Unsay Natudlo Kanako sa Pagka Dili Manganak mahitungod sa Pagpasanay ug Pagpuno sa Yuta

Imahe

young woman smelling flowers

Sa sinugdanan ang Dios milalang sa lalaki ug babaye ug mihatag kanila og sugo: “Pagmabungahon, ug pagsanay, ug pun-a ang yuta” (Genesis 1:28; Moises 2:28). Ang akong bana ug ako naminyo sulod sa upat ka tuig ug tunga, apan kami walay mga anak. Tingali adunay mga nagbasa kinsa motubag (ug nakadungog na ko niining tanan sa una):

“Ah, apan batan-on ka pa!”

“Tagamtama lang kini nga panahon nga walay mga anak!”

“Pahimusli ang kagawasan samtang molungtad pa kini!”

Akong nakat-unan nga dili masilo ug palabyon lamang ang mga komentaryo tungod kay nasayud ko nga wala gituyo niadtong mga nagsulti nga makapasakit. Nakaamgo ko nga adunay mga tawo kinsa mas dugay nang naminyo kinsa walay mga anak gihapon. Hinoon, nasayud ko nga bisan og upat ka tuig pa lamang kini, wala gihapon kana nagpasabut nga sayon kini.

Adunay mga panahon nga sayon. Sa milabayng duha ka tuig, ang akong bana ug ako nakapuyo didto sa Europe, nga nagbiyahe ngadto sa mga dapit nga wala namo dahuma nga among maadtoan. Nakakaon kami og lamiang pagkaon. Ug nakahimamat kami og daghang higala gikan sa tibuok kalibutan kinsa mipalapad sa among mga ideya, mga opinyon, ug mga panglantaw sa kalibutan. Sa daghang paagi dili kini maalamon nga dili magmapasalamaton alang niini nga panahon. Ang akong relasyon sa akong bana napalig-on, nakakat-on ko og daghan, ug kami adunay pipila ka talagsaong mga panimpalad.

Apan kami usab migahin og daghang gabii diha sa sopa nga nagtan-aw og mga salida. Nakahimo kami og mga handumanan nga ang among umaabut nga mga anak dili mahimong usa ka bahin. Ang among ward adunay usa lamang ka batan-ong magtiayon nga walay mga anak, ug—dili na ikasurprisa [spoiler alert]—kami kini. Ug daw bisan unsa pa nga mga panimpalad ang among nasinati, ang hunahuna bahin sa mga anak anaa kanunay.

Atol sa akong mga kalampusan ug mga kapakyasan, kanunay nakong nakaplagan ang akong kaugalingon nga namalandong sa sugo nga gihatag ngadto ni Adan ug Eva. Nagtuo kami nga kini nga sugo nagpabilin nga hingpit nga ipatuman karon¹ ug nga kami gilauman sa pagsunod niini. Bisan pa man niana, ang akong bana ug ako wala pa makatuman niini. Apan wala usab kini matuman ni Adan ug Eva, sa sinugdanan. Busa unsay ilang gihimo? Ang bugtong butang nga ilang nahibaloan nga buhaton—giatiman nila ang tanaman. Samtang wala ko nagpuyo sa Tanaman sa Eden, nagpuyo ko sa tanaman sa yuta, sa tanaman sa Netherlands, sa tanaman sa akong pamilya, ug sa tanaman sa akong ward. Kini mao ang akong mga tanaman nga ang Ginoo mihangyo kanako sa pagpasanay ug pagpuno. Kini mao ang mga pulong nga gitutokan sa akong pagpamalandong. Kini nga mga pulong nakatabang kanako sa pagtutok og usab sa akong kinabuhi sa pagserbisyo sa uban ug sa Ginoo. Kanunay akong naghunahuna kon:

• Sa unsang paagi ako makapasanay sa mga gasa nga ang Ginoo mihatag kanako ug sa uban?

• Sa unsang paagi ako makapasanay og gugma ngadto sa mga anak sa Dios?

• Sa unsang paagi ako makapasanay sa akong panahon ug paningkamot sa pagserbisyo sa uban?

• Sa unsang paagi ako makapuno sa akong kaugalingong espirituhanon nga tinubdan?

• Sa unsang paagi ako makapuno sa unsay nawala sa uban, sa temporal man o sa espirituhanon?

• Sa unsang paagi ako makapuno og paglaum ug hugot nga pagtuo nga daw nawala na alang sa kadaghanan dinhi sa kalibutan?

Samtang mas nakatutok ko niini nga mga pangutana, napanalanginan ko og mga oportunidad sa pagtubag niini sa gamhanang mga paagi. Ako adunay oportunidad sa pagserbisyo diha sa organisasyon sa Young Women. Ako adunay kahigayunan sa pagpailin-ilin nga moundang sa bisan unsang gibuhat nako ug motabang og tawo nga mag-empake o mag-atiman og mga anak sa mga higala. Nakahimo ako sa pagtudlo og teyatro ngadto sa mga bata gikan sa tibuok kalibutan. Nakagahin ko og dugang nga panahon sa pagtuon sa ebanghelyo. Mas maayo kong nakigtambayayong sa mga alantuson sa uban ug sa paghupay niadtong nagkinahanglan sa kahupayan. Ug labaw sa tanan, nakaangkon ko og mas dakong kahibalo, pagpamatuod, ug espirituhanon nga pagsabut sa ebanghelyo ug sa plano sa Dios alang kanako.

Wala ko mag-ingon nga ang sugo sa “pagsanay ug pagpuno” wala magpasabut nga magbaton og mga anak. Ania kita dinhi aron sa pag-amuma og mga pamilya diha sa pagkamatarung, ug kana naglakip sa pagbaton og mga anak, kon mahimo. Apan samtang naghulat alang sa panalangin sa mga anak, makatuman gihapon kita niana nga sugo pinaagi sa pag-atiman sa mga tanaman sa atong palibot. Mao nga kon ako maguol, masagmuyo, mayugot, masina, masuko, o mahadlok tungod sa akong pagkadili manganak, kanunay akong maningkamot sa pagpangutana sa akong kaugalingon: unsa man ang akong gibuhat aron sa pag-atiman sa akong mga tanaman? Ug mao kana ang makahimo sa tanang kalainan.