Digital Lamang: Mga Young Adult
Akong Usa ka Parisang Pantalon: Usa ka Talan-awon sa Ebanghelyo kabahin sa Pagpuyo og Yano
Akong nakaplagan ang tumang kalipay sa usa ka estilo sa kinabuhi nga nagsuporta sa katuyoan sa pag-atiman sa yuta.
Ako nanag-iya og usa lamang ka parisang pantalon––usa ka parisang nindot nga itum nga karsones. Kini ingon og dili sagad nga paminawon, apan kana nga kataw-anang kamatuoran nagdala kanako og dakong kalipay. Human sa kolehiyo, ako kinahanglan nga mopahawa sa akong apartment sa Finland, ug tungod kay giplano nako ang duha ka bulan nga biyahe ngadto sa Estados Unidos, kinahanglan akong maghunahuna kon unsay buhaton sa akong tanan nga mga butang. Busa mihimo ako og imbentaryo sa tanan nga akong gipanag-iya ug nakaamgo nga ako nagkinahanglan sa tinuod og mas diyutay kay sa ako aduna. Human sa pipila ka matinuoron nga paghunahuna, mihukom ako sa pagbaligya sa akong sobra nga mga butang sa dili pa mobalhin. Ganahan ko sa unsay gibati, ug bisan kini pipila ka tuig na, ang pagbati nga wala nay daghang mga butang dili katuohan nga nahaw-asan hangtud niining adlawa.
Samtang ako dili makasulti nga ako hingpit nga usa ka tinagidyot, sa klaro akong gibalhin ang akong estilo sa kinabuhi niana nga direksyon. Ingon nga mas nakaamgo sa unsa ug pila ang akong mahurot sa tinuod nagpahunahuna kanako mahitungod sa akong personal nga responsibilidad alang sa palibut, ilabi na gikan sa talan-awon sa ebanghelyo.
Daghan vs. Naghingapin
Diha sa mga kasulatan, atong makat-unan nga ang yuta gilalang alang kanato nga mapuy-an (tan-awa sa 1 Nephi 17:36) ug nga ang tanan nga mga butang dinhi sa yuta gihimo alang sa atong kaayohan (tan-awa sa Doktrina ug mga Pakigsaad 59:16–19). Gitambagan na kita nga mahimong maayo nga mga tinugyanan niini nga yuta, diin nag-aghat sa pangutana kabahin sa unsang paagi kita makatuman nianang importanting responsibilidad. Usa ka paagi mao ang pagtimbang-timbang kon unsa nga mga kapanguhaan ang gigamit nato.
Ang Ginoo mihatag kanato niini nga mga kapanguhaan aron nga kita “makaangkon og kabuhong” (Doktrina ug mga Pakigsaad 49:19). Apan nasayud usab Siya sa tawhanong kinaiyahan, busa Siya mipasidaan kanato batok sa paggamit niining mga kapanguhaan nga naghingapin (tan-awa sa Doktrina ug mga Pakigsaad 59:20). Bisan unsa nga naghingapin makahimo kanato sa pagbale-wala, nga mahimong moresulta sa dili lamang usa ka tig-a nga kasingkasing o kapakyas sa pag-ila kang kinsa gikan ang atong mga panalangin, apan usab, niini nga sitwasyon, mga problema sa palibut. Kini kasagaran nakapahunahuna kanako: hain ang utlanan tali sa pagbaton “sa kabuhong” ug pagbaton nga naghingapin?
Ang Doktrina ug mga Pakigsaad 59: 18–19 mipaila sa ideya nga ang “tanan nga mga butang nga gikan sa yuta … gihimo alang sa kaayohan ug sa paggamit sa tawo, aron sa pagpahimuot sa mata ug sa pagmaya sa kasingkasing; … sa paglig-on sa lawas ug sa pagpabuhi sa kalag.” Kita makasabut nga ang mga kapanguhaan wala ihatag ngari kanato alang lamang mabuhi—sila usab alang sa pagtampo sa atong hingpit nga kalipay.
Pagkaplag og Kalipay sa Pagbaton og Dili Daghan
Sa dihang ako naghunahuna hain nga mga saput ang mawala ug hain ang ipabilin, akong gihuptan lamang kutob sa akong gibati ang tinuoray nga akong gikinahanglan, ug usab hain nga mga butang ako labing ganahan. Nakaamgo ako nga sa pag-angkon og daghang mga butang, sama sa mga saput, ako adunay mas lisud nga panahon sa pagdayeg niini. Human makapili sa mga pantalon nga akong nagustohan gayud ug sa tinuod gigamit, mibati ako og mas dakong kalipay nga nagsul-ob niini. Kini magamit ngadto sa daghan sa akong ubang mga butang usab.
Usahay maayo ang paghimo og pagtimbang-timbang sa atong mga kinabuhi ug sa paghimo og mga pahiangay sa atong mga relasyon uban niining hinatag sa Dios nga mga kapanguhaan. Sa akong sitwasyon, ako nakakaplag og kalipay sa pagbaton og gamay ra, ug miresulta kini sa usa ka kausaban sa estilo sa kinabuhi nga mitabang kanako sa pag-atiman sa yuta.
Bisan og ang atong indibidwal nga mga paningkamot sa pag-atiman sa yuta dili ingon nga nakahimo og importanting kalainan, kita maandam sa pag-edukar sa atong mga kaugalingon ug sa paglihok. Kita makapangayo og giya sa Espiritu samtang kita nagtimbang-timbang sa atong mga kinabuhi ug naghimo og mga desisyon mahitungod sa atong materyal nga mga kabtangan ug sa atong mga lihok. Ingon nga ang Ginoo manggihunahunaon sa tanan Niyang mga nilalang––bisan ang matag dahon sa sagbot—hinaut nga kita usab mahimong igo ka manggihunahunaon niini nga yuta pinaagi sa paghimo sa gikinahanglan nga mga kausaban, pagpangita mahitungod sa unsay atong malingawan niini, ug sa pagbalhin sa atong mga kasingkasing sa pagpatunhay niini.