan samtang nagkuha og lisud nga mga kurso!
Ang kolehiyo naglakip og daghang kausaban, ug sa kanunay naghunahuna ako kon aduna ba kaha akoy ikasarang aron molampus. Bisan og ang kaanad sa pagpakabuhi sa unibersidad modangat og panahon, sa katapusan nakakat-on ako og mga kinaiya nga nakatabang kanako nga molampus sa akong kasinatian sa kolehiyo. Aniay lima ka mga sugyot nga nakatabang kanako sa pagmaniobra aron mapahiayon sa kolehiyo.
1. Iprayoridad ang Ebanghelyo ug Magtinguha sa Pagpaminaw Kaniya
Kini maoy labing importante nga sugyot. Samtang nagsugod ako sa kolehiyo, sa kulba nga homework, mga klase, ug mga panarbaho—tanan samtang naningkamot nga makagahin og panahon uban sa mga higala—kadto usahay malisud. Apan nakaamgo ako nga sa kasagaran wala ako magtutok sa pagtuon sa kasulatan ug pag-ampo. Kay sa dihang gihimo nako kini, ang ubang butang daw mas mahimo ra. Karon kon ako maluya, mogahin ako og panahon sa pagtimbang-timbang kon unsaon nga ang ebanghelyo mahimo nako nga prayoridad sa akong kinabuhi. Dili ako perpekto bahin niini, apan naningkamot ako sa pag-ampo ug pagtuon sa mga kasulatan matag adlaw aron makaangkon ako og mas daghang oportunidad sa “pagpaminaw Kaniya,” sama sa giawhag ni Presidente Russell M. Nelson nga atong buhaton.1 Akong namatikdan nga unsay importante ngari kanako importante ngadto sa Langitnong Amahan, ilabi na ang akong edukasyon. Kon ako mohatag sa akong labing maayong paningkamot ug mangayo Kaniya og tabang, Siya magauban kanako ug magalig-on kanako aron makatuman sa bisan unsang butang nga kinahanglan nakong buhaton.
2. Motakda og mga Tumong ug Ribyuhon Kini sa Kanunay
Sa sinugdanan sa matag semester, ganahan ako nga mohimo og taas ug mubo og tagal nga mga tumong. Ang mubo og tagal nga mga tumong mao ang ginagmayng mga tumong nga makatabang kanako sa pagkab-ot sa akong dagko nga taas og tagal nga tumong. Sama pananglit, ang akong taas og tagal nga tumong mao ang paggradwar og bachelor‘s degree sa public relations, ug usa sa akong mubo og tagal nga mga tumong mao ang pagsumiter sa akong tanan nga mga assignment sa eksaktong panahon. Isulat nako kini nga mga tumong ug ibutang kini sa dapit diin makita nako kini sa kanunay, sama diha sa akong telepono o ibitay sa akong refrigerator. Ang pagtutok diha niini midasig kanako aron malatasan ang daghang lisud nga mga panahon sa eskwelahan.
3. Planoha ang Oras sa Pagtuon diha sa Imong Sinemana nga Iskedyul
Ang paghimo og usa ka sinemana nga plano kon kanus-a ako anaa sa klase ug kon kanus-a ako magtuon, kanunay nga mapuslanon. Sa kasagaran magplano ako og tulo ka oras sa pagtuon matag semana alang sa akong gi-enrol (nga ang usa ka 3-ka credit nga kurso mogahin og siyam ka oras nga pagtuon matag semana). Ug kon sundon nako ang akong plano, ang akong ekstrakurikular nga mga kalihokan mas makalingaw nga walay mga hunahuna og kabalaka bahin sa paghuman sa homework!
4. Mokaon og Balanse nga Pagkaon ug Mag-ehersisyo
Ang pag-atiman sa imong lawas may kalabutan gayud sa pagkahimong malampuson sa eskwelahan. Ang akong pisikal nga kahimsog kanunay nga moepekto sa akong mental ug emosyonal nga kahimsog. Kon padayon ako nga mobati nga nabug-atan, mogawas ko aron sa pagdagan-dagan. Ang pag-ehersisyo nakatabang kanako nga mahapsay ang akong hunahuna, ug ang pagkaon og makapahimsog nga mga pagkaon naghimo kanakong lagsik. Kon ako himsog sa pisikal, mas andam ako nga motutok sa akong mga pagtuon.
5. Katulog og Eksakto
Ang mga hamtong kinahanglan nga makatulog og pito ngadto sa siyam ka oras kada gabii—mao kini ang usa ka tumong nga kanunay nakong gipaningkamutan (ug kasagarang mapakyas). Bisan og ako gusto nga dili matulog og sayo aron magbasa og maayong basahon o makig-chat sa akong mga higala, ang pagkatulog sa kanunay mao ang mas importante. Ang pagkatulog mopaminus sa kaluya ug makapalambo sa abilidad sa usa ka tawo aron magpabilin diha kaniya unsay iyang mga natun-an. Sa mga gabii sa dili pa ang mga eksamin, akong iprayoridad ang akong mga iskedyul aron makatulog ko sa igong gidugayon ug makahimo sa akong pinakamaayo sa sunod nga adlaw.
Sa higayon nga akong mahimo kining lima ka butang, dili lamang ang kinabuhi sa kolehiyo ang akong napahiayon—milambo ako! Hinumdumi, ang kahadlok wala maggikan sa Langitnong Amahan. Kon imo Siya nga iprayoridad, makatabang Siya kanimo nga mahimo ang bisan unsang butang ug matuman ang tanan nga gikinahanglan gikan kanimo.