Pagdali-dali ngadto sa Miting sa Sakramento
Nagtuo ko nga makapalta kami sa sakramento—na sab.
Litrato gikan sa Getty Images
Sa dihang mibalhin kami gikan sa Estados Unidos ngadto sa Vietnam, ang akong bana ug ako determinado nga dili gayud mopalta og simba. Human sa usa ka tuig, wala kami makapalta bisag kausa sa miting sa Domingo, apan kanunay lang kami maulahi ug kasagaran makapalta sa sakramento. Ang among panagtigum alang sa sakramento nagsugod sa alas 8:30 sa buntag. Uban sa tulo ka gagmayng mga anak, ang pagpangandam alang sa simbahan sa tukmang oras sa kanunay ingon og imposible.
Isip usa ka pamilya kami nakahukom nga kami kinahanglan nga kanunayng moabut sa Simbahan sa tukmang oras ug moambit sa sakramento. Kini usa ka panglimbasug, apan nakaabut kami sa simbahan sa tukmang oras sulod sa nagsunod nga upat ka Dominggo. Akong namatikdan ang kalainan sa among nahimo nga mga paningkamot. Nakabaton kami og dugang nga espirituhanong mga kasinatian atol sa semana.
Pagkasunod Dominggo, hinoon, dugay kami nakabangon. Alas 7:30 na sa buntag. Gisultihan nako ang akong bana nga wala nay paglaum, apan naghunauna ko kon sa unsang paagi nga kami mapanalanginan kon kami mobuhat sa among labing maayo nga maandam sa bisan unsang paagi. Mao nga, nagdali-dali kami!
Sa dihang miabut kami sa simbahan, naulahi na kami og 20 minutos. Mibati ko nga napakyas kami. Nadungog namo ang pagpanganta sa dihang misulod kami, ug sa dihang akong giablihan ang pultahan, ang usa ka tawo mipadulong nga mosaka sa atubangan aron mag-ampo.
“Mao pa ba kana ang pangbukas nga himno?” Mihunghong ko sa misyonaryo nga nagbarug diha sa may pultahan.
“Oo,” miingon siya. “Dugay kita nga nakasugod karon.”
Nakuratan ko. Nagtuo ko nga napakyas na usab kami, apan miabut kami sa simbahan nga igo ra gayud sa oras! Midagayday ang mga luha sa akong mga aping samtang mibati sa gugma sa Langitnong Amahan alang sa akong gamay nga pamilya ug kanako.
Sa wala madugay among nahibaloan nga sa dihang miabut ang mga misyonaryo sa simbahan niana nga Dominggo, ilang nahibaloan nga walay nakadala og pan alang sa sakramento. Walay tindahan nga duol, ug ang pan lisud pangitaon sa Vietnam. Human sa kadiyot nga pagkaguliyang, ang mga elder nakahinumdom nga sila adunay pan sa balay.
Pipila ka adlaw sa wala pa, ang mga elder miadto sa balay alang sa panihapon. Nianang gabhiona, giandam nako ang homemade nga pan alang nila. Ang Simbahan dugayng nakasugod sa Dominggo sa buntag tungod kay ang mga elder midagan pa ngadto sa balay sa pagkuha sa pan nga akong gihimo alang kanila!
Nakita sa Dios ang among mga paningkamot samtang kami nanglimbasug sa pagtuman sa Iyang mga sugo. Bisan og usahay kita mapakyas, Siya nahigugma kanato ug moandam og mga paagi alang kanato aron molampus—bisan kon kini mao lang ang pag-adto sa simbahan sa hustong oras.