Welcome Niini nga Isyu
Ang Kalibutan Nagkinahanglan og Matinud-anong Kababayen-an
Sukad sa unang mga adlaw ni Inahang Eva, ang kababayen-an naghimo og importanting tahas sa pagtabang sa pagpahinabo sa plano sa Dios alang sa Iyang mga anak. Karong bulana, kita adunay kahigayunan sa pagkat-on og dugang mahitungod sa pipila ka kababayen-an nga mga pioneer sa unang mga adlaw sa Pagpahiuli sa ebanghelyo. Sama pananglit, diha sa pahina 25 atong mabasa ang mahitungod sa kaisug ni Emma Smith. Samtang kita magtuon sa Doktrina ug mga Pakigsaad 25, atong madungog ang mga pulong sa Ginoo nga nagsugo kaniya sa paghimo og usa ka koleksyon sa sagradong mga himno.
Ang Pagpahiuli nagpadayon sa atong panahon, ug ang kalibutan nagkinahanglan sa dakong ikatampo sa matinud-anong kababayen-an labaw pa kay sa kaniadto. Sa pahina 12, inyong mabasa kon sa unsang paagi nga kaming nagserbisyo isip Kinatibuk-ang mga Opisyales sa Simbahan nakakita sa gahum sa pagkapari nga naglihok sa atong mga kinabuhi. Kining gahum sa pagkapari, nga magamit sa kalalakin-an ug kababayen-an, mao ang nagtugot sa buhat sa Dios nga magpadayon dinhi sa yuta. Mahimo usab ninyong basahon ang mensahe gikan ni Presidente M. Russell Ballard sa pahina 8 mahitungod sa kababayen-an kinsa nakatabang og hulma sa iyang kinabuhi.
Dili igsapayan sa atong sekso, edad, kaliwat, o uban pang mga kahimtang, kitang tanan hinigugma nga mga anak sa Dios nga adunay balaanong panulundon ug potensyal.
Matinuoron,
Presidente Joy D. Jones
Kinatibuk-ang Presidente sa Primary