Digital Lamang: Mga Young Adult

Alang sa Kaayohan sa Katahum sa Yuta

Ni Annelise Gardiner

Mga Magasin sa Simbahan

Ang yuta mao ang usa ka gasa alang kanato nga malingaw, apan ang Dios nagtinguha kanato nga moatiman usab niini nga nilalang.

Imahe

paghulagway sa mga kamot nga naggunit sa kalibutan

Natan-aw na ba nimo ang palibut diha sa pagkamahimayaon sa yuta ning bag-ohay lang? Nakamatikod ka ba sa tingog sa hangin nga naghaguros ngadto sa mga kahoy, nakadayeg sa matam-is nga kahumot sa ihalas nga mga bulak, o nakahimo sa imong mga mata nga magpabilin diha sa pagkahingpit sa matag maanindot nga panganod sa langit?

Ang Langitnong Amahan naglalang og matahum nga mga kahibulongan alang sa tanan Niyang mga anak nga malingaw, apan usahay kini sayon nga kalimtan nga kita adunay pagkatinugyanan sa paghimo sa kalibutan nga matahum alang sa atong mga kaugalingon—ug alang sa tanan.

Ang kasulatan nagsulti kanato nga “ang tanan nga mga butang nga gikan sa yuta… gihimo alang sa kaayohan ug sa paggamit sa tawo” (Doktrina ug mga Pakigsaad 59:18) ug nga ang Dios nagsugo sa katawhan sa “pagbaton og gahum [sa yuta], ug pagmando ibabaw … sa matag buhi nga butang” (Moises 2:28). Kitang tanan adunay “tulubagon, ingon nga usa ka tinugyanan ibabaw sa yutan-on nga mga panalangin” (Doktrina ug mga Pakigsaad 104: 13). Ug sa kanunay kita nagpataas sa atong mga tingog sa usa ka “salamat o, Ginoo” “sa katahum sa yuta.”¹

Kita Ba Maayong mga Magbalantay sa Yuta?

Busa sa unsang paagi kita nagdayeg ug nag-atiman niining matahum nga yuta nga gilalang alang kanato? Usa ka paagi mao ang paghunahuna kon giunsa sa atong mga pagpili karon mahitungod sa planeta maka-apekto sa tanang mga anak sa Dios, dili lamang sa atong mga kaugalingon.

Human ang tanan, ang mga pagpili sa atong mga katigulangan nakaapekto kanato, diha-diha ba dayon o sa laing paagi, sa mas maayo o sa mas grabe pa. Makapangutana kita sa atong mga kaugalingon kon kita nag-atiman ba sa mga nilalang sa Dios, nagmanggihatagon ba ngadto sa uban, dili ba usikan sa mga kapanguhaan, ug mapasalamaton ba alang sa tanan nga Iyang gihatag kanato. Makahunahuna kita kon naghimo ba kita og usa ka kalibutan diin ang umaabut nga henerasyon makakat-on ug magpuyo sa ebanghelyo—ug kon kita nag-andam ba sa yuta alang sa Ikaduhang Pag-anhi ni Jesukristo.

Sa usa ka komperensya sa organisasyon sa LDS Earth Stewardship [LDS nga Pagkatinugyanan sa Yuta],² si Sister Sharon Eubank, Unang Magtatambag sa Kinatibuk-ang Kapangulohan sa Relief Society nangutana: “Kon kita nag-usik sa unsay gikinahanglan pag-ayo sa uban, unsa ang mga sangputanan sa atong mga pagbati ug sa atong panaghiusa? Kini usa ka malisud nga pangutana alang sa mga tawo kinsa nagpuyo sa unsay atong gitawag nga Dato nga mga Nasud sa kalibutan tungod kay kini hapit imposible nga dili mag-usik og mga butang. Apan ang atong Ginoo ug Dios, isip ang Tiglalang, walay giusik; ang Iyang paagi walay usik. Kon atong giusikan ang unsay gikinahanglan pag-ayo sa uban, unsa ang mahitabo sa mga butang ug mga pagbati tali kanato isip binuhat nga mga tawo?”³

