Dali, Sunod Kanako
Kinsa ang makadawat og pagpadayag alang sa Simbahan?
Doktrina ug mga Pakigsaad 27–28
Marso 15–21
Niadtong Agosto 1830, si Hiram Page, usa sa walo ka mga Saksi sa Basahon ni Mormon, nangangkon nga nakadawat og duha ka pagpadayag mahitungod sa umaabut nga dapit ug sa organisasyon sa Zion gamit ang usa ka itom nga bato sa manalagna. Kini nga mga pagpadayag misukwahi sa nangagi nga mga pagpadayag nga gihatag ngadto ni Joseph Smith, apan daghang miyembro ang mituo niini.
Pagpadayag alang sa Simbahan
Sa dihang nag-ampo si Joseph mahitungod sa mga pagpadayag ni Hiram, ang Ginoo mitudlo, “Walay usa nga itudlo sa pagdawat sa mga sugo ug mga pagpadayag niini nga simbahan gawas sa akong sulugoon [ang propeta]” (Doktrina ug mga Pakigsaad 28:2). Siya mipahayag nga “kadtong mga butang nga siya [Hiram] misulat gikan niana nga bato dili gikan kanako ug … si Satanas milingla kaniya”(Doktrina ug mga Pakigsaad 28:11).
Si Hiram sa katapusan misalikway sa iyang mga pagpadayag, ug ang tanang miyembro nagkahiusang mikumpirmar nga ang propeta lang ang bugtong tigpadayag alang sa Simbahan ni Kristo.
Nganong importante man nga masayud nga ang buhing propeta lang ang makadawat og pagpadayag alang sa tibuok Simbahan? Sa unsang paagi nga kini makapanalipod kanato gikan sa pagkalingla?
Tan-aw ngadto sa Propeta ug mga Apostoles
Si Presidente M. Russell Ballard, Akting nga Presidente sa Korum sa Napulog Duha ka mga Apostoles, mipahimangno:
“Ipadayon ang inyong pagtutok diha sa Unang Kapangulohan ug sa Korum sa Napulog Duha ka mga Apostoles. Kami dili mopahisalaag kaninyo. Dili kami makahimo. …
“… Kon adunay mosulti ninyo nga sila nakadawat og pagpadayag nga wala madawat sa Unang Kapangulohan ug sa Napulog Duha, palayo gikan kanila.”1