Alang sa mga Ginikanan

Sakramento ug Musika

Imahe

Jesus Christ instituting the sacrament among the people in the Americas

The Last Supper [Ang Katapusang Panihapon], ni Carl Heinrich Bloch; litrato sa batan-ong babaye nga nag-ampo, ni Angela Suitter; Prayer at Gethsemane [Pag-ampo didto sa Getsemani], ni Del Parson; That Ye Do Always Remember Me [Nga Kamo Sa Kanunay Mahinumdom Kanako], ni Gary L. Kapp, dili mahimong kopyahon

Minahal nga mga Ginikanan,

Ang mga magasin sa Simbahan gihimo nga gihunahuna kamo ug ang inyong pamilya. Niini nga bulan, ang mga magasin nakatutok sa mga tema sama sa sakramento, makadasig nga musika, ang tahas sa kababayen-an sa Pagpahiuli, Pasko sa Pagkabanhaw, ug pagpangandam alang sa kinatibuk-ang komperensya. Tan-awa sa ubos alang sa mga ideya kon unsaon nga mapuslan ninyo og maayo ang isyu niining bulana aron sa paglig-on sa pagtuo sa inyong pamilya diha ni Kristo ingon man usab sa inyong kaugalingong hugot nga pagtuo.

Mga Panaghisgutan sa Ebanghelyo

Ang Pagsugod sa Simbahan

Basaha ang artikulo ni Elder De Hoyos sa pahina 36 ug hisguti ang mga panalangin nga inyong nadawat pinaagi sa pagkahisakop sa Simbahan ni Kristo, sama sa adunay buhi nga mga propeta, tinuod nga doktrina, ug mga ordinansa sa pagkapari.

Ang Importansya sa Musika

Ngano nga ang musika espesyal man sa Ginoo? Paminawa, kantaha, o tukara ang bag-ong komposisyon sa awit nga “Mipadala sa Bugtong Anak” sa pahina 34; dayon ipaambit ang inyong mga hunahuna mahitungod sa musika o sa mga pulong sa awit [lyrics]. Alang sa dugang pa mahitungod sa importansya ug mga panalangin sa musika, basaha ang artikulo sa pahina 30.

Ang Tahas sa Kababayen-an sa Pagpahiuli

Sa pahina 25 basaha mahitungod kon giunsa sa pagpanalipod ni Emma Smith ang Basahon ni Mormon sa makugihong paagi. Sa unsang paagi nga ang kababayen-an nakapanalangin sa Simbahan, ug sa unsang paagi nga sila nagpadayon sa pagbuhat sa ingon? Mahimo usab ninyong basahon ang mensahe ni Presidente Ballard diha sa pahina 8, ug pasalamatan ang matarung nga kababayen-an sa inyong kinabuhi pinaagi sa usa ka sulat o mabination nga buhat.

Paghimong Espesyal sa Sakramento

Basaha ang istorya sa usa ka pamilya sa Vietnam diha sa pahina 18 ug ikonsiderar kon unsaon sa inyong pamilya nga mahimong mas espesyal ang sakramento. Ang mga ideya mahimong maglakip sa pagpaminaw o pagkanta og mga himno padulong sa simbahan, paghinumdom sa mga kasulatan nga naghulagway sa kinaiya ni Kristo samtang kamo naghunahuna Kaniya atol sa sakramento, o pagpamalandong sa mga pulong sa mga pag-ampo sa sakramento.

Mahimo usab ninyong gamiton ang pahina 6 sa pagtudlo sa inyong mga anak mahitungod sa sakramento.

Suporta sa Dali, Sunod Kanako

Tan-awa sa pahina 26 alang sa usa ka haum sa pamilya nga leksyon nga maggamit og butang [family-friendly object lesson], pagsumpay-sumpay sa kasulatan [scripture chain], ug ubang materyal aron sa pagsuporta sa inyong sinemana nga pagtuon sa Dali, Sunod Kanako.

Lingaw-lingaw sa Pamilya nga Pagtuon

Matahum nga mga Nilalang sa Dios

Doktrina ug mga Pakigsaad 20:17–19

Basaha ang Doktrina ug mga Pakigsaad 20:17–19 mahitungod kon sa unsang paagi nga ang Dios milalang “sa langit ug sa yuta, ug sa tanan nga mga butang diin anaa kanila.”

Paggahin og panahon nga motan-aw sa gawas sa bintana o maglakaw-lakaw.
Ilha ang mga nilalang sa Dios nga inyong makita.
Ang bersikulo 18 nagsulti kanato nga ang Dios “naglalang sa tawo, lalaki ug babaye, sumala sa iyang kaugalingon nga panagway ug sa iyang kaugalingon nga hitsura, siya naglalang kanila.” Kita usab ang pipila sa mga nilalang sa Dios! Paggahin og panahon aron sa pagdayeg sa tanang butang nga mabuhat sa inyong lawas. Unsa ang inyong mga talento?
Diha sa bersikulo 19 gimandoan kita nga “maghigugma ug mag-alagad kaniya, ang bugtong buhi ug tinuod nga Dios.” Sa unsang paagi ninyo magamit ang inyong mga talento sa pag-alagad Kaniya?

