Ako mei he Ngaahi Pōpoaki ʻo e Konifelenisi Lahí

ʻE lava ke tokoni ʻa e ngaahi fehuʻi ko ʻení ki he kau faiakó ʻi heʻenau palani ko ia ke ngāue ʻaki ha pōpoaki konifelenisi lahi ke akoʻí.

1. Ko e hā ʻoku loto ʻa e tokotaha ʻokú ne fai e leá ke mahino kiate kitautolú? Ko e hā ha ngaahi tefitoʻi moʻoni ʻo e ongoongoleleí ʻokú ne akoʻi mai? ʻOku kaunga fēfē nai ʻa e ngaahi tefitoʻi moʻoni ko ʻení ki heʻetau kōlomú pe Fineʻofá?

2. Ko e hā ha ngaahi potufolofola naʻe fakaʻaongaʻi ʻe he tokotaha leá ke poupouʻi ʻaki ʻene pōpoakí? ʻOku ʻi ai nai ha ngaahi potufolofola kehe te tau lava ʻo lau ʻa ia te ne fakaloloto e meʻa ʻoku mahino kiate kitautolú? (Te ke ala maʻu ha ngaahi potufolofola ʻe niʻihi ʻi he ngaahi fakamatala ʻi he konga kimui ʻo e pōpoakí pe ʻi he Fakahinohino ki he Ngaahi Folofolá.)

3. Ko e hā ha ngaahi fehuʻi te u lava ʻo fai ke tokoni ai ki he kāingalotú ke nau fakalaulaulotoa e pōpoakí? Ko e hā ha ngaahi fehuʻi ʻe tokoni kiate kinautolu ke nau ʻiloʻi ʻa e mahuʻinga ʻo e pōpoakí ʻi heʻenau moʻuí, ʻi honau ngaahi fāmilí, pea ʻi he ngāue ʻa e ʻEikí?

4. Ko e hā te u lava ʻo fakahoko ke fakaafeʻi ai e Laumālié ki heʻemau fakatahá? Ko e hā te u lava ʻo fakaʻaongaʻi ke fakatupulaki ai ʻa e fealeaʻakí, kau ai ha ngaahi talanoa, talanoa fakatātā, hivá, pe ko e tā valivalí? Ko e hā naʻe fakaʻaongaʻi ʻe he tokotaha leá?

5. Naʻe fai ʻe he tokotaha leá ha ngaahi fakaafe? Te u lava fēfē ʻo tokoniʻi e kau mēmipá ke nau ongoʻi ʻa e holi ke fakahoko ʻa e ngaahi fakaafe ko iá?

ʻOku lahi ha ngaahi founga kehekehe ke tokoniʻi ai e kau mēmipá ke nau ako mei he ngaahi pōpoaki ʻo e konifelenisi lahí. Ko ha ngaahi sīpinga ʻeni ʻe niʻihi; mahalo te ke maʻu ha ngaahi fakakaukau kehe ʻe ngāue lelei ange ʻi hoʻo kōlomú pe Fineʻofá.

• Aleaʻi fakakulupu. Vahevahe ‘a e kau mēmipá ki ha ngaahi kulupu iiki, pea vahe ki he kulupu takitaha ha konga ʻo e pōpoaki konifelenisí ke nau lau pea aleaʻi. Kole leva ki he kulupu takitaha ke nau vahevahe ha moʻoni ne nau ako. Pe te ke lava ʻo faʻu ha ngaahi kulupu ʻaki ha niʻihi ne nau ako mei he ngaahi konga kehekehe pea tuku ke nau fevahevaheʻaki ʻa e meʻa ne nau akó.

• Tali e ngaahi fehuʻí. Fakaafeʻi ʻa e kau mēmipá ke nau tali e ngaahi fehuʻi fekauʻaki mo e pōpoaki ʻo e konifelenisí ʻo hangē ko ʻení: Ko e hā ha ngaahi moʻoni ʻo e ongoongoleleí ne tau maʻu ʻi he pōpoaki ko ʻení? Te tau fakaʻaongaʻi fēfē nai ʻa e ngaahi moʻoni ko ʻení? Ko e hā ha ngaahi fakaafe mo ha ngaahi tāpuaki kuo talaʻofa mai? Ko e hā ʻoku akoʻi mai ʻe he pōpoaki ko ʻení fekauʻaki mo e ngāue ʻoku finangalo ʻa e ʻOtuá ke tau fakahokó?