Unsaon Pag-atiman og Mas Maayo ang Yuta

Unsay atong mabuhat sa pag-atiman sa yuta ug dili mag-usik sa bililhong mga kapanguhaan niini? Sa unsang paagi kita makatabang sa pagpalambo ug pagpatunhay sa katahum sa yuta? Aniay pipila ka mga ideya nga makahatag og pagdasig:

Hinumdumi ang Tiglalang. Sayon nga makakita sa katahum ug gahum sa kinaiyahan, apan usahay kita makalimot kon diin gikan kana nga katahum. Ayaw simbaha ang nilalang hinoon ang Tiglalang. Ang yuta nagpamatuod nga adunay usa ka Makagagahum nga Tiglalang (tan-awa sa Alma 30:44).
Pagpuyo nga lagom. Sa Swedish, ang pulong nga lagom nagpasabut og “igo” o “husto ra ang gidaghanon.” Kon kita mogamit og igo ra sa tanan nga atong gikinahanglan––pagkaon, saput, mga produkto—kita makalikay sa pag-usik sa bililhong mga kapanguhaan. Lagom nagpasabut sa pagpangita og balanse sa dili kaayo daghan apan dili usab kaayo gamay.
Pagkat-on mahitungod sa inyong palibut. Susiha kon unsa nga mga hayop ug mga tanom ang lumad sa diin ka nagpuyo. Pagkat-on sa ilang mga ngalan ug sa mga kamatuoran mahitungod niini (sama pananglit, “kini nga mga tanom wala magkinahanglan og daghan nga tubig”; “kini nga mga hayop aktibo sa gabii”). Ang pagkat-on mahitungod sa inyong palibut makapausab sa paagi sa inyong pagtagad niini.
Pagsunod sa Pulong sa Kaalam. Kini sayon kaayo nga makita ang koneksyon tali sa yuta ug sa unsay atong gikaon. Kita makatabang sa pag-atiman sa mga nilalang sa Dios pinaagi sa pagsunod sa Pulong sa Kaalam—naglakip kini sa pagkaon sa mga bunga ug mga lugas, apan sa paggamit sa karne sa “ginagmay” ug uban ang pasalamat (tan-awa sa Doktrina ug mga Pakigsaad 89).
Timbang-timbanga ang imong mga lihok. Sa unsang paagi ang imong mga lihok makaapekto sa imong palibut? Naglakip ang imong palibut sa kinaiyahan, luna, ug katawhan nga naglibut kanimo. Ang paghunahuna og maayo sa imong impluwensya sa kalibutan motabang kanimo sa pag-angkon og impormasyon nga imong gikinahanglan nga makadawat og inspirasyon gikan sa Langitnong Amahan kabahin sa unsay imong mabuhat sa pagtabang sa pag-atiman sa kalibutan.

Ang Dios milalang sa yuta alang kanato ug sa pagtabang sa pagtubag sa atong mga panginahanglan, busa pinaagi sa pag-atiman sa yuta, kita usab nagtabang sa pag-atiman sa Iyang mga anak ug sa tanan Niyang mga nilalang. Si Presidente Russell M. Nelson nag-ingon: “Isip mga sumusunod sa balaan nga Paglalang, unsay atong buhaton? Kita kinahanglang moatiman sa yuta, magmaalamon nga mga tinugyanan sa tanan niini, ug magpatunhay niini alang sa umaabut nga mga henerasyon. Ug kita gikinahanglan sa paghigugma ug pag-atiman sa usag usa.”⁴ Samtang kita mamati niini nga tambag ug mohimo sa atong bahin sa pagtabang sa pag-atiman sa yuta, magsugod kita sa pagdayeg og mas maayo pa gyud sa matag “bungtod ug walog, ug kahoy ug bulak.”⁵ Ang atong mga paningkamot mahimong takus alang sa atong mga kaugalingon, alang sa umaabut nga henerasyon ug alang sa pagpadayon nga katahum sa yuta.