Panaghisgutan: Sa unsang paagi kita makasimba sa Dios?

Sa Wala Pa ug Pagkahuman Na

Doktrina ug mga Pakigsaad 20:11, 21–29 (Pebrero)

Sa Doktrina ug mga Pakigsaad 20, atong mabasa kon sa unsang paagi nga ang Dios midasig ni Joseph Smith sa pag-organisar sa Simbahan ni Jesukristo dinhi sa yuta. Ang Doktrina ug mga Pakigsaad 20:11 nagsulti kanato nga “ang Dios nagdasig sa mga tawo ug nagtawag kanila ngadto sa iyang balaan nga buhat niini nga panahon ug kaliwatan, ug ingon sa karaan nga mga kaliwatan.”

Ipakita ang usa ka litrato ni Jesukristo.
Bahina ang pamilya ngadto sa “sa wala pa” nga grupo ug sa “pagkahuman na” nga grupo.
Ang mga sakop sa pamilya sa matag grupo mangita sa mga pulong sa usa ka propeta kinsa mipamatuod ni Kristo sa wala pa ang Iyang kinabuhi dinhi sa yuta o pagkahuman na.
Pagpuli-puli sa pagpaambit sa unsay nakit-an sa matag usa ninyo. Ang uban motag-an kon kini nasakop sa “sa wala pa” o “pagkahuman na” nga grupo.
Human sa pagpaambit, ang mga tawo sa “sa wala pa” nga grupo mobarug sa wala sa litrato ni Kristo. Ang mga tawo sa “pagkahuman na” mobarug sa tuo.
Ipasabut nga importante ang duha ka grupo.

Panaghisgutan: Basaha ang Doktrina ug mga Pakigsaad 20:21–29. Sa unsang paagi nga kining moderno nga pagpamatuod ni Kristo makatabang kanato nga mobati nga mas duol Kaniya? Unsa ang ubang mga pagpamatuod ni Kristo nga makita diha sa mga seksyon 20–29 sa Doktrina ug mga Pakigsaad?

Niining Bulana sa Alang sa Kalig-on sa mga Kabatan-onan nga Magasin

Ang Pinakaimportanting Bahin sa Pasko sa Pagkabanhaw—ang Buhi nga si Jesukristo

Pakig-istorya sa inyong mga tin-edyer mahitungod niini nga mensahe gikan ni Elder Gerrit W. Gong nga nagsaulog kon sa unsang paagi si Kristo nabuhi alang kanatong tanan.

Notebook sa Komperensya

Kini usa ka nindot kaayo nga paagi sa pagpangandam ug paghimo og mubo nga mga sulat [notes] atol sa kinatibuk-ang komperensya!

Sama sa usa ka Bintana sa Inyong Kalag

Ipaambit kini nga istorya mahitungod kon sa unsang paagi nga ang usa ka grupo sa musika sa nagkalainlaing tinuhoan [interfaith music group] sa Florida, USA, nakatandog og mga kinabuhi.

Unsaon aron Kanunay nga Makabaton sa Espiritu

Si Elder Pieper mipaambit og nindot kaayo nga mga sugyot kon unsaon sa pagdapit sa Espiritu nga magauban kanato matag adlaw.

Niining Bulana sa Higala nga Magasin

Suporta sa Luwas nga Paggamit sa Media

Basaha ang mahitungod sa usa ka batang babaye kinsa nakakat-on kon unsay gipasabut sa paggamit sa teknolohiya sa maalamong paagi. Pangitaa usab ang bonus nga pahina nga adunay mga sugyot ug mga ideya sa pagtabang sa inyong mga anak nga mogamit sa media sa luwas, positibo nga mga paagi.

Pag-ilaila sa Doktrina ug mga Pakigsaad

Gamita ang usa ka pahina sa kalihokan aron sa pagtabang sa inyong mga anak nga masayud kon unsa ang Doktrina ug mga Pakigsaad ug diin kini gikan.

Pasko sa Pagkabanhaw didto sa Russia

Basaha ang mahitungod kon giunsa sa usa ka pamilya pagsaulog ang Pagkabanhaw sa Manluluwas atol sa panahon sa Pasko sa Pagkabanhaw.

Makalingaw nga Panahon sa Kasulatan

Pangita og sinemana nga mga kalihokan sa pagtabang sa inyong pamilya nga magtuon sa Dali, Sunod Kanako, lakip ang usa ka seksyon nga adunay mga ideya ilabi na alang sa gagmayng mga bata.

Paglaum diha kang Kristo

Basaha ang usa ka mensahe sa Pasko sa Pagkabanhaw gikan ni Presidente Henry B. Eyring ug buhata ang usa ka kalihokan nga nagsaysay sa istorya sa Pasko sa Pagkabanhaw.