Ang Mabayanihong Impluwensiya sa Matarung nga mga Babaye

Imahe

grupo sa mga babaye nga may talan-awon sa siyudad

Ang pipila sa akong paborito nga mga handumanan sa pagkabata mao kanako nga nagtikung-kong ilawom sa akong habol, naggunit og espat samtang gibasa og dali ang katapusang mga pahina sa usa ka nagustuhan nga basahon. Ang gubat nadaug, ang mga magdudula nga akong nagustuhan mga luwas, ug ako nalipay. Ako maghigda nga nagmata, naghunahuna kon unsay pagabation nga mahimong ang mananaog nga labing importanting magdudula, ug kon ako sa katapusan katulgon na, ako adunay pahiyom diha sa akong nawong.

Gusto ko ug lain-lain nga kinabuhi pinaagi sa mga magdudula diha sa akong mga basahon tungod kay ako nakasiguro nga ang usa ka tawo nga ingon ka ordinaryo sama kanako dili gayud mahimong usa ka bayani.

Sa hilum nga paagi gihuptan ko kini nga pagtuo hangtud nga kini gihagit sa pipila ka semana nga milabay diha sa akong kolehiyo nga klase sa psychology sa dihang ako gihangyo sa pagsulat mahitungod sa akong mga bayani. Ang unang mga nawong nga miabut sa hunahuna mao ang mga babaye sa akong kinabuhi. Sa una, ako misupak batok niini nga ideya, naghunahuna nga daghan kaayong mga tawo nga nagsulat mahitungod sa unsang paagi ang ilang mga inahan o mga iyaan o mga lider sa Young Women nga mao ang ilang mga bayani. Apan nakaamgo ako nga kana mao ang eksakto nga punto.

Kadaghanan sa mga tawo kinsa nakapausab sa akong kinabuhi dili ang gamhanang mga tawo sa social media o mga bilyonaryo o inila nga mga eksperto. Ang akong mga bayani mga tawo kinsa naggahin og panahon sa pagpakita kanako og Kristohanong gugma ug nagtabang kanako nga makasabut kon kinsa ako sa tinuoray.

Ang atong gahum isip matarung nga mga babaye nagagikan sa pagkaamgo sa atong kaugalingong importansya, sa atong balaan nga pagkatawo, ug sa atong kapasidad sa paghuman sa daghan nga mga butang. Agi og resulta, ang pagkaamgo sa atong kaugalingong bili nagtugot kanato sa pagtabang sa uban nga makasabut sa ilang mga kalig-on ug sa ilang mahangturong bili usab.

Si Sister Jean B. Bingham, Kinatibuk-ang Presidente sa Relief Society, miawhag kanato “sa pagpangita sa atong mga gasa ug sa pagpalambo niini, maghinumdom kon kinsa ang mihatag kanato niini, ug dayon gamiton kini alang sa Iyang mga katuyoan. Samtang nagpakigbahin kita sa atong mga gasa sa pagpanalangin sa uban, kita nagsinati sa gahum sa pagkapari diha sa atong mga kinabuhi.”¹ Importante kaayo kini alang sa mga babaye ang kanunay nga pagsabut nga ang kalibutan “nagkinahanglan sa inyong kalig-on, sa inyong pagkakabig, sa inyong konbiksyon, sa inyong abilidad sa pagpangulo, sa inyong kaalam, ug sa inyong mga tingog.”²

Dugang pa, ingon ka gamhanan kutob sa atong mahimo isip mga indibidwal, kita mas lig-on kon maghiusa kita. Ang mga palas-anon mahimong bug-at kon kita magpalahi o mag-inusara, apan mag-uban kita makahimo nga “[m]agtambayayong sa usag usa nga mga alantuson” ug sa pagbangutan “uban niadto nga nagbangutan” ug sa paghupay “niadto nga nagkinahanglan sa kahupayan” (Mosiah 18:8–9). Kita kinahanglan nga mohunong sa paghukom ug sa pakigkompetensya sa usag usa sama sa gihimo sa kalibutan. Nagkinahanglan kita sa usag usa diha sa nagpadayon nga Pagpahiuli sa ebanghelyo.