• Vahevahe ha ngaahi kupuʻi lea. Fakaafeʻi ʻa e kau mēmipá ke vahevahe ha ngaahi kupuʻi lea mei he pōpoaki ʻo e konifelenisí ʻa ia ʻokú ne ueʻi kinautolu ke nau fakahoko honau ngaahi fatongia ʻi he ngāue ʻo e fakamoʻuí. Poupouʻi kinautolu ke nau fakakaukau ki he founga te nau lava ai ʻo vahevahe ʻa e ngaahi kupuʻi lea ko ʻení ke tāpuekina ai ha taha, kau ai ʻakinautolu ʻoku nau ʻofa aí mo e niʻihi ʻoku nau ngāue fakaetauhi ki aí.

• Vahevahe ha lēsoni fakataumuʻa. Fakaafeʻi ha kau mēmipa kimuʻa ʻi he kalasí, ke ʻomi ha meʻa mei ʻapi te nau lava ʻo fakaʻaongaʻi ke akoʻi ʻaki ʻa e pōpoaki ʻo e konifelenisí. Lolotonga ʻa e fakatahá, kole ki he kau mēmipá ke nau fakamatalaʻi ʻa e founga ʻoku kaunga ai ʻa e ngaahi meʻa ko iá ki he pōpoakí.

• Teuteuʻi ha lēsoni ke akoʻi ʻi ʻapi. Kole ki he kau mēmipá ke nau ngāue tautautoko ua ke palani ha lēsoni efiafi fakafāmili ʻi ʻapi ʻo fakatefito ʻi he pōpoaki konifelenisí. Te tau lava fēfē nai ʻo ngaohi ke mahuʻingamālie ʻa e pōpoakí ki hotau ngaahi fāmilí? ʻE founga fēfē nai haʻatau vahevahe ʻa e pōpoaki ko ʻení pea mo e kakai ʻoku tau ngāue fakaetauhi ki aí?

• Vahevahe e ngaahi aʻusiá. Lau fakataha ha ngaahi fakamatala mei he pōpoaki konifelenisí. Kole ki he kau mēmipá ke nau vahevahe ha ngaahi sīpinga mei he folofolá mo ʻenau moʻuí, ʻokú ne fakahaaʻi mo fakamamafaʻi ai ʻa e tokāteline naʻe akoʻi ʻi he ngaahi fakamatala ko ʻení.

• Ako fekauʻaki mo ha veesi folofola. Fakaafeʻi ʻa e kau mēmipá ke nau lau ha potufolofola mei he pōpoaki konifelenisí. Kole ange ke nau aleaʻi e founga ʻoku tokoni ai e ngaahi akonaki ʻi he pōpoakí, ke mahino lelei ange kiate kinautolu e veesi folofolá.

• Kumi ha tali. Faʻu ha ngaahi fehuʻi ʻe niʻihi kimuʻa ʻi he taimi kalasí, ʻa ia ʻe lava ʻo tali ʻi hono fakaʻaongaʻi ʻo e pōpoaki konifelenisí. Tokanga ki he ngaahi fehuʻi ʻoku tupu ai e fakakaukau lolotó pe ngāue ʻaki ʻo e ngaahi tefitoʻi moʻoni ʻo e ongoongoleleí (vakai, Ko e Faiako ʻi he Founga ʻa e Fakamoʻuí, [2016], 31–32). Fakaʻatā leva ki he kau mēmipá ke nau fili ha fehuʻi pea kumi ʻa hono ngaahi talí mei he pōpoakí. Fakaafeʻi kinautolu ke nau aleaʻi ʻenau ngaahi talí ʻi ha ngaahi kulupu iiki.

• Kumi ha kupuʻi lea. Fakaafeʻi ʻa e kau mēmipá ke nau kumi ʻi he pōpoaki konifelenisí ha ngaahi kupuʻi lea ʻoku ʻuhingamālie kiate kinautolú. Kole ange ke nau vahevahe ʻa e ngaahi kupuʻi leá pea mo e meʻa ʻoku nau ako mei aí. ʻOku tokoni fēfē nai ʻa e ngaahi akonaki ko ʻení ke tau fakahoko ʻa e ngāue ʻa e ʻEikí?

• Faʻu ha meʻa. Fakaafeʻi ʻa e kau mēmipá ke nau faʻu ha pousitā pe fakaʻilonga tohi ʻoku hā ai ha kiʻi fakamatala langaki moʻui nounou mei he pōpoaki ʻo e konifelenisí. ʻOange kiate kinautolu ha faingamālie ke vahevahe ʻa e meʻa ne nau faʻú.