Pasidungog sa usa ka Prinsipal sa Seminary

Imahe

young woman shaking a man’s hand

Litrato gikan sa Getty Images, giposingan sa mga modelo

Ang akong bana, si Jerry, anaa sa dili maayong panglawas sulod sa pipila ka tuig sa dihang nahimo siyang prinsipal sa seminary alang sa mga ward nga nagmiting sa among meetinghouse. Tingali walay si bisan kinsang nasayud kon unsa ka lisud kini alang kaniya nga mobangon og sayo kada buntag—ilabi na atol sa ngitngit pa, sa mga bulan nga tingtugnaw—ug moadto sa among gambalay. Wala madugay human niana, siya namatay.

Pipila ka tuig human sa pagtaliwan ni Jerry, nasurprisa ko nga nakadawat og usa ka makapatandog nga sulat gikan sa usa ka batan-ong babaye kinsa mibalhin pila ka tuig na ang milabay. Siya misukip niini ngadto sa pahibalo sa iyang kasal. Ang sulat mabasa:

“Nakadayeg gayud ako sa imong bana ug nahasubo pag-ayo sa pagkadungog sa iyang pagtaliwan. Siya ang kinamaayohan nga nahimo namong prinsipal sa seminary sukad. Sa kada buntag magpaabut siya diha sa mga pultahan ug ablihan kini samtang siya motimbaya sa matag usa og usa ka maayong buntag. Human sa klase, iyang ablihan ang pultahan pag-usab ug moingon, ‘Ayo-ayo sa eskwelahan!’

“Kanunay nakong gisiguro ang pagsulti og salamat ug usahay mosulti kaniya unsa kami ka mapasalamaton nga anaa siya. Mibati ko nga mas luwas uban kaniya didto.

“Kanunay siya nga mapainubsanon kaayo, ug ang iyang pagkamabination nakita sa tanan. Tingali mas maayo ang akong pagtambong tungod kay dili ko gusto nga si Brother Bergevin magpaabut diha sa tugnaw, maghunahuna nga padulong nako o naulahi ko. Usa siya ka talagsaon kaayong tawo ug kanunay siya nga mahinumdoman.”

Sigurado nga si Jerry wala masayud nga dunay tawo nga makahunahuna gihapon niya sa paglabay sa daghang katuigan. Gani kining mahunahunaon nga batan-ong babaye nakahunahuna gihapon, ug siya mabination kaayo sa pagpadala niining maanindot nga sulat, nga mapasalamaton ko sa pagdawat.

Ang himno nga “Matag Tawo nga Motandog Kanamo sa Kamaayo” (nu. 183) nagsugod sa niini nga mga linya:

Mipili ko niining himno alang sa lubong ni Jerry tungod kay nagtuo ko nga sa kanunay kita nakapanalangin sa mga kinabuhi sa uban nga dili lang mahibaloan. Ako nasayud nga si Jerry nakapanalangin og daghang kinabuhi sa iyang kamanggihatagon, serbisyo, ug gugma.