Sa batan-on pa ko, akong gipasabut ang pagkabayani isip usa ka tawo nga nagluwas sa kalibutan pinaagi sa usa ka talagsaon nga sakripisyo. Ang pagkabayani usa ka butang nga imong makita sa mga balita—usa ka walay kahadlok nga bombero nga nagbitad og usa ka bata gikan sa usa ka nagkalayo nga gambalay o usa ka isug nga husky nga iro nagluwas sa tag-iya niini atol sa mabangis nga unos sa tingtugnaw. Apan ang akong pagpatin-aw sa pagkabayani gidetalye. Ang pagkabayani mao ang piraso sa pan gikan sa usa ka tigpangalagad nga sister tungod kay siya nadasig sa pagserbisyo kanimo. Ang pagkabayani mao ang pagpadala og usa ka makapadasig nga text ngadto sa usa ka tawo tungod kay gibati nimo ang pag-ahat nga sila nagkinahanglan nga makadungog sa imong mga pulong. Ang pagkabayani mao ang paghalad sa imong abaga nga mamansahan sa mga luha sa usa ka sister nga nagbangutan. Ang pagkabayani mapainubsanon, hilum ug maisugon. Ang pagkabayani mao ang kaisug sa paghimo og ginagmay nga mga lakang sa pagserbisyo ug paghigugma sa uban, bisan sa panahon sa kakapoy, walay kasiguroan, o kakulang sa pagbati. Ang pagkabayani nahimo sa ginagmay nga mga paagi, kay “pinaagi sa gagmay ug yano nga mga butang ang mga dagko nga butang ipahinabo” (Alma 37:6).

Samtang ang kahayag sa atong indibidwal nga pagkabayani adunay ingon og gamay nga lugway, ang pag-uban mao ang makapaabut sa kahayag sa gugma ni Kristo sa tanang suok sa kalibutan. Sama sa atong pinalanggang propeta, Presidente Russell M. Nelson, nga nag-ingon: “Minahal kong mga sister, walay laing mas importante pa sa inyong kinabuhing dayon kay sa inyong kaugalingong pagkakabig. Kini ang nakabig, mga babaye nga nagtuman sa pakigsaad … kansang matarung nga kinabuhi maoy mopatigbabaw sa nagkabati nga kalibutan ug sa ingon makita nga buwag ug lahi diha sa labing malipayon nga mga paagi.”³

Ingon ka nindot sama sa mga dragon ug magic ug dugay nga nahumang mga gubat, usa ka adlaw—kon ako mobasa sa basahon sa akong kinabuhi—gusto ko nga makita nga ako mainantuson diha atubangan sa kalisdanan, mabination diha atubangan sa kabangis, ug maaghup diha atubangan sa kasilag. Gusto kong magbasa mahitungod kanako nga nakigsultihanay sa masulub-on ug nagpanalipod sa gibaliwala sa katilingban, nagtabang kanila nga makakita sa ilang kaugalingon sa paagi nga ang Dios nakakita kanila. Gusto kong mahibalo nga tungod kay ako masaligon kon kinsa ako ug nasayud sa gahum sa akong impluwensya, ako mitabang sa pag-usab sa kalibutan alang sa kaayohan, mitabang sa pagpadayon sa buhat sa Ginoo (bisan sa ginagmay nga mga paagi), ug mitabang sa pag-andam sa kalibutan alang sa Iyang pagbalik. Ug kon akong buhaton, akong tan-awon nga akong gihimo kini uban sa tabang ug impluwensya sa akong minahal nga mga sister ug mga babaye kinsa katingalahang mga ehemplo sa pagkadisipulo.