Si Emma Mipanalipod sa Kasulatan

Imahe

Emma Smith on horseback

Paghulagway ni Toni Oka

Human lang gayud sa tungang gabii niadtong Septyembre 22, 1827, usa ka karwahe ang hilom nga mibiyahe subay sa kabaryohan duol sa Manchester, New York, USA. Si Joseph ug Emma Smith nagpadulong ngadto sa usa ka bungtod diin ang usa ka karaang rekord, nga gisulat diha sa bulawang mga palid, naghulat kanila. Usa ka anghel nga ginganlan og Moroni misulti ni Joseph sa pagdala sa husto nga tawo uban kaniya aron sa pagkuha sa rekord. Pinaagi sa personal nga pagpadayag, si Joseph nasayud nga ang iyang asawa, si Emma, mao ang kana nga tawo.

Si Emma nagpaabut samtang ang iyang bana nga propeta midawat sa mga palid ug dayon mitago niini diha sa usa ka troso nga dunay lungag. Ang adlaw misugod sa pagsubang samtang ang magtiayon mipauli sa balay.

Pagkasunod adlaw, nakadungog si Emma gikan kang Joseph Smith Sr. nga usa ka grupo sa mga tawo ang nagplano sa pagkawat sa bulawang mga palid. Mikuha og kabayo nga wala gigamit, mibiyahe siya og sobra sa usa ka oras aron sa pagpasidaan ni Joseph, kinsa nakahimo sa pagsulod sa mga palid sa usa ka gikandaduhan nga kahon.

Dili lamang kini ang bugtong panahon nga si Emma mipanalipod sa bililhong kasulatan. Sa panaw sa magtiayon padulong ngadto sa Pennsylvania, mitabang siya sa pagtago sa mga palid diha sa usa ka baril nga adunay mga abitsuylas [bean]. Atol sa proseso sa paghubad, mihatag si Emma kang Joseph og lino nga panapton aron sa pagtabon sa mga palid samtang gibutang kini ibabaw sa lamesa sa kusina maadlaw ug mipalit og pula nga panit nga kahon alang sa mga manuskrito nga gisulat sa papel. Nangayo usab siya sa iyang bayaw og kahon, nga gitago niya ug ni Joseph sa ilawom sa ilang higdaanan ug diin ang mga palid gikandaduhan matag gabii. Pipila ka tuig ang milabay, si Emma mipanalipod sa manuskrito sa hubad sa Propeta sa Biblia, sa pagdala niini nga gitagoan sa ilawom sa iyang sayal samtang nagtabok sa mikaging nga Suba sa Mississippi.

Agi og dugang sa pagpanalipod sa mga kasulatan, si Emma mitabang sa paghubad sa Basahon ni Mormon. Siya mao ang una nga tigsulat ni Joseph—nga mainampingong nagsulat sa mga bersikulo nga gigamit nato karon. Mitahi siya og puntil alang sa usa ka bato sa manalagna nga usahay gigamit ni Joseph sa paghubad.

Sa katapusan sa iyang kinabuhi, nahinumdom si Emma sa iyang tahas sa pagtabang sa pagpaambit niini nga mga kasulatan ngadto sa kalibutan. “Ako usa ka aktibo nga partisipante,” miingon siya. Mipamatuod siya nga si Joseph usa ka propeta sa Pagpahiuli ug nga ang Basahon ni Mormon “usa ka kahibulongan ug usa ka katingalahan.”¹